MONGO HAKIMU 21 - KITABI HABARI MOPIOHE

Mongo dulahu tapilohetu u lowali dile lotau lei Benyamin

¹ Tou̒ taulo Isirai̒lu hia̒mbua to Mispa, timongolio malodanti ode Eeya deu̒ diaaluo penu boli ngotaa mao̒ lonto walai̒ mongolio mongo dulahu taluasialio mowali dile tau lei Benyamin.

² Botia timongolio lonao̒ mota ode Betel wau hihuloa̒ hisuukalia tunggula hui totalu lo Eeya. Timongolio hehiyonga wau hipo ngiibode,

³ “Yaa Eeya, Allahu Taa̒ala lo Isirai̒lu, yilongola ngoa̒amila botie musi motoduo mai? Suku Benyamin, tala tuwau suku bangusa lo mongowatotia, membideo̒ mopulito!”

⁴ Loloombulio mola, didimodupo daa̒, umati lo Isirai̒lu lopo tihulao̒ mesba tuwau mota teto, lapatao̒ helo podewo ode Eeya bake yilalango wau bake lo polodame.

⁵ Lapatao̒ timongolio helo tulete susuu-kuwaalo bangusa lo Isirai̒lu wolo woluo tadiila lonao̒ lotia̒mbu helotaalua wolo Eeya to Mispa omoo̒omolu. (Tou̒ boito timongolio malo tadia deu̒ taa udiila modungohe titiango ode Mispa musi hukuu-maniyolo mate.)

⁶ Umati lo Isirai̒lu helodehu hilao tomongo wutati mongolio suku Benyamin; timongolio malo loi̒ya, “To dulahee botie Isirai̒lu oolia tala tuwau losukulio.

⁷ Ito musi mohutu mao̒ wolo alihu tau lei Benyamin tai̒lo labita botie mowali odile, sababu ito malo tadia ode Eeya deu̒ ito diila tamopo luasi mongo walao̒nto tadulahu mowali dile taulo Benyamin?”

⁸ Yi timongolio helo tulete wolo woluo nopolemboa̒ lonto suku bangusa lo Isirai̒lu tadiila lonao̒ lotia̒mbu to Mispa. Wau timongolio loo̒dungga deu̒ lonto tau-tauwalo Yabesh to Gilead, diaaluo penu boli ngotaa mao̒ tamalonao̒ mola ode Mispa.

⁹ Sababu, tou̒ pilalakisa daputali owoluo, malo patatai diila ilodungga mota teto penu boli ngotaa mao̒ talonto Yabesh.

¹⁰ Masababu uito, taa u hia̒mbua to Betel boito lolao mopulaa dulo lihu lota tahi buheelia daa̒ towolota limongolio u lomate yila-yi lateelo mao̒ timii̒du tau to Yabesh, leituwoto mongobua wau tau̒kekeei̒.

¹¹ Timongolio pilalentaalio helomate yila-yilateelo mao̒ ngoa̒amila mongo lolai̒, wau olo timii̒du mongobua tadiilalo tadulahu.

¹² Yi towolota lotau-tauwalo tahi biluloa̒wa to Yabesh boito, timongolio loo̒dungga wopato hetuto lota tadonggo tadulahu. Timongolio malodelo mongo dulahu boito ode pilo tikema to Silo u dudutuulio tolipu lo Kanaa̒n.

¹³ Lapatao̒ ngoilanggubu umati lo Isirai̒lu helolao mola utolia ode tau-tauwalo lei Benyamin tawoluo to huhuu-iduwaalo botu to Rimon u lohile lodaamea.

¹⁴ Masababu uito tau-tauwalo lei Benyamin boito luli lohualingai, lapatao̒ umati lo Isirai̒lu helohudu olimongolio mongo dulahu lonto Yabesh tadiila ilopatealio yila-yilateelo mao̒ boito. Bo jumulaa lomongo dulahu boito diila lotuuheta ode tau-tauwalo lei Benyamin boito.

¹⁵ Umati lo Isirai̒lu helodehu hilao totau lei Benyamin, sababu Eeya malo potiyomo ootuwau lo susuu-kuwaalo bangusa lo Isirai̒lu.

^16-18 Sababu uito, tahimuloa lo ulipu tahia̒mbua to Betel boito loloi̒ya, “Todelomo suku Benyamin diilalo omongobua. Bo, bolomao̒ pongoola; ito diila mowali mopoluasi mongo walao̒nto tadulahu monika woli mongolio, sababu ito malotadia deu̒ timii̒du taa monto wolotanto diila mopoluasi walai̒o tadulahu monika wolo ngotaalio lei Benyamin! Oditolio, wolo umusi pohutuwonto ode limongolio tai̒lo labita botie alihu timongolio mowali odile taabua olo? Diila bolo Isirai̒lu oolia tala tuwau lo opulaa dulo sukulio. Ito musi mololohe dalalo alihu suku Benyamin mowali owali wawaalia mola wau debo motolo miliki ngoilanggubu hutalio.”

¹⁹ “Odie,” uali mongolio, “woluo dalala tuwau, deu̒yito-yito tou̒ lameyangi timii̒du taunu ode Eeya to Silo.” (To ambahu huliaalio lo Silo botie woluo kota Betel, wau to ambahu otolopalio woluo dalala daa̒ lo Betel ode Sikhem, hiambola to ambahu tilayolio woluo kota Lebona.)

²⁰ Yi tahidihima pantungo polo dunggaya to Betel boito loloi̒ya ode tau-tauwalo lei Benyamin tai̒lo labita boito, “Ponao̒lo mola timongoli potituuo̒ to ii̒i-lengiyalo angguru to Silo,

²¹ wau potidaha-dahaalo mota teto. De wonu mongo dulahu lo Silo lumualai u mongelungo ngotilonggadu lameyangi timii̒du taunu ode Eeya, yi timongoli musi lumualao̒ lonto ii̒i-lengiyalo angguru boito. Lapatao̒ ngota-ngota musi moheu̒upao̒ tadulahu ngota towolota limongolio wau mopotetea̒ ode madala lei Benyamin u powaliyola dilemu.

²² Wonu tiyamo meaambo wutatio talolai̒ monao̒ mai mohile wolo moo̒ohuu̒ olio, yi timongoli mowali moloi̒ya mao̒, ‘Harapuo lamiaatia, poluliyalo mao̒ timongolio to olamiaatia. Amiaatia diila lolambata olimongolio todelomo popaatea. Wau sababu timongoli diila lohudu mai olimongolio ode lamiaatia, yi timongoli diila lolambanga danti, oditolio diila ototala.’ ”

²³ Yi tau-tauwalo Benyamin boito helo pohutu wolo uiloiya mao̒ ode limongolio. Timongolio ngota-ngota helo potetea̒ tadulahu ngota towolota lomongo dulahu tahipo ngelungaawa to Silo. Lapatao̒ timongolio luli lohualinga mola ode madala limongolio lohihilao wau luli lomongu kotalio tulusi lotitatapu mola teto.

²⁴ Tau-tauwalo Isirai̒lu uwewolio boito olo malo monggata olo. Timongolio luli lohualinga mola ode huta miliki limongolio todelomo madala limongolio ngota-ngota, lodudua̒ kaumu wau sukulio.

²⁵ Tojamani boito dipooluo olongia to Isirai̒lu. Ngota-ngota hipohutua wolo u anggapuolio otutu.