MONGO HAKIMU 16 - KITABI HABARI MOPIOHE

Tei Simson to Gasa

¹ Todulahee tuwau tei Simson lonao̒ mola ode Gasa. Mola teto tio lodunggaya wolo tasuuntali ngota lapatao̒ tio lotuluhu wolo taabua boito.

² Yi ulipu lo Gasa loo̒dungohe deu̒ tei Simson woluo mola teto. Oditolio, timongolio malomala tambati boito wau helohima olio ilo-iloonua to hulubangi lokota. Bo timongolio diila helohutu wolo-wolo tou̒ hui boito sababu to pikiilangi mola limongolio, “De wonu bolo dulahee mobutu mai, bolo ito momate olio mate-mateelo mao̒.”

³ Bo tei Simson diila lotuluhe teto tunggula dimodupo. Tomutaa̒ lou̒ hui tio malobongu tulusi lonao̒ ode huhebu hulubangi lokota. Tio helo mahuta ngoa̒amila huhebu boito wolo wowoo-lihiyalo wau papaa-langiyalo pee̒entalo mao̒. Lapatao̒ bilintai̒o huhebu boito toitaato binggungio, wau dilelolio ode balitutuo̒ huludu to ngotuali lo Hebron.

Tei Simson woli Delila

⁴ Lapatao̒ uito tei Simson ilohilao totaabua ngota lonto Lumbaya Sorek. Tanggulo taabua boito Delila.

⁵ Yi malonao̒ mai limo lota tahi kawasawa lo Pilistin ode taabua boito wau loloi̒ya, “Piyowa mao̒ tei Simson alihu tio mohuto mopoo̒taa mai olemu wolo u hulihuli to lotolio, wau woloolo mola dudelolio mopohinggi mao̒ lotolio boito. Lou̒ odito ami mowali monao̒ mai wau momungu olio u mopoo̒laahe olio. De ami ngota-ngota mamongohi mai olemu ngolihu wau ngohetuto pita doi talaa̒.”

⁶ Yi uali Delila odelei Simson, “Simson, wolo sababuulio malo odito lotolumu? Mamusi punguwola loolo yio̒ alihu mooli lotolumu boito? Nte polelea mai u hehuliyomu boito!”

⁷ Tei Simson lolametao̒, “Wonu wau̒ punguwola wolo pitu lopata tali lobuutio̒ bohu udiipo botie mohengu daa̒, wau̒ mamo lupuhu wau mowali debo odelo taa biasa.”

^8-9 Lapatao̒ tahi kawasawa lo Pilistin boito helongohi mao̒ odeli Delila pitu lopata tali lobuutio̒ bohu udiipo boti mohengu daa̒. Lapatao̒, tou̒ taulo Pilistin donggo hiwimawa tohuwali leidaa̒ uwewo, ti Delila malomungu olei Simson wolo tataa-liyaalo boito lapatao̒ longiibodu, “Simson! Yi taulo Pilistin malonao̒ mai!” Tei Simson hua̒a lomunto mao̒ tataa-liyaalo buutio̒ boito. Tataa-liyaalo boito lobunto debo odelo pitolo ulobunto ilotuhata lotulu. Rahasia olootolo lei Simson diipo lohuo̒.

¹⁰ Lapatao̒ uali Delila odelei Simson, “Aa, yio̒ mohimbulo! Yio̒ bo mopoitohe olau̒. Ntali wunggulia mai olau̒ puguwola loolo yio̒ bolo opunguwa!”

¹¹ Ualei Simson, “Wonu wau̒ punguwola wolo tali bohu udiipo pee̒enta mao̒ pilomake, yi wau̒ mamo lupuhu wau mowali debo odelo taa biasa!”

¹² Tou̒ taulo Pilistin donggo hiwimawa tohuwali leidaa̒ wewo, ti Delila malohama ngolo pata tali ubohu, lapatao̒ lomungu olei Simson. Lapatao̒ tio longiibodu, “Simson! Yi taulo Pilistin malonao̒ mai!” Bo tei Simson malomunto tataa-liyaalo boito lonto uluu̒lio debo odelo tahe lomunto pitolo.

¹³ Lapatao̒ uali Delila odelei Simson, “Aa, yio̒ debo hemo poitohe olau̒ poli. Yio̒ mohimbulo. Ntali wunggulia mai de punguwola loolo yio̒ bolo mowali punguwola!” Tei Simson lolametao̒, “Wonu pitu lopau̒ huwou̒uu̒ tulapidulo topitolo to pakaakasi posujiyalo, lapatao̒ awadulo to ayu pakaakasi posujiyalo boito, yi wau̒ mamo lupuhu wau mowali debo odelo taa biasa!”

¹⁴ Yi ti Delila lohutu mao̒ olei Simson leituluhu lapatao̒ tio helo tulapideo̒ pitu lo tulapide huwoi̒o lei Simson topitolo to pakaakasi posujiyalo. Lapatao̒ uito tio longawadeo̒ to ayu pakaakasi posujiyalo boito tulusi longiibode, “Simson! Taulo Pilistin malonao̒ mai!” Tei Simson olo malobongu tulusi lomantanga huwoi̒o tunggula lolopata lonto pakaakasi posujiyalo boito.

¹⁵ Lapatao̒ uali Delila olio, “Aa, hepolelemu wau̒ ilohilaamu lebe-lebe pomao̒ hilaamu hala-halaahu monto olau̒! Mapoo̒otolu yio̒ hemo poitohe olau̒, wau dilumutu botia olo yio̒ debo diila mohuto mopoo̒taa mai deu̒ yilongola malo odito lotolumu.”

¹⁶ Timii̒du dulahu ti Delila tulusi wambao̒ hemo tihidi wau hemohuntulo, tilinggula tei Simson malotolu lodungohu olio.

