MONGO HAKIMU 4 - KITABI HABARI MOPIOHE

Ti Debora wolei Barak

¹ Lapatao̒ tei Ehud yilate mao̒, bangusa lo Isirai̒lu luli ilodusa to Eeya.

² Yi Eeya lopoluli mao̒ olimongolio ilolaahe lei Yabin, olongia lo Kanaa̒n tahulo huloa̒ tokota lo Hajor. Eyanggu hilaide lo popaatealio yito tei Sisera tabilu-biluloa̒ to Haroset-Hagoyim.

³ Tei Yabin okaleta lo popaatea tio lohetuto lonto wate. Dulo pulu lotaunu mola tio helo ngawaasa taulo Isirai̒lu lou̒ diila omanusia. Lapatao̒ timongolio malo ngiibode lei̒ tulungi mai to Eeya.

⁴ Tomaasa boito taatau̒-tau̒wa to Isirai̒lu yito ngotaalio lonabi taabua tai̒lunte Debora, dile lei Lapidot.

⁵ Ti Debora biasaalio hemo tihuloa̒ to walungo bungo lohuruma, towolota lo Rama wau Betel, tomadala hihui̒-hui̒dea lo Epraim. Wau mota teteetolo tau-tauwalo Isirai̒lu lonao̒ mai helei̒ nasehati olio.

⁶ Tou̒ dulahee tuwau tio lopoa̒hu tau lotiangai olei Barak, walae̒e Abinoam, lonto kota Kedesi tomadala Naputali. Lapatao̒ tio loloi̒ya mao̒ odelei Barak, “Uti-utieelo palenta mai lo Eeya, Allahu Taa̒ala lo Isirai̒lu, olemu: ‘Ambua mao̒ mopulu lolihu lota mongo lolai̒ lonto suku Naputali wau Jebulon, wau delowalo mola timongolio ode Hui̒dee Tabor.

⁷ De Wau̒ mohutu mao̒ olei Sisera, eyanggu lo popaatea lei Yabin, monao̒ mai ode limongoli to Dutulaa Kison wolo suludadulio wau kakaa-letaalo popaatealio u moluhu olimongoli. Bo Wau̒ mamongohi olimongoli moo̒haama todelomo popaatea boito.’ ”

⁸ Tei Barak lolametao̒ oli Debora, “Wonu ito moduduo̒, watia ohilaa monao̒. Bo wonu diila, watia olo diila ohilaa monao̒.”

⁹ Ti Debora lolametao̒, “Ooo̒, wau̒ mamoduduo̒! Bo eelai mao̒, diila yio̒ tadee moo̒tapu mai hulumati. Motimbulude totaabua ngotaalo wambao̒ Eeya mamopo olaaheo̒ olei Sisera.” Yi malo monggatolo ti Debora wolei Barak ode Kedes.

¹⁰ Wau tei Barak longambu mai suku Jebulon wau Naputali ode Kedes. Talo dudua̒ olei Barak woli Debora tou̒ boito mupulu lolihu lota.

¹¹ Tou̒ boito tei Heber, ngotaalio lo Keni, malo pohalaheo̒ batanga lonto bangusaalio. (Bangusa Keni yito wali lei Hobab, wipahee Musa.) Tei Heber malonao̒ helo pohuli kekee-maalio totili bubuu-ngowaalo ayu terpentin to Jaanaim, diila molaminga monto Kedes.

¹² Lolamemeta tou̒ tei Sisera loo̒dungohe deu̒ tei Barak malonao̒ mola ode Hui̒dee Tabor,

¹³ tio malo himoa̒i tio lohetuto kaleta lo popaatealio ulonto wate boito, pee̒-pee̒enta wolo ngoa̒amila pasuukanilio tulusi lodelo olimongolio lonto Haroset-Hagoyim ode Dutula Kison.

¹⁴ Lapatao̒ uali Debora odelei Barak, “Ntali, pomjulo! Eeyaalo tamodelo olemu. Todulahee botie Tio mamongohi mai olemu u moo̒haama to olei Sisera.” Yi malo tuhuta mola tei Barak lonto Hui̒dee Tabor pee̒-pee̒enta wolo mopulu lolihu lota taulio,

¹⁵ tulusi loluhu olei Sisera. Wau Eeya malo popuuyoto ngoilanggubu pasuukani lei Sisera wau kaleta lo popaatealio, tilinggula tei Sisera lolaaheo̒ lonto kaletalio, tulusi tilumetea̒ to limbuta.

¹⁶ Tei Barak malo hilapita kakaa-letaalo popaatea wau pasuukani lomusu boito demola Haroset-Hagoyim lapatao̒ pasuukani lei Sisera boito hepilatelio yila-yilateelo mao̒; diaaluo penu boli ngotaa mao̒ tailulia hitumula.

¹⁷ Sambela uito tei Sisera maa tilumetea̒ ode kema li Yael, dile lei Heber, taulo Keni boito. Sababu ti Olongia Yabin lonto Hajor sasaa-haabatia wolo kaumu ngaalaa̒ lei Heber boito.

¹⁸ Tou̒ tei Sisera lonao̒ mai, ti Yael lolutulao̒ olio wau loloi̒ya, “Toduwolo Tuani, tuwotolo mai ode delomo kema lo watotia; diila oohe.” Yi tei Sisera tilumuwotao̒ ode delomo kema boito lapatao̒ ti Yael malo pobeleu̒tao̒ olio wolo kaingi podehu alihu tio meituuo̒.

¹⁹ Ualei Sisera odeli Yael, “Tulungia mai taluhee ngoi̒di olau̒ u yilumolo; wau̒ motoa̒ango.” Yi ti Yael malo muo̒ bututu lowalito, tambati hepolahuala susu, tulusi longohi mao̒ minumani odelei Sisera, lapatao̒ luli lolau̒beo̒ wolo kaingi podehu.

²⁰ Lapatao̒ tei Sisera loloi̒ya mao̒ odeli Yael, “Ponao̒lo mota timihulao̒ totalu huhebu lokema. Wonu tau monao̒ mai wau mohintu mao̒ olemu wolo woluo tau tewe, polelea mao̒ diaaluo.”

²¹ Tei Sisera odito wongolio tilinggula tio modiduto daa̒ tulusi leinuloto. Ti Yael lohama mao̒ duuduo̒ tuwau wau patoa̒a ngoputu ode kema, tulusi wolo poo̒-poo̒oyo tio lohimbideo̒ olei Sisera. Lapatao̒ tio lopo lantongao̒ patoa̒a boito ode delomo pambilingalio tunggula lolaapata ode huta. Odi-odieelo mola ti Yael lomate olei Sisera yila-yilateelo mao̒.

²² Tou̒ tei Barak lonao̒ mai mololohe olei Sisera, ti Yael lolutulao̒ olei Barak wau loloi̒ya mao̒ olio, “Dulo, wau̒ mamopo bilohei olemu taa u helolohumu boito.” Tei Barak tilumuwotao̒ woli Yael, lapatao̒ loo̒onto olei Sisera mailate, leibalata tohuta wolo patoo̒ lokema leilantongo todelomo pambilingalio.

²³ Todulahee boito Eeya longohi mai totaulo Isirai̒lu loo̒haama to olei Yabin, olongia taulo Kanaa̒n.

²⁴ Ti olongia boito helebe hihiiheo mao̒ helebe hedeehe taulo Isirai̒lu tunggula pulitio tio bilinasa.