NAHUM 1 - KITABI HABARI MOPIOHE

¹ Utieelo tahuli lo Allahu Taa̒ala tomimbihu Niniwe. Tahuli boito pilopo ilaalo wolo bibilohe uilohi odelei Nahum, ngotaalio lonabi tawaliilio mai lonto Elkos.

Omuluka lo Eeya ode Niniwe

² Eeya Allahu Taa̒ala diila motohilaa obalii-Lio, taa u moluwali o-Lio, tantuulo moo̒tapu hukuumani. Wolo muluka daa̒, Eeya molontuli niyati ode limongolio.

³ Memangi Eeya, diila hua̒a momuluka; bo Tio olo okawasa daa̒ tilinggula titaalo tita mohutu totala diila talopato-Lio monto hukuumani. Tou̒toonu ponao̒wa lo Eeya, teto tumoodei dutalo; totambati potidutaa̒ lo oa̒a-Tio teto peaahuo̒ mowali heengo.

⁴ Eeya monganjamu deheto wau mopohengu mao̒, ngoa̒amila dutulaa pilomata lopulito taluhio. Hui̒dee Karmel wau huhuu-tawaalo datahu wau luasi to Basyan mowali mohengu wau to Libaanon malo lolante totoonulalo bunga.

⁵ Huhuu-ideyaalo hulu-huluhelio totalu-Lio; wau huludu olo mowali taluhu ngoa̒amila. Wonu Eeya motibilohei, huta hulu-huluhelio, dunia wau ngoa̒amila tuangio hulu-huluhelio

⁶ Tatoonu tamoo̒ taahangi wonu Eeya muluka? Diaaluo tamoo̒ lopato monto omulukaa-Lio? Eeya mopomukaa̒i omulukaa-Lio uwali-walihuhu botu motoyopu mowali peaahuo̒ totalu-Lio.

⁷ Eeya boito mopiohe, Tio moduo̒la umati-Lio tou̒ timongolio suusa, Tio modaha taa u motiduo̒la to Olio.

⁸ Debo odelo taluhee ulaba-labaalo udaa̒ moloo̒po, ilantulu-Lio mumuusuu-Lio. Timongolio tabuheli moluwali o-Lio tilota-I̒o wolo mautu tunggula binaasa.

⁹ Penu boli lanjana wolo u pohutuwomu moluwali to Eeya, tantu madiila mowali momata. Tio diila tamolantuli niyati-Lio tunggula poo̒luo ode mumuusuu-Lio;

¹⁰ Yio̒ matumbilalo debo odelo laato u mohengu debo odelo diu̒to oduhi kakaaita.

¹¹ Monto olemu, wuu Niniwe, malumenetai ngotaalio tapolupolu wolo lanjana u moleeto. Tio mohutu lanjana u moluwali to Eeya.

¹² Yi tahuda mai lo Eeya ode Isirai̒lu, umati-Lio, “Eleponu tau-tauwalo Asyur boito hilootola wau dadaata jumulaalio, bo timongolio maa̒ntuluwolo lapatao̒ mopulito. Wuu bangusaa-U̒, Wau̒ malohutu olimongoli lodutolo, bo Wau̒ diilalo mohutu mai poli.

¹³ Botia mapoo̒ pulito-U̒ kawasa lo Asyur to olimongoli, wau mabunto-U̒ lante u mongawade olimongoli.”

¹⁴ Utieelo putuusani lo Eeya tomimbihu bangusa lo Asyur, “Timongolio diila tao̒ wali mai u mopotolonga mola bangusaalio. Bubuu-iyaalo balaahala uwoluo todelomo kukuu-wiliyaalo dewolio maa̒ntuluwo-U̒. Kuubulu duo̒lo bangusa lo Asyur donggo hepodapato-U̒ sababu timongolio diila paatuti tumumulo!”

¹⁵ Bilohilo ngotaalio lo utolia dungga-dungga mai moli huhuu-ideyaalo, modelo habari mopiohe, habari ohohaama. Wuu bangusa lo Yehuda, porameyaalo dulahu bukaamu wau bayaaliyalo dantimu to Allahu Taa̒ala. Lipumu diilalo kawasaalio lotaa moleeto. Timongolio mailantulu sama-samaata.