MONGO HAKIMU 15 - KITABI HABARI MOPIOHE

¹ Dengolo wakutu mola lapatio mao̒, tou̒ sembo lopale, tei Simson mota lobiilohe wolo dilelio. Tio lodelo mota batade buboto tuwau ode dilelio boito. Tei Simson maloloi̒ya ode tiyamo moluhengio, “Watia ohilaa ode huwali modunggaya wolo dile lowatia.” Bo tiyamo moluhengio diila lopoluasi olio.

² Ualio mao̒ odelei Simson, “To lantobuu̒ yio̒ otu-otutuulo mao̒ molonuo̒ olio, oditolio, tio mailuduu̒ ode sahabatimu. Bo yio̒ mowali mohama mao̒ tawali-yaliilio. Tio lebe gaaga.”

³ Yi malo loi̒ya tei Simson, “Wolo u mapohutuo lowatia ode taulo Pilistin pee̒enta botie, diila totala lowatia!”

⁴ Lapatao̒ tio lonao̒ helo heu̒paa tolo hetuto apula lo oa̒ayua. Patahu apula lo oa̒ayua boito hetilihutio ngopa-ngopanggalo. Tohutulo lotiihuta boito, tio helo podutu mao̒ morongo tuwau.

⁵ Lapatao̒ uito tio lopo lei̒itao̒ momoo-rongowalo boito tulusi helomuli mao̒ aa̒a-pulaalo oa̒ayua boito ode delomo hahaa-laboluwalo taulo Pilistin. Yi malo pobulo mola ngoa̒amila pale umaa ilotolio mola teto. Tumbao̒ pilomulo pale wau ii̒i-lengiyalo angguru olo lodudua̒ lopobu lotulu.

⁶ Tau-tauwalo Pilistin mota lotulete mao̒ malo tatoonu tahelohutu sua̒li boito. Lapatao̒ piloo̒taa mao̒ lotau olimongolio deu̒ tei Simsonilo tamalohutu uito, sababu tiyamo moluhengio to Timna malohudu mao̒ dile lei Simson ode ngotaalio lo sahabati lei Simson. Sababu uito tau-tauwalo Pilistin lolumbilao̒ taabua boito wau ngotuango bele lipaapalio tilinggula yilaahulo mola.

⁷ Lapatao̒ ualei Simson ode tau-tauwalo Pilistin boito, “Oo, mao̒dito dudelolio timongoli mopohutu mao̒? Watia motadia mai deu̒ watia diila tamoti poo̒oyo wonu diipo obaalasia mai lowatia sua̒li botie toli mongoli!”

⁸ Lapatao̒ tio malohutu olimongolio wolo diila omanusia wau helomate yila-yilateelo mao̒ dadaata towolota limongolio. Lapatao̒ uito, tio lonao̒ lapatao̒ lotibiluloa̒ todelomo gowa tohuludu botu tuwau to Etam.

Tei Simson lopoo̒laahe taulo Pilistin

⁹ Yi taulo Pilistin lonao̒ mai ode madala lo Yehuda lapatao̒ lotikema mota teto, tulusi heloluhu kota Lehi.

¹⁰ Taulo Yehuda lohintu mao̒ to taulo Pilistin, “Yilongola timongoli heloluhu olami?” Timongolio lolametao̒, “Ami lonao̒ mai moheu̒pa olei Simson alihu ami mowali mopohutu mao̒ olio debo odelo u hepilo hutulio olami.”

¹¹ Loo̒dungohe uito, malonao̒lo tololihu lota taulo Yehuda ode gowa tohuludu botu to Etam. Mola teto timongolio loloi̒ya mao̒, “Simson, wolo diila otaawamu deu̒ taulo Pilistin okawasa to olanto? Wolo utie umaa pilohutumu to olami!” Tei Simson lolametao̒, “Watia bo momaalasi wolo u hepilohutu limongolio olaatia.”

¹² Uali mongolio mao̒, “Ami lonao̒ mai momungu wau mohudu olemu ode taulo Pilistin.” Tei Simson loloi̒ya mao̒, “Podantiyapo deu̒ timongoli lohihilao diila tamomate olaatia mate-mateelo mao̒.”

¹³ “Ooo̒,” uali mongolio, “Memangi ami bo ohilaa momungu wau mohudu olemu ode taulo Pilistin. Ami diila tamomate olemu mate-mateelo mao̒.” Lapatao̒ timongolio malomungu olio wolo tali dulopata u donggo bohu, wau lodelo olio lonto gowa boito.

¹⁴ Tou̒ tei Simson dilelolio demola Lehi, tau-tauwalo Pilistin tilumetea̒i ode olio wau helo hantia̒a olio. Debolo tio malowali lolotoolai wolo kawasa lo Eeya. Tataa-liyaalo u lomungu uluu̒lio hebiluntolio odito wambai̒o debo odelo tali boito tali u malopobu.

¹⁵ Lapatao̒ tio loo̒dungga tulalo wale tuwau lokolodai udonggo bohu. Tio lohama mao̒ tulalo boito, lapatao̒ pilomakelio helomate ngolihu lota tunggula yilate.

¹⁶ Yi malo polahu mola tei Simson, “Wolo wale lokolodai pilateu̒ ngolihu lota; wolo wale lokolodai hiluntuu̒ mimii-lateyaalo limongolio.”

¹⁷ Lapatao̒ uito tilapilio tulalo wale boito. Uito sababuulio tambati boito iluntee Ramat-Lehi.

¹⁸ Lapatao̒ tei Simson molaasa mototoa̒nga daa̒, tunggula tio longiibode to Eeya, tio loloi̒ya, “Eeya, boheli Eeya longohi olo watotia botie u loo̒haama. Botia wolo watotia mamusi mate mototoa̒ngo, tunggula wau̒upo lotau-tauwalo Filistin botie tadiila motota lo Eeya?”

¹⁹ Yi Allahu Taa̒ala lomuo̒ huwango tohuludu botu to Lehi boito, tulusi yilumualai taluhee lonteeto. Tei Simson malongilu, tulusi luli ilolulia lomola hilaalio. Uito sababuulio butu lotaluhu boito ilunte Butu lo Taluhu Hakor. Butu lotaluhu botie donggo woluo to Lehi.

²⁰ Dulopulu lotaunu mola hiheolio tei Simson tau̒-tau̒wa to umati lo Isirai̒lu tou̒ timongolio kiluwaasa taulo Filistin.