MONGO HAKIMU 18 - KITABI HABARI MOPIOHE

Tei Mikha wau suku Dan

¹ Tou̒ boito to Isirai̒lu diila o olongia. Suku Dan donggo hemo lolohe lipu u mowali madala limongolio, sababu timongolio olo diipo heloo̒tapu huta wolo susuu-kuwaalo wewolio todelomo bangusa lo Isirai̒lu.

² Sababu uito timongolio helo lulaotao̒ limolota tahi buheelia towolota lo ngoa̒amila kaumu todelomo suku limongolio tahi biluloa̒wa to Jora wau Esytaol, lapatao̒ longohi mao̒ tuugasi to talimo lota boito mola lotulete lipu boito. Yi malo monggatolo tau-tauwala boito, wau leidungga mola tomadala hihui̒-hui̒dea tomadala lo Epraim. Mola teto timongolio lotihui tobele lei Mikha.

³ Tou̒ timongolio matumuwotao̒ ode bele boito ilodungohe limongolio taa bohulotau boito hemobisala wau iloonuhe limongolio lapaalio. Oditolio, timongolio lotahudeo̒ olio wau helohintu mao̒, “Yilongola yio̒ tewe? Wolo ulusanimu? Tatoonu talodelo mai olemu?”

⁴ Taa bohulotau boito lolametao̒, “Watia tewe sababu tei Mikha. Tiolo talo mudua̒ao̒ olaatia lowali iimamulio, wau longohi wuupa olaatia.”

⁵ Lapatao̒ uali mongolio ode olio, “Wonu odito, tulungii mao̒ yintua mola ode Allahu Taa̒ala wolo nonao̒ lami botie otilapulo meaalo diila.”

⁶ Tametao̒ li iimamu boito, “Diila tapolawalo. Eeya malo balakati mai nonao̒ limongoli botie.”

⁷ Lapatao̒ uito malo monggatolo talimo lota boito tulusi lonao̒ ode Lais. Mota teto hepiloo̒ tuotao̒ limongolio ulipulio. Malo ilaalo deu̒ dudelo tutumulo ulipu lo Lais boito debo odelo dudelo tutumulo bangusa lo Sidon. Eleponu timongolio tihitihi mola wau molaminga monto bangusa lo Sidon, timongolio hitumula aamani wau tantaramu, diila omusu, maa̒amulu, wau diila okuulangia penu boli u hitua-tuawua.

⁸ Tou̒ talimo lota boito luli lohualinga mola ode tau-tauwalo ngosuku wolio to Jora wau Esytaol, timongolio hepilo hileyalio lapuurani.

^9-10 Timongolio olo loloi̒ya mao̒, “Dulo ito moluhu Lais. Ami malonao̒ mola odito, wau loo̒onto deu̒ hutalio mopiohu, luasi wau maa̒amulu, ngoa̒amilalo woluo. Diila bo potitatapu wambai̒o tewe wau diila tamohutu wolo-wolo. Aliheo̒olo mola odito wau mohama lipu boito. Timongoli mamoo̒ dungga deu̒ ulipulio sama-samaata diila molantobu u mamoluhu olimongolio. Ami yakini deu̒ Allahu Taa̒ala malongohi mai lipu boito ode limongoli.”

¹¹ Sababu uito, pomonggatolo monto Jora wau Esytaol wolomo hetuto lota suku Dan. Wolo tingolo u wimu-wimumuto,

¹² timongolio monao̒ ode wimbihu otolopa lo Kiryat-Yearim tomadala lo Yehuda tulusi motikema mota teto. Uitolo sababuulio tambati boito donggo unte-unte Pilotikemawa lo Dan.

¹³ Mola lonteeto timongolio lonao̒ tulusi ode madala hihui̒-hui̒dea lo Epraim demola bele lei Mikha.

¹⁴ Olimo lota tatilugasia motulete lou̒ poo̒-poo̒oyo omoo̒omolu yilao boito loloi̒ya ode mongo sahabatilio, “Wolo otaawa limongoli deu̒ tala tuwau lobele boito obui̒ uwolu-wolude talaa̒? Woluo olo bubuu-iyaalo wewo wau boo̒ li iimamu. Nte pikiilangia mola wolo umusi pohutuonto.”

¹⁵ Lapatao̒ timongolio lonao̒ mota ode bele lei Mikha, tambati upilo tibiluloa̒ tabohulotau lo Lewi boito, wau helohintu owowoluwoalio.

¹⁶ Tou̒ boito tao̒lomo hetuto lota pajule losuku Dan, tao̒ tingolo uwimu-wimumuto boito donggo hitihula totalu lohunebu hulubangi.

