NAHUM 3 - KITABI HABARI MOPIOHE

¹ Matopotala kota botie u polupolu lo wimbulo wau polomatea mate-mateelo mao̒; polupolu lobalangi yilambato boli tilapulo yilambato todelomo popaatea.

² Dungohiilo peletao̒ lo buuboo̒ wau elenggengio loroda, hulopao̒ teteeo̒ wadala wau lotau̒lo kaleta.

³ Pasuukani owadala loluhu polupolu lo sumangati, wamilo umilato wau totobuo̒ molilingga. Taa u yilate diilalo oyia̒apa, milate limongolio bolo hihuntu-huntuwalo mao̒, mohutu totau-tauwala hemei teduo̒.

⁴ Niniwe tasuuntali boito donggo hewohiyalo hukuumani. Ogaagalio otutu moa̒anga daa̒ hilao. Dadaata bangusa magiluna-gunalio, wau piliyo wolo bo u moposanangi hilao.

⁵ Eeya Taa Laba-labaalo kawasa lotahuda, “Wuu Niniwe, yio̒ mapo sikisaa-U̒! Kaingimu yinggilo-U̒ totalu lo babaa-ngusawalo, wolitumu oontonga limongolio.

⁶ Pohutuwo-U̒ mai yio̒ odelo balangi moo̒jijio̒, paiyo-U̒ yio̒ wolo bountu; powaliyo-U̒ yio̒ pobibiilohe lotau.

⁷ Tamoo̒onto olemu mamo poo̒lamingo wau moloi̒ya, ‘Niniwe bolo tuode ngoa̒amilalo! Tatoonu modudua̒ motilimi wolio? Diaaluo tamohuto moliyango olio.’ ”

⁸ Wuu Niniwe, diila pongalo aakali yio̒ lebe mopiohe wolo Tebe, tiilo lokota Masiri? Tebe olo dudutuulio tobiihu dutulaa u molilunga olio odelo dingingo meeseli. Ooo̒, Dutulaa Nili boitolo biintengi piloti tanggualio.

⁹ Tebe momalenta to Sudan wau Masiri, wau kawasaalio diila o eenggadelio; Libia wau Put yito panggalio.

¹⁰ Eleponu odito ulipu lo Tebe tilawalo wau bilintai̒o ode polayahu. To ngoa̒amila tilitangowa, mongo walai̒o pilatelio tunggula yilate. Taduduulaa̒ lolipulio pilungu wolo lante wau tilaya-layadio towolota lo tahelo tawalo mao̒.

¹¹ Wuu Niniwe, yio̒ olo madidu motota lomanusia sababu huwohuwoo̒. Yio̒ olo mamo tolopani alihu molopato monto mumuu-suumu.

¹² Totoonulalo bintengimu madebo odelo bungo lo ara u polupolu lo huhuu-ngowaalo u hiluutua. Wonu bungo lo ara boito liluhulo hungolio mamodehu ode delomo ngango lotaa ohilaa molemelao̒ hungo boito.

¹³ Mongo pajulemu molulupuhu debo odelo taabua wau lipumu sama-samaata diila olootolo motaalua wolo musu. Tulu mamoomobu papaa-langiyalo huhebu hulubangimu.

¹⁴ Tuuntuwalo mola taluhu wambai̒o u podapatolo ngotilinggadu yio̒ bilalaalio, wau poo̒toheeta mao̒ bibii-ntengimu! Lumbe-lumbetaa̒alo latao̒ u pohutu tetee-lawaalo, wau podapato mao̒ papaa-yisakalio!

¹⁵ Penu boli wolo u pohutuwomu, madidu ohuna wambai̒o, sababu yio̒ tantu mamopobu tunggula maahu meaala mate todelomo popaatea. Yio̒ mamooli debo odelo tilapulo halabolu u iliila lobulita. Yio̒ mai̒lo duhenga mola dadaata debo odelo bulita!

¹⁶ Mongo dahangimu mongilaboto jumulaa lo bibii-natangiyalo to hulungo! Bo botia timongolio lopulito, debo odelo bulita ulopo kokabe pilipii̒o lapatao̒ tilumomboto yilooli.

¹⁷ Taduduulaa̒ lolipu wau tahidihima pantungo lipu debo odelo polemboa̒ lobulita u motililungo to didii-ngingaalo meeseli tou̒ mohuhulo. Bo lapatao̒ dulahee lobutu mai, timongolio hua̒a tilimombota yilooli; diaaluo penu boli ngotaa mao̒ tamotota ode utoonu pilonao̒wa limongolio.

¹⁸ Wuu olongia lipu lo Asyur! Mongo gubolonulumu mailate, wau mongo uhuuhumu leituluhu u ohiheo-hiheolo mao̒. Ulipumu lobubuu-alaawa lomao̒, wau diaaluo penu boli ngotaa mao̒ mowali modelo muli mopo walinga olimongolio.

¹⁹ Aibumu diila mowali wunemolo, wau papaa-liimu diila mowali poo̒luliyolo. Ngoa̒amila tau tamoo̒ dungohe habari oa̒antulumu molaa̒apa uluu̒ meengahu. Sababu ngoa̒amila tau malo dutolo sababu ololeetumu udiila helo pulito boito.