MONGO HAKIMU 6 - KITABI HABARI MOPIOHE

Tei Gideon

¹ Pee̒entapo umati lo Isirai̒lu ilodusa to Eeya, tilinggula Tio lopoluli mao̒ bangusa lo Midian helo tolokawasa olimongolio pitu lotaunu mola hiheolio.

² Taulo Isirai̒lu odito wohelio totaulo Midian, tilinggula timongolio helo tituuo̒ todelomo gowa wau to tataa-mbatiyaalo wewo u aamani to huhuu-iduwaalo.

³ Iloduhenga olo deu̒ timii̒du tamomeengia lo Isirai̒lu motolo kelakela mao̒ huta, hiponao̒wa mai taulo Midian pee̒-pee̒enta wolo taulo Amalek wau tau-tauwalo wewolio monto huta ohungayo u luasi daa̒ hemoluhu taulo Isirai̒lu.

⁴ Timongolio hemo tikema tomadala lo Isirai̒lu wau hemo ngantulu ngoa̒amila pilomulo mola teto tunggula ode madala topalito Gasa ambahu huliaalio. Wau olo bibiahu himba, sapi wau kolodai umati lo Isirai̒lu hepo teteo̒lio. Diaaluo penu boli u hitua-tuawua olabita utolaa mao̒ limongolio tilinggula umati lo Isirai̒lu diilalo o ua̒alo sama-samaata.

⁵ Tau-tauwalo boito hemonao̒ mai hipole-polemboa̒ totoyunuta wolo bibiahu wau kema limongolio todelomo udadaata daa̒. Timongolio wau untalio mailaba daatalio diilalo oyia̒apa. Timongolio hemonao̒ mai mongantulu lipu boito,

⁶ wau umati lo Isirai̒lu diila moo̒hutu wolo-wolo toli mongolio.

⁷ Lapatao̒ umati lo Isirai̒lu helo ngiibode ode Eeya lei̒ tulungi mai toli mongolio u moluwali taulo Midian.

⁸ Eeya lolao mai ngotaalio lonabi odeli mongolio. Nabi boito loloi̒ya odie, “Odie mola tahuda mai lo Eeya, Allahu Taa̒ala lo Isirai̒lu: ‘Timongoli mailopatu-U̒ mai lonto polowato to Masiri.

⁹ Timongoli mapiloa̒ahu-U̒ lonto taulo Masiri wau lonto tau-tauwalo lipu botie tamoluhu olimongoli. Timongolio mapilo loontulu-U̒ lonto lipu botie tou̒ timongoli loluhu olimongolio, lapatao̒ yilohi-U̒ mai huta limongolio ode olemu.

¹⁰ Matilahuda-U̒ mai olimongoli deu̒ Wau̒lo Eeya Allahu Taa̒ala limongoli, wau deu̒ timongoli diila mowali molubo dedee-waalo bangusa lo Amori u lipulio pilo tibiluloa̒ limongoli masaatia botie. Bo timongoli diila loduduo̒ palentaa-U̒.’ ”

¹¹ Todulahee tuwau malai̒kati lo Eeya lonao̒ mai ode kota lo Opra, lapatao̒ lotihuhuloo̒ towalungo bungo lo terpentin, miliki lei Yoas, ngotaalio lo Kaumu Abiejer. Walai̒o tai̒lunte Gideon, donggo hemo pomolotao̒ pale totambati hepo mitodela angguru. Tio helohutu uito tuua̒ao̒-tuua̒ao̒ alihu diila oontonga taulo Midian.

¹² Malai̒kati lo Eeya boito lopo biloheo̒ batanga to olio, wau lotahuda, “Wuu, tabohulotau tamolotolo boli buheli daa̒! Eeya wolemu!”

¹³ Tametao̒ lei Gideon, “Maa̒apu, Tuani! Wonu otutu Eeya wolo mongowatotia, yilongola totoonulalo sua̒li botie helo toduo mai ode mongowatotia? Tou̒toonu totoonulalo moo̒linggolabe u mapee̒enta hepilohutu lo Eeya muloololio mai wau heilungguli linene moya lo mongowatotia pasali woloolo mola Eeya lopolualao̒ olimongolio lonto Masiri? Botia Eeya malo lolaa olo mongowatotia wau lopoluli olo mongowatotia kiluwaasa tau-tauwalo Midian.”

