MONGO HAKIMU 7 - KITABI HABARI MOPIOHE

Tei Gideon lopoo̒laaheo̒ taulo Midian

¹ Todulahee tuwau tei Gideon wolo ngoa̒amila tahidudua̒ olio lobongu didimodupo daa̒. Timongolio lonao̒ wau lotikema totili butu lotaluhu Harod. Pilo tikemawa taulo Midian to ambahu tilayo lonto olimongolio, tolumbaya totili lo Huludu More.

² Eeya lotahuda odelei Gideon, “Tahidudua̒ olemu mailaba daatalio. Wau̒ diila mohuto mongohi olimongolio u moo̒haama to taulo Midian, sababu de pikiilangio mola limongolio deu̒ timongolio moo̒haama sababu lotoli mongolio lohihilao, tilinggula timongolio diilalo momuji ola-U̒.

³ Oditolio, pomalaa-lumualo mao̒ ode tahidudua̒ olemu, ‘Tatoonu tamolaasa moohe, musi hua̒a mololaa mao̒ Hui̒dee Gilead botie wau muli mohualinga ode belelio.’ ” Yi woluo dulo pulaa dulolihu lota talo hualinga; wau bo mopulu lihulota taleitolaa.

⁴ Lapatao̒ Eeya luli lotahuda odelei Gideon, “Tahidudua̒ olemu donggo dadaata daa̒. Delowalo timongolio ode dutulaa. Mola teto Wau̒ mamo lulaotao̒ olimongolio ode olemu. Wonu Wau̒ motahuda mai olemu, ‘Tau botie musi monao̒ wolemu,’ tio musi monao̒. Bo wonu Wau̒ motahuda mai, ‘Tau botie diila mowali monao̒ wolemu,’ yi tio diila mowali monao̒.”

⁵ Yi tei Gideon malodelo tau-tauwala boito ode dutulaa, lapatao̒ Eeya lotahuda mai odelei Gideon, “Taa u modilatao̒ taluhee debo odelo apula, musi pohalahumu mao̒ monto taa u moti bonggohuu̒ mongilu.”

⁶ Yi woluo tolo hetuto lota tahelo dilata taluhee lonto uluu̒lio; ngoa̒amila taawewo heloti bonggohuu̒ longilu.

⁷ Lapatao̒ Eeya lotahuda odelei Gideon, “Wolo otolo hetuto lota tahe lodelita taluhee boito, Wau̒ mamopo lopata olimongoli wau mongohi u moo̒haama olemu totaulo Midian. Ahuliilo mota tawewolio mohualingo.”

⁸ Sababu uito tei Gideon helo poa̒hu ngoa̒amila taulo Isirai̒lu uwewo lohualinga ngopohia utolo hetuto lota boito. Ngoa̒amila tomeu̒ wau torompeti hilamalio lonto tau-tauwalo tahe lohualinga boito. Taulo Midian woluo tolumbaya towalungo lo tambati pilo tikemawa taulo Isirai̒lu.

⁹ Tohui boito Eeya lotahuda mai odelei Gideon, “Bongulo, Gideon! Ponao̒lo moluhu pilo tikemawa taulo Midian. Wau̒ mongohi olemu u moo̒ohaama olemu toli mongolio.

¹⁰ Bo wonu yio̒ moohe, heinga mao̒ tei Pura, watomu boito monao̒ pee̒-pee̒enta ode pilo tikemawa lomusu.

¹¹ De yio̒ mamoo̒ dungoheo̒ wolo u hebisalaa lomusu, wau sua̒li boito mamopowali olemu buheli moluhu.” Lapatao̒ malonao̒ tei Gideon wolei Pura, ode pilo tikemawa lomusu.

¹² Taulo Midian, Amalek wau tau-tauwalo wewolio lonto huta ohungaya u luasi daa̒, loloo̒polo mola penu boli tou̒toonu tolumbaya boito. Oontonga mao̒ debo odelo bulita u uu̒upa. Uu̒u-ntawaalo limongolio mailaba daatalio debo odelo hungayo tobiihu pentadu.

¹³ Tou̒ tei Gideon leidungga mola odito, tio loo̒dungohe tahingota-ngotaawa donggo hemo hungguli tohiilopio ode sahabatilio. Tau boito loloi̒ya odie, “Watia loo̒ tohiilopo woluo roti ngobotu liliideo̒-liliideo̒ tilumuwotai ode kemaanto lapatao̒ lodehito kema ngowale. Kema boito loloohubu tilinggula lowali payadu wolo huta.”

