MONGO HAKIMU 8 - KITABI HABARI MOPIOHE

Taulo Midian ilolaahelio

¹ Taulo Epraim loloi̒ya mao̒ odelei Gideon, “Yilongola ami diila hileingumu tou̒ yio̒ lomonggata mota loluhu taulo Midian? Wolo sababuulio ami pilohutumu odito?” Odi-odieelo mola timongolio helobiihu olei Gideon.

² Bo tei Gideon lolametao̒, “Wolo u pilohutu lowatia diila boti oboliilio wonu pobandingio mola lou̒ wolo u mapilohutu limongoli. Eleponu u hepilohutu limongoli boito bo ngoi̒di, bo ungoi̒di boito lebe ohalaga daa̒ wolo ngoa̒amila u mapilohutu lo ngoilanggubu kaumu laatia.

³ Timongolilo tahe loo̒tapu mai kawasa lonto Allahu Taa̒ala tilinggula loo̒pate olei Oreb wolei Jeeb yila-yilateelo mao̒, taduulota himuloa lolipu lo Midian boito! Wonu pobandingio mola woleeto, maawolo huhutu u mopiohu laatia?” Lapatao̒ tei Gideon loloi̒ya mao̒ odito, timongolio diilalo loingo.

⁴ To saaa̒ti boito tei Gideon wolo taulio tolo hetuto lota leidungga mote ode ngotuali lo Dutula Yordan. Timongolio mailoongolo daa̒ bo debo tulusi wambao̒ himo hilapita musu.

⁵ Lapatao̒ timongolio leidungga mota ode Sukot. Mota teto tei Gideon loloi̒ya mao̒ ode ulipu lokota, “Tulungia mai wohia mao̒ ode tauu̒ ngoi̒di ua̒alo. Timongolio moongolo daa̒ hiambola ami donggo hemo hilapita olei Jebah wolei Salmuna, mongo olongia lo Midian boito.”

⁶ Bo mongo tau̒wa to Sukot boito lolametao̒, “Aa, timongoli debo diipo loo̒ wau̒upao̒ olei Jebah wolei Salmuna, wau timongoli malohile ua̒alo! Pongoola tahidudua̒ olemu boito musi wohiyalo ua̒alo?”

⁷ Yi ualei Gideon mao̒, “Ooo̒! Dewonu Eeya malo poo̒haama olau̒ to olei Jebah wolei Salmuna, yi timongoli mabuboa̒au̒ wolo duhi wau hutia u oduhi lonto huta ohungayo u luasi daa̒!”

⁸ Lapatao̒ tei Gideon lotolongao̒ nonao̒olio tulusi leidungga mola to Pnuel. Mola teto olo tio helohile ua̒alo ode taulio. Bo totameto taulo Pnuel tutuuwauwa wolo totameto taulo Sukot.

⁹ Masababu uito tei Gideon loloi̒ya mao̒ olimongolio, “De watia mamuli mohualingai wolo moa̒ahu. Wau tosaaa̒ti boito watia mamopo loohubu mao̒ Monara lokota botie!”

¹⁰ Tou̒ boito tei Jebah wolei Salmuna wolo ngoilanggubu pasuukani limongolio donggo woluo to Karkor. Monto ngoilanggubu pasuukani lotau-tauwala lohuta ohungayo u luasi daa̒, bo woluo tanu mopulaa limo lolihu lota wambai̒o tai̒lo lobita; ngohetuto dulo pulu lolihu lota suludadulio mailate.

¹¹ Tei Gideon helo tiduluhee mola to sipatana lohuta ohungaya u luasi daa̒ to ambahu tiimuru lo Nobah wau Yogbeha lapatao̒ bolo tilumahuo̒lo mola loluhu musu.

¹² Tei Jebah wolei Salmuna, olongia duulota lo Midian boito tilumeteo̒, bo tei Gideon lohilapita wau loheu̒upa olimongolio, tilinggula ngoa̒amila diiti lopopaatea limongolio malolingu.

¹³ Lapatao̒ todelomo wuwalingio mai lonto popaatea, tei Gideon helohama dalalo u lolibaya to totao̒de lo Heres.

¹⁴ Mota teto tio loheu̒upa tabohulotau ngota lonto Sukot, lapatao̒ tio helohintu mao̒ totau boito tataa-nggulaalo tahimuloa lolipu to Sukot. Yi tau boito helo luladeo̒ tataa-nggulaalo boito odelei Gideon – ngoa̒amilalo maito pitu lopulaa pitulota.

¹⁵ Lapatao̒ uito tei Gideon mola lodunggaya wolo tahimuloa lo ulipu tokota boito tulusi loloi̒ya mao̒, “Tantu donggo oe̒ela mola limongoli deu̒ timongoli pee̒enta helo potouli u motulungi olaatia, sababu watia diipo loheu̒upa olei Jebah wolei Salmuna? Timongoli diila lohuto longohi ua̒alo totau; lebe-lebe pomao̒ timongolio donggo hiwoongola tou̒ boito. Bilohi, botie tei Jebah wolei Salmuna.”

¹⁶ Lapatao̒ uito tei Gideon lohama mao̒ duhi wau hutia u oduhi lonto huta ohungayo u luasi daa̒, tulusi helomate tahimuloa lo ulipu tokota Sukot boito.

¹⁷ To Pnuel tio lopo loohubu monara wau helomate mateelo mao̒ mongo lolai̒ tokota boito.