¹⁷ Olimo lota tatilugasia motulete lou̒ boito lato tilumuwotao̒ ode delomo bele, lapatao̒ helohama bui̒ lo ayu uwolu-wolude talaa̒ boito pee̒-pee̒enta wolo bubuu-iyaalo wewolio, wau epod. Tabohulotau lo Lewi boito donggo tihutihula wolo olomo hetuto pajule boito tohuhebu hulubangi.

¹⁸ Tou̒ talimo lota boito tilumuwotao̒ ode bele lei Mikha wau helohama boo̒ li iimamu wau bubuu-iyaalo balaahala boito, yi tabohulotau lo Lewi boito lohintu mao̒, “Wolo upilohutu limongoli botie?”

¹⁹ Timongolio lolametao̒, “Poo̒oyo mola! Diila mao̒ pohintu. Tumbao̒ poduduo̒lo mai wolami, de yio̒ mowali iimamu wau tamoo-nasehatia olami. Lou̒ mowali iimamu to ngaalaa̒ tuwau wambai̒o, lebe mopioheo̒ mowali iimamu tosuku tuwau!”

²⁰ Tabohulotau lo Lewi boito sanangi wolo nasehati boito. Oditolio, tio malohama boo̒ li iimamu wau bubuu-iyaalo balaahala boito tulusi lodudua̒ woli mongolio.

²¹ Lapatao̒ ngopolemboa̒ tau boito lopo tolonga mola nonao̒ limongolio, tilolode lo tau̒kekeei̒, bibiahu wau babaa-langiyalo limongolio.

²² Tou̒ timongolio malo lamingaa mota, tei Mikha helo tiangao̒ mongo tiheedio lapatao̒ pee̒-pee̒enta woli mongolio lohilapita mota totau-tauwalo suku Dan boito. Tou̒ malembideo̒ woli mongolio,

²³ tei Mikha wau tahidudua̒ olio boito helo nguatia̒ao̒ olimongolio. Tau-tauwalo suku Dan boito lomilohei wau malohintu olei Mikha, “O wolo? Yilongola lonao̒ mai wolo taa odito daatalio?”

²⁴ Tei Mikha lolametao̒, “Timongoli malo potetea̒ bubuu-iyaalo lowatia wau iimamulio, tilinggula watia diilalo owolo-wolo, lapatao̒ timongoli helo loi̒ya, ‘O wolo!’ ”

²⁵ Ualo tau-tauwalo suku Dan boito, “Lebe mopiohe moheu̒tao̒ tunggilo; diila bolo tau-tauwala botie mamoingo tulusi moluhu olemu. De yio̒ wau ngoa̒amila ngaalaa̒mu mate.”

²⁶ Lapatao̒ loloi̒ya mao̒ odito, tau-tauwalo suku Dan boito lopo tolonga mola nonao̒ limongolio. Tei Mikha loo̒onto deu̒ timongolio lebe molotolo daa̒ wolio, sababu uito tio luli lobale tulusi lohualingo.

^27-28 Lapatao̒ tau-tauwalo suku Dan boito lopoteteo̒ oli iimamu boito wau babaa-langiyalo u hepo hunaalo moibadati upilohutu lei Mikha boito, timongolio mola loluhu Lais, kota ulipulio hitumula aamani wau dame. (Kota boito dudutuulio todelomo lumbaya tuwau wolo kota Bet-Rehob). Tau-tauwalo Dan boito helomate yila-yilateelo mao̒ ngoa̒amila ulipu lo Lais lapatao̒ lolumbila kota boito. Diaaluo talonao̒ mai helo tuulungi totau-tauwalo Lais boito sababu tambati limongolio tihitihi wau molaminga monto Sidon. Lapatao̒ uito tau-tauwalo Dan luli lomongu mao̒ kota boito tulusi lotibiluloa̒ mola teto.

²⁹ Tanggulo kota boito bilolio̒ limongolio lowali Dan, lodudua̒ao̒ tanggulo tiyamo loluuhuru limongolio, deu̒yito-yito tei Dan walae̒e Yako.

³⁰ Bui̒ balaahala udilelo mai limongolio boito, pilotihuli mongolio tokota boito lapatao̒ lomudua̒ao̒ olei Yonatan, walae̒e Gersom, wombu lei Musa, lowali iimamu limongolio. Wali mai lei Gersom botie debo lowali iimamu losuku Dan boito tunggula maasa umati lo Isirai̒lu bilintai̒o wau pilolayahu ode lipu wewo.

³¹ Bui̒ balaahala upilohutu lei Mikha boito debo to Lais ngotilonggadu Kema lo Eeya woluo to Silo.