¹⁴ Sahabatilio lolametao̒, “Waa, uito tantuulo mao̒ wamilo lei Gideon walae̒e Yoas, taulo Isirai̒lu boito! Boliilio mao̒ Allahu Taa̒ala malongohi olio loo̒haama to taulo Midian wau ngoilanggubu diti lo popaa-teaanto!”

¹⁵ Tou̒ tei Gideon loo̒dungohe pasali tohiilopo lotau boito wau boliilio, yi tio olo losujudulo mola lolubo to Allahu Taa̒ala. Lapatao̒ tio luli lohualinga ode kema lo Isirai̒lu wau loloi̒ya mao̒, “Potidapa-dapatolo! Eeya mamongohi mai olemu u moo̒haama toditi lopopaatea lo Midian.”

¹⁶ Lapatao̒ tei Gideon lolayadeo̒ tatolo hetuto lota tahidudua̒ olio lowali tolo duusingi. Ngota-ngota yilohiyalio torompeti tuwau wau ginti tuwau u tuatuanga morongo.

¹⁷ Ualei Gideon ode limongolio, “Wonu watia meidungga mola ode sipatana pilo tikemawa taulo Midian, poo̒tuoti mao̒ watia tio̒otutua, wau pohutuwalo wolo u pilohutu lowatia.

¹⁸ Wonu bolo watia wau polemboa̒ lowatia mohiipa torompeti, timongoli olo musi mohiipa mola torompeti limongoli. Lapatao̒ timongoli musi monguatio̒ topalito lo pilo tikemawa boito, ‘Ode Eeya wau odelei Gideon!’ ”

¹⁹ Tou̒ leidungga mai tomutaa̒ lou̒ hui, tei Gideon wau tahidudua̒ olio leidungga mola ode sipatana pilo tikemawa lomusu. Tou̒ boito taa u mokawali pilo tikemawa boito, boheli lotuuloa̒ lodaha. Lapatao̒ tei Gideon wau polemboa̒lio helohiipa mola torompeti wau lomoo̒ gigii-ntiyaalo limongolio.

²⁰ Oluo lo polemboa̒ uwewolio helohutu odito olo. Lapatao̒ timongolio ngoa̒amilalo lomintaa̒a mola momoo-rongowalo limongolio wolo uluu̒ oloihi, wau helohiipa torompeti uwoluo to uluu̒ olowala limongolio. Timongolio tilonggo watio̒, “Wamilo duo̒lo Eeya wau duo̒lei Gideon!”

²¹ Timongolio ngoa̒amilalo ngota-ngota debo hitihula to tambatilio topalito piloti kemawa boito. Yi ngoilanggubu diti popaatea lomusu boito tilumeteo̒ lopapaa-mbelenga sambela hiwuwa-wuwaatia̒.

²² Tou̒ tei Gideon wau tahidudua̒ olio donggo hemopo tingohe mola torompeti, Eeya helohutu diti popaatea lomusu tinggai helo tutuuhua ngota timongota wolo wamilo. Timongolio tilumeteo̒ ode mantahu Jerera demola ngoilamingo lo Bet-Sita wau kota Abel-Mehola totili lo Tabat.

²³ Yi suku Naputali, Asyer, wau suku Manasye mopio tato ambahu tiimuru meaalo tato ambahu otolopa lo Dutulaa Yordan tiliyangio olo. Lapatao̒ timongolio helo hilapita suludadu lo Midian.

²⁴ Wau olo ode ngoilanggubu madala hihui̒-hui̒dea lo Epraim, tei Gideon helolao habari lo titiyango botie, “Dulo polaahei moluhu taulo Midian. Polo tahangiyalo Dutulaa Yordan wau ngoa̒amila walao̒ dutulaa demola ngoilamingo Bet-Bara. Diila mao̒ polulia taulo Midian mobalanga mola monteeto mai.” Yi tau-tauwalo Epraim olo ilambulio, tulusi timongolio lotolo mintengi Dutulaa Yordan wau ngoa̒amila walao̒ dutulaa demola ngoilamingo Bet-Bara.

²⁵ Duulota tahimuloa lolipu bangusa lo Midian, deu̒yito-yito tei Oreb wolei Jeeb yilau̒po limongolio. Tei Oreb pilatelio yila-yilateelo mao̒ to Botu Oreb wau tei Jeeb pilatelio yila-yilateelo mao̒ to tambati hepo mitodelo angguru lei Jeeb. Tau-tauwalo Epraim boito helo hilapita tulusi taulo Midian, lapatao̒ lodelo mai lunggonge Oreb wolei Jeeb odelei Gideon to ngotuali lo Yordan wimbihu tiimuru.