¹⁷ Pulitio mailungguli lei Simson u hehuliolio, “Huwou̒uu̒ diipo pee̒enta mao̒ hiluntinga,” ualei Simson. “Wau̒ mailudulio ode Allahu Taa̒ala lowali tolomodu milikii-Lio. Tumulalo mao̒ wau̒ pilotutulio mai wau̒ malowali ngotaalio lo Najiri. Wonu huwou̒uu̒ huntingalo yi lotoluu̒ mamooli; wau̒ mamowali molupuhu debo odelo taa biasa.”

¹⁸ To pongolaasa li Delila deu̒ tei Simson malo poo̒taa olio u hulihuli to hilaalio. Sababu uito tio lolao habari botie ode tahi kawasawa lo Pilistin. “Ponao̒lo mai pee̒entapo botie. Tei Simson malo hungguli u hehuliolio to olau̒.” Timongolio olo lonao̒ mai lodelo doi odeli Delila.

¹⁹ Lapatao̒ uito ti Delila helo leyaapu mao̒ olei Simson tunggula tei Simson leituluhu to bungolopalio, tulusi tio lotiangai tau wau lei̒ huntingao̒ pitu lo tulapide huwoe̒e Simson. Lapatao̒ tio helo posikisa olei Simson, sababu tei Simson maa iloolia lo olootolio.

²⁰ Lapatao̒ tio longuatio̒, “Simson! Taulo Pilistin malonao̒ mai!” Yi tei Simson malobongu wau to lantobio deu̒ tio moo̒lahi debo odelo tou̒ yilaalu mao̒. Diila otaawalio deu̒ Eeya malo lolaa olio.

²¹ Yi tau-tauwalo Pilistin malo heu̒upa olio wau helo luo̒ohe botu lomatolio. Timongolio lodelo olio ode Gasa wau helomungu olio wolo dulo lante tombaha, tulusi lopo tuwoto olio ode delomo tutupa. Mola teto tio ilhulalio helo hilingo.

²² Bo ngotilonggadu uito olo huwoi̒o muli hemobutu mai.

Opopate lei Simson

²³ Todulahee tuwau tahi kawasawa lo Pilistin loa̒mbua ohilaa mohutu potihunggu wau mopodewo bake lou̒ uda-udaa̒alo mao̒ ode Dagon, dewa limongolio. Timongolio helo polahu mola, “Dewanto malongohi olanto u loo̒haama to olei Simson, musunto!”

^24-25 Tou̒ timongolio donggo hiweengahe timongolio loloi̒ya, “Delowa mai tei Simson odia mai alihu tio mowali poi̒ii̒yanto!” Yi hilama mai limongolio tei Simson lonto tutupa, wau tio hepiloi̒ii̒ya limongolio. Timongolio lopoa̒hu olio tilimihulao̒ towolota lo wolihi duluo uleidaa̒. Tou̒ tadadaata boito loo̒onto mao̒ olei Simson, timongolio malomuji Dagon wau helo polahu mola, “Dewanto malongohi mai olanto u loo̒haama tomusu tamalo ngantulu lipunto wau helomate yila-yilateelo mao̒ taunto odito daatalio!”

²⁶ Ualei Simson ode walao̒ talolai̒ talo dedeea̒ olio, “Hulii mai uluu̒uu̒ alihu wau̒ mowali modihu wowoo-lihiyaalo u hetumude tohudungu botie, sababu wau̒ ohilaa motidenela teto.”

²⁷ Hudungu boito polupolu daa̒ wolo tau. Olimo lota tahi kawasawa lo Pilistin woluo olo teto. Wau to belebelea toitaato lohudungu woluo tanu tolo lihu lota. Timongolio ngoa̒amilalo hibilohe mai wau hipo soseroa olei Simson.

²⁸ Tou̒ boito tei Simson malodua̒; tio loloi̒ya, “Yaa, Eeya Taa Laba-labaalo molanggato, pohileaala dua̒ Eeya moe̒elai olo watotia. Ambunguolo muli wohia mai lotolo watotia bo pee̒enta botie wambao̒, yaa Allahu Taa̒ala, alihu wolo huhutu botie watotia moo̒tuli mao̒ to taulo Pilistin tahe loluo̒ohe mato lo watotia duuduluo.”

²⁹ Lapatao̒ uito tei Simson lodihu mao̒ dulo wolihi u hitumude tohuungo hudungu boito. Lapatao̒ sambela helo titumudeo̒ wolo uluu̒lio oloihi towolihi tuwau wau uluu̒lio olowala towolihi uwewo,

³⁰ tio malo ngiibode, “Ambunguolo poluliyalo mai watotia mateelo pee̒-pee̒enta wolo taulo Pilistin botie!” Wau wolo lotolio u tio̒otutua tio helo huntude wowoo-lihiyaalo boito tunggula loloohubulo mola wau heloo̒ deehe limo lota tahi kawasawa lo Pilistin pee̒-pee̒enta wolo ngoa̒amila taa wewolio tawoluo teto. Tei Simson yilate olo. Bo, tou̒ opopatelio boito tio malomate lebe dadaata tau yila-yilateelo mao̒ tou̒ tio donggo tumutumulo.

³¹ Lapatao̒ malonao̒ mai mongo pohutatalio wau ngoa̒amila kaumu ngaalaa̒lio mai lohama milatelio. Dilelo limongolio lohualingo milatelio boito, wau lolobungao̒ tokuubulu lei Manoah, tiyamolio. Kuubulu boito dudutuulio towolota lo Jora wau Esytaol. Tei Simson lowali tau̒wa lo Isirai̒lu dulo pulu lotaunu mola hiheolio.