¹⁴ Lapatao̒ Eeya longohi mao̒ palenta botie odelei Gideon, “Wolo ngoilanggubu olootolumu ponao̒lo mota molopata taulo Isirai̒lu monto taulo Midian. Wau̒lo talolao mai olemu.”

¹⁵ Tei Gideon lolametao̒, “Yilongola watotia, yaa Eeya? Diila pongalo aakali watotia tamolopata umati lo Isirai̒lu monto okokawasa taulo Midian. Todelomo suku Manasye, kaumu lo watotiaalo talaba-labaalo molulupuhu. Wau todelomo ngaalaa̒ lo watotia olo watotiaalo talaba-labaalo diila oboliilio sama-samaata.”

¹⁶ “Tantuulo yio̒ mowali!” tahuda lo Eeya, “Sababu Wau̒lo tamaa momantumu. Tau-tauwalo Midian mamowali antuluwomu mao̒ wolo gambangi, debo odelo yio̒ bo motaalua wolo ngotaalio wambao̒.”

¹⁷ Tametao̒ lei Gideon, “Wonu watotia otu-otutuulo mao̒ aahudu lo Eeya, ambunguolo ntali wohia mai tuota tuwau deu̒ memangi Eeyaalo talongohi mai palenta boito ode watotia.

¹⁸ Watotia momolohone ambunguolo bolo potaala Eeya mohima pomao̒ teea tunggula watotia mopohinta mai ua̒alo ode Eeya.” “Ooo̒,” tahuda lo Eeya, “Wau̒ mamohima tunggula yio̒ mohualingai.”

¹⁹ Yi malo hualingolo tei Gideon tulusi lotubu batade tuwau udonggo buboto, wau lohama mopuulo kilo labu, lapatao̒ lohutu roti udiila oragi. Lapatao̒ uito tapu boito dilutulio todelomo kalanji, wau tabulio todelomo ulongo, tulusi ngoa̒amilalo boito dilelolio mai wau pilohintalio ode malai̒kati lo Eeya tadonggo yimayima towalungo bungo lo terpentin boito.

²⁰ Malai̒kati lo Eeya boito lotahuda mao̒, “Podutua mao̒ tapu wau roti boito toitaato botu botie lapatao̒ tuwata mola tabulo tapu boito ode yitaatio.” Tei Gideon malo pohutu wolo upilo malenta olio.

²¹ Lapatao̒ malai̒kati lo Eeya boito lohudu mao̒ uluu̒lio lapatao̒ wolo huudu ayu u donggo dihudihu olio tilenggulio tapu wau roti boito. Botu boito yilumai̒ta tulusi lopobu yilaahu lomola tapu wau roti boito. Lapatao̒ yilooli lomola malai̒kati boito.

²² Tei Gideon lototaa mai lou̒ tau deu̒ talonao̒ mai ode olio boito yito malai̒kati lo Eeya lohihilao. Yi wolo wohewohe malo loi̒ya tei Gideon, “Matilopotala watotia, yaa Eeya Taa Laba-labaalo molanggato! Sababu watotia malo taalua baya wolo malai̒kati lo Eeya!”

²³ Bo Eeya lotahuda ma olio, “Potiduo̒tolo mola! Diila mao̒ oohe, yio̒ diila taamate.”

²⁴ Lapatao̒ tei Gideon malomongu mesba tuwau mola teto wau longunte mao̒ “Eeya Bungo lo Moa̒ahu”. Mesba boito donggo woluo to Opra, deu̒yito-yito kota taulo Abiejer.

²⁵ Tohui boito Eeya longohi palenta odie odelei Gideon, “Hamaawa mao̒ sapi ulai̒ lipaapamu, deu̒yito-yito, sapi u mopiohe daa̒ u ou̒umulu pitu lotaunu. Longgala mao̒ mesba u bilongu lipaapamu ode Baal, lapatao̒ loloohubelo wolihi polobayahu li Dewi Asyera u tongotuali lomesba boito.

²⁶ Potihulaalo toitaato huuntua boito mesba tuwau u mairanjana lou̒ mopiohu. Lapatao̒ sapi ulai̒ boito ngoa̒amilalo, musi tumbilamu lealeaatulo mao̒ odelo bake ode Eeya. Pomakea mao̒ wolihi polobayahu li Dewi Asyera u mailoloo-hubumu boito odelo ayu podiii̒o.”

