MONGO HAKIMU 13 - KITABI HABARI MOPIOHE

Tei Simson pilotutulio mai

¹ Taulo Isirai̒lu luli ilodusa to Eeya, lapatao̒ Eeya lopoluli olimongolio he kiluwaasa taulo Pilistin ngotilonggadu wopato pulu lotaunu mola hiheolio.

² Tou̒ boito woluo talolai̒ ngota tokota Jora. Tanggulio tei Manoah, lonto suku Dan. Dilelio hunusa.

³ Bo todulahee tuwau malai̒kati lo Eeya lopobilohe batanga olio wau lotahuda, “Ngotilonggadu botie yio̒ diila loo̒ toduo walao̒, bo diilalo mohiheo yio̒ mao̒mbodaa̒ mai, wau mamoo̒tapu walao̒ talolai̒.

⁴ Sababu uito dahai mola batangamu tio̒otutua. Diila mao̒ pongilu angguru meaalo u hitua-tuawua u haramu.

⁵ Lapatao̒ walau̒mu boito potutuomu mai, diila mao̒ huntingi huwoi̒o sama-samaata, sababu tumulalo mai tio todelomo talomo tio matilantu mao̒ u mowali taa u motiwato batanga u momaya to Eeya. Tio-tiolo tamamo hipate u molopata taulo Isirai̒lu monto kawasa taulo Pilistin.”

⁶ Lapatao̒ uito dile lei Manoah lonao̒ ode dilelio wau loloi̒ya mao̒, “Kanda, woluo utolia lo Allahu Taa̒ala lonao̒ mai ode laatia; uanggu debo odelo malai̒kati lo Allahu Taa̒ala, tilinggula watia mailoohe. Watia diila lohintu wonu lonto utoonu mai tio, wau tio olo diila lopoo̒taa mai tanggulio ode laatia.

⁷ Bo tio malo loi̒ya watia mao̒mbodaa̒ mai wau mamoo̒tapu walao̒ talolai̒ ngota. Tio olo loloi̒ya deu̒ watia diila mowali mongilu angguru meaalo minumani umoo̒ huwoo̒, meaalo molamela u hitua-tuawua uharamu, sababu walao̒ boito musi wuduwola ode Allahu Taa̒ala u mowali ngotaalio tanajiri u ngotupa lo tutumulio.”

⁸ Loo̒dungohe uito, malo dua̒alo mola tei Manoah ode Eeya, odie, “Yaa Eeya, ambunguolo potala Eeya muli molao mai wato lo Eeya boito ode mongowatotia u mopoo̒taa mai wolo u musi pohutuo lo mongowatotia to walao̒ boito lapatao̒ tio potutuolio mai.”

⁹ Allahu Taa̒ala lodungohe polohone lei Manoah. Malai̒kati lo Eeya boito luli lonao̒ mai tou̒ dile lei Manoah donggo hulohuloa̒ to halabolu. Tou̒ boito dilelio talolai̒ diaaluo mota teto.

¹⁰ Oditolio, tio tilumetea̒ mota lopoo̒taa mao̒ sua̒li boito to olio, “Kanda, bilohilo mao̒, taa u omoo̒omolu lonao̒ mai ode laatia boito, luli lonao̒ mai!”

¹¹ Tei Manoah hua̒a lodudua̒a to dilelio. Tio lohimbideo̒ tau boito wau lohintu mao̒, “Mati Tuani talodelo mai habari ode dile lowatia?” “Otutu,” tametio mao̒.

¹² Lapatao̒ tei Manoah lohintu mao̒, “Wonu wolo uiloi̒ya li Tuani boito de malotoduo mai, yi wolo umusi pohutuo mao̒ lowalao̒ boito? De mamowali woloolo mola tutumulio?”

^13-14 Tametao̒ Malai̒kati lo Eeya boito, “Dilemu diila mowali mongilu angguru meaalo minumani umoo̒ huwoo̒, wau olo diila mowali molamela u hitua-tuawua u asaliilio mai monto bungo lo angguru, meaalo u hitua-tuawua uharamu. Tio musi moponao̒ ngoa̒amila u mailoi̒yau̒ olio, wau molaalao̒ alihu diaaluo udiila ponao̒olio.”

¹⁵ Lapatao̒ ualei Manoah Olio, “Ambunguolo potala ti Tuani mohimapo ngopee̒. Mongowatotia mamo tubupo mai batade buboto odeli Tuani.”

^16-17 Bo malai̒kati lo Eeya boito lotahuda mao̒, “Eleponu wau̒ mohima pomao̒ teea, wau̒ diila tamo lamela wolo ude pohintamu mai boito. Bo, wonu yio̒ debo ohilaa olo mopohinta mai, pohintaalo mao̒ uito odelo bake yilalango, wau podewowalo ode Eeya.” Tei Manoah mongalati deu̒ tahemo bisala wolio boito yito malai̒kati lo Eeya. Oditolio tio loloi̒ya mao̒, “Wonu odito, ambunguolo potala ti Tuani mopoo̒taa mai tangguli Tuani. Alihu wonu wolo uiloi̒ya li Tuani boito de malo toduo mai, mongowatotia mowali mongohi mao̒ hulumati lo mongowatotia odeli Tuani.”

¹⁸ Malai̒kati lo Eeya boito malohintu, “Wolo sababuulio yio̒ ohilaa motota mao̒ tangguluu̒? Tangguluu̒ boito tanggulo u moo̒linggolabu.”

¹⁹ Yi tei Manoah malohama batade buboto tuwau wolo pale ngoi̒di, lapatao̒ pilodutulio toitaato botu wau lopodewo mao̒ ode Eeya, deu̒yito-yito Eeya tahelohutu susuu-aliyaalo u moo̒linggolabu.

^20-21 Tou̒ tulu donggo lei̒lei̒ita ode yitaato lonto mesba boito, tei Manoah wolo dilelio loo̒onto malai̒kati lo Eeya boito lobotula mola ode yitaato todelomo lei̒ito tulu boito, ode hulungo. Deu̒ito tei Manoah longalati deu̒ tio boito malai̒kati lo Eeya; yi tio wau dilelio olo losujudu lomola wau lolubo. Diila pee̒enta mao̒ timongolio heloo̒onto malai̒kati boito poli.

²² Lapatao̒ ualei Manoah ode dilelio, “Ito tantu maamate sababu ito maloo̒onto Allahu Taa̒ala!”

²³ Dilelio lolametao̒, “Wonu Eeya memangi ohilaa momate mateelo mao̒ olanto, tantu Tio diila mohuto mololimo bake u podewonto to o-Lio boito; Tio olo diila tamopo bilohei ngoa̒amilalo botie ode olanto meaalo mopoo̒taa mai susuu-aliyaalo u mapilo tahudaa-Lio boito ode olanto.”

²⁴ He ohula-hulaala mola lapatio mao̒ dile lei Manoah boito lopotutu mai walao̒ talolai̒ ngota tulusi longohi mao̒ tanggulo Simson olio. Walao̒ boito lowali iludaa̒ mola wau bilalakati lo Eeya;

²⁵ wau tou̒ tio woluo tokema suku Dan, u dudutuulio to wolota lo Zora wau Esytaol, Rohullah malongohi lotolo to olio.