¹⁸ Lapatao̒ uito tei Gideon lohintu mao̒ odelei Zebah wolei Salmuna, “Woloolo mola baya lotau-tauwalo tahe pilate limongoli yila-yilateelo mao̒ to Tabor boito?” Tei Zebah wolei Salmuna lolametao̒, “Timongolio ngoa̒amilalo mohaamawa wolemu, debo odelo wali lotahi bangusawa.”

¹⁹ “Uito yito mongo wutatuu̒ wau mongo walao̒ limaamau̒,” ualei Gideon, “Humayaalio timongoli diila lomate yilateelo mao̒ olimongolio, yi tutuulio tutu wau̒ diila tamomate-mateelo mao̒ olimongoli olo.”

²⁰ Lapatao̒ ualei Gideon odelei Yeter, walaio tamohuhula daa̒, “Pateaalo mate-mateelo mao̒ timongolio!” Bo tei Yeter donggo humula. Oditolio, tio moohe tunggula diila lomahuto wamilio u momate-mateelo mao̒.

²¹ Ualei Zebah wolei Salmuna odelei Gideon, “Ntali, wonu yio̒ talolai̒, pateaalo mate-mateelo mao̒ ami wolo uluu̒mu lohihilao!” Yi tei Gideon olo lomate yila-yilateelo mao̒ olimongolio lapatao̒ lohama ngoa̒amila pake u woluo tobuloo̒ unta limongolio.

²² Lapatao̒ malo loi̒ya umati lo Isirai̒li odelei Gideon, “Yio̒ malo polopata olami lonto okokawasa taulo Midian. Sababu uito mamusi yio̒ mowali tau̒wa lami – yio̒ wau waliimu mola.”

²³ Tametao̒ lei Gideon, “Diila, watia tamowali tau̒wamu. Walao̒ watia olo diila. Eeyaamulo tau̒wamu.”

²⁴ Bo lapatao̒ tei Gideon luli loloi̒ya mao̒, “Bo tuwau hihiile laatia: ante-ante u yilambato limongoli lonto musu, mamusi wuduo mai limongoli ngoa̒amilalo ode laatia.” (Taulo Midian biasaalio hemomake ante-ante hulawa; tutuuwauwa debo odelo tau-tauwalo wewolio tahi biluloa̒wa to huta ohungayo u luasi daa̒.)

²⁵ “Ooo̒,” tametao̒ limongolio, “wolo sanangi lohilao ami mamongohi mai olemu.” Lapatao̒ timongolio lomua̒de mota kaini ngopata, lapatao̒ timii̒du taa monao̒ mai helo podutu mao̒ teto ante-ante umaa yilambatio mai lonto musu.

²⁶ Ngoa̒amila ante-ante hulawa uiludu odelei Gideon tou̒ boito buheetio ngopee̒ dulopulu lokilo, diipo leituwoto totoonulalo pake, kalungi, kaingi lailoumu u hepomake mongo olongia lo Midian, wau kalungi uwoluo to buloo̒ uu̒u-ntawaalo limongolio.

²⁷ Monto hulawa boito, tei Gideon malohutu bui̒ balaahala tuwau, lapatao̒ lopo tambati mao̒ to kambungulio, deu̒yito-yito to Ofra. Ngoa̒amila taulo Isirai̒lu lonao̒ mola helolubo bui̒ balaahala boito, tunggula timongolio diilalo mopoo̒tuoto Allahu Taa̒la. Wau sua̒li boito lowali debo odelo hentobu odelei Gideon wau ngaalaa̒lio.

²⁸ Taulo Midian diilalo loo̒hutu wolo-wolo poli: timongolio maa ilolaahe taulo Isirai̒lu. Yi ilaamanilo mola lipu boito wopato pulu lotaunu mola hihelio, ngotilonggadu tei Gideon donggo tumu-tumulo.

Opopate lei Gideon

²⁹ Lapatao̒ popaatea boito, tei Gideon luli lohualingo ode kambungu pilohuluta loduhulio wau lotibiluloa̒ mola teto.

³⁰ Tio owalao̒ pitu lopulu lota mongo lolai̒ sababu dilelio dadaata.

³¹ Woluo olo pipiaalio to Sikhem; lonto pipiaalio botie tio loo̒tapu walao̒ talolai ngota tai̒luntelio Abimelekh.

³² Lapatao̒ mapanggola daa̒ tio, bolo tei Gideon walae̒e Yoas boito yilate. Tio yilobungio tokuubulu lei Yoas, tiyamolio. Kuubulu boito dudutuulio to Opra, deu̒yito-yito kota lokaumu Abiezer.

³³ Lapatao̒ tei Gideon yilate mao̒, taulo Isirai̒lu diilalo tatapu wau molotolo hilao ode Allahu Taa̒ala. Timongolio helolubo dedeewaalo Baa̒l wau lopowali Baa̒l-Berit dewa limongolio.

³⁴ Timongolio diilalo loi̒baadati ode Allahu Taa̒ala, Eeya limongolio tamalo lopata olimongolio lonto okokawasa lo ngoa̒amila musu topalito limongolio.

³⁵ Timongolio olo diila helo malasi budi ode ngaalaa̒ lei Gideon tou̒ totoonulalo huhutu u mopiohu lei Gideon ode umati lo Isirai̒lu.