NEHEMIA 1 - KITABI HABARI MOPIOHE

¹ Uti-utieelo podulohu lei Nehemia walae̒e Hakhalya tomimbihu poloo̒olohio. To delomo hulalo Kislewu totaunu odulo pulu pamalenta lei Artahsasta odelo olongia to Persia, wau̒, Nehemia, woluo to Susan, tiilo kota lo bele biluloa̒ saaha li olongia.

Tei Nehemia siluukali lohilao helo mikilangi mola Yerusalemu

² Tou̒ boito wutatuu̒ tei Hanan leidungga mai lonto Yehuda wolo dengolo lota. Lapatao̒ timongolio pilohintuwau̒ mao̒ pasali owowoluwoa lo Yerusalemu wau tau-tauwalo Yahudi tamalo hualingai lonto polayahu to Babel.

³ Timongolio helo hungguli mai deu̒ tau-tauwalo bakasi polayahu tamalo hualingai ode huta pilohuluta lo duhulio boito, botia hitumula sikisa wau hehilina lo babaa-ngusawalo deli tawoluo topalitio. Donggo poli, didii-ngingaalo kota Yerusalemu donggo hia̒antulua daa̒ wau huhuu-hebuwaalo hulubangilio diipo piloo̒piohu tumulalo mai yilopobu tou̒ yilalu mao̒.

⁴ Loo̒dungohe habari boito, wau̒ lotihuloa̒a mola wau hilumoyongo. He odula-dulahelio mola hiheolio wau̒ siluukali lohilao. Wau̒ tulusi helo puasa mola samabela helodua̒ to Allahu Taa̒ala,

⁵ “Yaa Eeya Allahu Taa̒ala takawa-kawasa tosologa. Eeya Allahu Taa̒ala taa Udaa̒ wau mongo watotia motitalu ode Eeya wolo lealeaatu rasa woohe. Eeya debo molotolo hilao wau hemodihu danti lo Eeya totaa u motolia̒nga to Eeya wau modungohe palenta lo Eeya.

⁶ Ambunguolo bilohilo mai watotia yaa Eeya, wau ambunguolo dungohilo mai dua̒ u hepobotulo mola lo watotia ode Eeya hui wau dulahu duo̒lo umati lo Isirai̒lu, mongo wato lo Eeya boito. Watotia motolongaku mai deu̒ mongowatotia, mai̒lodusa; watotia wau mongo loluuhuru lo watotia mai̒lodusa olo.

⁷ Mongowatotia malo juluhaka to Eeya wau helo lambanga totoonulalo palenta lo Eeya. Mongowatotia diila lodungohe totoonulalo butoo̒ u mailohi mai lo Eeya ode mongowatotia lotimbulude olei Musa, wato lo Eeya boito.

⁸ Yaa Eeya, aambunguolo eelailo mai tataa-heyaalo Eeya uiloi̒ya lei Musa to palenta mai lo Eeya, deu̒ wonu mongowatotia, diila tatapu wau molotolo hilao to Eeya, mongowatotia mapo bubuualawa towolota lo babaa-ngusawalo.

⁹ Bo wonu mongowatotia muli mohualinga ode Eeya wau modungohe totoonulalo palenta lo Eeya yi mongowatotia tamalo bubuua̒lawa boito mamuli ambuo lo Eeya, penu boli mongowatotia woluo to huhuudio lo dunia. Lapatao̒ mongowatotia mamuli powalingo lo Eeya ode tambati umaa tilulaotao̒ lo Eeya u mowali tambati poi̒baadatialo ode Eeya.

¹⁰ Yaa Eeya, mongowatotia botie mongo wato lo Eeya umati lo Eeya lohihilao taa maa piloa̒ahu lo Eeya wolo kawasa wau olootolo Eeya upolu-polutuo̒.

¹¹ Ambunguolo dungohilo mai dua̒ lo watotia wau dua̒ lo ngoa̒amila wato lo Eeya uwewo, tao̒hilaa mohurumati mola to Eeya. Ambunguolo tulungiyalo mai lo Eeya alihu todulahe botie wato lo Eeya botie ohaasili moo̒ toduo mai odehu hilao monto li olongia.” To maasa boito wau̒ yito hemongurusi uilumo li olongia.