MONGO HAKIMU 14 - KITABI HABARI MOPIOHE

Tei Simson wau ngotaalio tadulahu lonto Timna

¹ Tou̒ dulahee tuwau tei Simson lonao̒ ode Timna, wau loo̒onto ngotaalio tadulahu lo Pilistin mola teto.

² Lapatao̒ tio lohualingo wau loloi̒ya mao̒ ode mongo dulaa̒lio, “Watia motohilaa to ngotaalio tadulahu lo Pilistin to Timna. Pohile laatia ti paapa woli maama mola motolo-balango olio.”

³ Bo mongo dulaa̒lio loloi̒ya mao̒, “Yilongola musi monao̒ mola ode taulo Pilistin u poo̒tapulalo dile, hiambola timongolio diila tuwotuwoto umati lo Allahu Taa̒ala? Wolo todelomo kaumunto lohihilao meaanto towolota ngoilanggubu bangusaanto diaaluo ngotaalio tadulahu tamotuuu̒de?” Tametao̒ lei Simson ode liyamolio, “Bo tadulahu lo Pilistin boitolo tao̒tohilaa laatia. Wau watia mohalapu tipaapa mohuto motolo balango olio ode laatia.”

⁴ Mongo dulaa̒ lei Simson diila motota deu Eeyaalo talohutu olei Simson u lohutu mao̒ sua̒li boito. Sababu Eeya donggo hemololohe potala ohiyango u moluhu taulo Pilistin. To wakutu boito taulo Pilistin mongawaasa taulo Isirai̒lu.

⁵ Yi malonao̒olo tei Simson ode Timna pee̒-pee̒enta wolo mongo dulaa̒lio. Tou̒ timongolio donggo hilaode to ilengi lo angguru ngopita, tei Simson lodunggaya wolo singa buboto tuwau. Singa boito donggo hemo heuwanga,

⁶ wau debolo tei Simson malo lotolo lomola wolo kawasa lo Eeya. Lapatao̒ tio helo nganta-ngantangao̒ singa boito wolo uluu̒lio, debo odelo binatangi boito bo batade tuwau wambai̒o. Sua̒li boito diila yilunggulilio tomongo dulaa̒lio.

⁷ Lapatao̒ tei Simson mota lobiilohe wolo tadulahu boito wau helo bibiisalawa wolio, wau tei Simson ohilaa olio.

⁸ Lapatao̒ dengolo wakutu mola hiheolio, tei Simson luli lonao̒ mola lonika wolo tadulahu boito. Todelomo nonao̒olio boito, tio lobale u lomilohe pate lo singa u mapiltelio yila-yilateelo mao̒ boito. Tou̒ leidungga mota odito tio loo̒onto dadaata daa̒ tiia̒ todelomo pate losinga boito, wau woluo olo hulalio.

⁹ Pilulutio hula lotiia̒ boito ode delomo uluu̒lio, lapatao̒ lonao̒ tulusi sambela hemo lamela hula lotiia̒ boito. Lapatao̒ tio lonao̒ ode mongo dulaa̒lio wau longohi olo ngotayadu lonto hula lotiia̒ boito ode limongolio, wau timongolio helo lamelao̒ olo. Bo tei Simson diila lopoo̒taa deu̒ hula lotiia̒ boito hilamalio mai lonto pate losinga.

¹⁰ Lapatao̒ tiyamo lei Simson lonao̒ mola ode bele lo tadulahu boito, tei Simson lohutu mao̒ potihunggu mola teto, sababu odi-odieelo mola aadati lo tahi muudawa.

¹¹ Tou̒ taulo Pilistin loo̒onto olio, timongolio helo lulaotao̒ tolo pulu lota tabohulotau u losahabatia wolio.

¹² Lapatao̒ tei Simson loloi̒ya mao̒ ode limongolio, “Wau̒ otokaa toki. Wonu mowali tapuulo mao̒ limongoli, yi ngota-ngota timongoli mawohiyau̒ kaingi lineni ngopita u moa̒aluti wau ngopari pakeyangi u mopiohu. Timongoli wohiyau̒ mai wakutu u molapulaao̒ pituhui mola ngotilonggadu potihunggu lonika botie.

¹³ Bo wonu diila motapu limongoli tokaa toki boito, yi ngota-ngota timongoli musi mongohi mai olau̒ kaingi lineni moa̒aluti wau ngopari pakeyangi u mopiohu.” Lapatao̒ tau-tauwalo Pilistin boito loloi̒ya mao̒, “Mowali! Botia poleleaalo mai tokaa toki boito.”

¹⁴ Yi tei Simson malo loi̒ya, “Monto tamo lamelo, lumualai u polamelo; monto tamo lotolo, lumualai u moolingo.” Lapatao̒ lopaluta mola tolohui debo diipo lotapu limongolio tokaa toki boito.

¹⁵ Oditolio, tou̒ dulahee opatio loloi̒ya timongolio todile lei Simson, “Yio̒ musi momiyo mao̒ todilemu alihu tio mopoo̒taa mai olami boli lotokaa toki boito. Wonu diila, ami mamo lumbila olemu wolo ngotuango bele lipaapamu. Tutuulio tutu yio̒ loloduo olami u mopoo̒ pulitao̒ halata lami!”

¹⁶ Sababu uito, dile lei Simson malonao̒ mota odelei Simson sambela hiyo-hiyongo, lapatao̒ loloi̒ya mao̒, “Otaawau̒ yio̒ diila motolia̒nga olau̒. Yilongola yio̒ longohi mao̒ tokaa toki ode mongo sahabatiu̒, bo yio̒ diila lopoo̒taa mai olau̒ boliilio? Tantu yio̒ molonuo̒ olau̒!” Ualei Simson mao̒, “Wolati poo̒olo! To mongo dulaa̒au̒ lohihilao olo diila piloleleyau̒ mao̒, yilongola yio̒ musi poleleyau̒?”

¹⁷ Ngotilonggadu pituhui mola potihunggu boito, dile lei Simson hiyo-hiyonga tulusi. Wau kalana tio debo hemotihidi wau mohuntula tulusi, yi todulahee u opitulio, tei Simson malo poo̒taa mao̒ olio boli lotokaa toki boito. Lapatao̒ dile lei Simson boito lopoo̒taa mao̒ ode tau-tauwalo Pilistin.

¹⁸ Oditolio, todulahee u opitulio tou̒ dulahee diipo tilumolopa mota, tau-tauwala lokota boito loloi̒ya mao̒ odelei Simson, “Wolo ulebe moolingo wolo hula lotiia̒? Wau wolo olo ulebe molotolao̒ wolo singa?” Tei Simson lolametao̒, “Wonu timongoli diila helo pohuna mao̒ todileu̒, yi diila tamotapu limongoli tokaa toki boito!”

¹⁹ Debolo tei Simson malo lotolo lomola wolo kawasa lo Eeya, lapatao̒ tio lonao̒ ode Askelon. Mola teto tio helomate yila-yilateelo mao̒ tolo pulu lota mongo lolai̒ tahipakea u mopiohu. Tio helohama pakeyangi limongolio boito wau longohi mao̒ ode tatolo pulu lota tamaa helolapu tokaa tokiilio boito. Lapatao̒ uito, tio lohualinga ode bele wolo hilao ulee̒lee̒e.

²⁰ Lapatao̒ tiyamo moluhengio lohudu mao̒ dile lei Simson boito ode taa u helodudua̒ olei Simson tou̒ nikaalio.