²⁷ Yi tei Gideon loluaotao̒ mopulu lota watolio tulusi lonao̒ helo ponao̒ wolo upilo malentao̒ lo Eeya olio. Bo kalana mailaba wohelio to ngaalaa̒lio wau totau-tauwala to kambungulio boito, yi tio diila buheli mohutu mao̒ sua̒li boito tou̒ dulahu. Oditolio tio lopohutu mao̒ tou̒ hui.

²⁸ Tou̒ ulipu lokota boito didimodupio mola lobongu, yi iloontonga limongolio mesba ode Baal wau wolihi polobayahu li Dewi Asyera maloloohubu. Timongolio loo̒onto olo deu̒ totambati boito mabilongulio mesba tuwau wau maa tilumbilalio olo sapi ulai̒ odelo bake.

²⁹ Malohintulo timongolio ngota timongota, “Huhutu lo tatoonu utie?” Tou̒ tiluletelio mao̒, ilodungga limongolio deu̒ tei Gideon walae̒e Yoasilo talohutu uito.

³⁰ Lapatao̒ uali mongolio odelei Yoas, “Walau̒mu tamalo longgaala mesba Baal wau lopoloohubu wolihi polobayahu li Dewi Asyera u tongotuali lomesba boito. Sababu uito, delowalo walau̒mu boito lumuala odia mai. Tio musi mate!”

³¹ Bo tei Yoasi lolametao̒ ode ngoa̒amila tahipo tehengia olio boito, “Wolo timongoli motiwambao̒ ode Baal wau ohilaa mopoduulua olio? Tatoonu tamoti wambao̒ to olio, mapateelo mate-mateelo mao̒ todulahee botie! Wonu Baal memangi Allahu Taa̒ala, huliyalo mao̒ tio lohihilao mopoduulua batangalio, sababu u yilonggala boito yito mesbaalio.”

³² Sababu tei Yoas loloi̒ya, “Lulia mao̒ Baal lohihilao moluwali olei Gideon, sababu tio malo longgaala mesbaalio,” yi anggadulo mai uito tau helo langgulao̒ olei Gideon “Yerubaa̒l”.

³³ Tou̒ boito ngoa̒amila taulo Midian, Amalek wau susuu-kuwaalo bangusa wewo tohuta ohungaya u luasi daa̒ to ambahu tiimuru lo Yordan malo tia̒mbu. Timongolio helo balanga Dutulaa Yordan, wau lotikema to Lumbaya Yijreel.

³⁴ Bo tei Gideon kiluwaasa Rohullah, tilinggula tio malohiipa mola torompeti u lotiangai tau-tauwalo kaumu Abiejer alihu mopanggala wolio.

³⁵ Tio olo helolao utolia ode suku Asyer, Jebulon, Naputali wau suku Manasye – mopio tato ambahu tiimuru meaalo tato ambahu otolopa lo Dutulaa Yordan, u lohiile olimongolio mopangala wolio. Yi timongolio ngoa̒amila lonao̒ mai helomantu olei Gideon.

³⁶ Lapatao̒ tei Gideon loloi̒ya ode Allahu Taa̒ala, “Yaa Eeya, Eeya malo tahuda mai deu̒ Eeya ohilaa momake olo watotia mopo lopato umati lo Isirai̒lu.

³⁷ Wonu memangi odito, yi toitaato huta botie, tambati lo mongowatotia u biasaalio hepo lotaa̒la pale monto panggeyangio mapilo dutua mao̒ lo watotia huhuntingo lambuto himba. Wonu loombu mola bo lambuto himba botie ubilata mai lowambulo, wau hutalio diila, yi uitolo bukutiilio deu̒ Eeya mamomake olo watotia u mopo lopato mao̒ umati lo Isirai̒lu.”

³⁸ Yi lowaliilo mola odito: Tou̒ tei Gideon lobongu loombu mola dimodupio wau lomitodeo̒ lambuto himba boito, yi lotapulio taluhu wambulo ngomanggo.

³⁹ Lapatao̒ tio loloi̒ya ode Allahu Taa̒ala, “Yaa Eeya, ambunguolo diila bolo pomuluka mai wonu watotia muli mobisala mai. Ambunguolo poluliyalo mai watotia muli mohutu mao̒ tuwaulio polo wimontala wolo huhuntingo lambuto himba botie. Bo pee̒enta botie musiilio lambuto himba wambao̒ u debo mohengu.”

⁴⁰ Tohui boito Allahu Taa̒ala lohutu mao̒ wolo upilohile lei Gideon boito, tilinggula loombu mola dimodupio lambuto himba boito lopatatai lohengu, bo hutalio malobata sababu wambulo.