MONGO HAKIMU 12 - KITABI HABARI MOPIOHE

Tei Yepta wau suku Epraim

¹ Tou̒ boito suku Epraim lotidapa-dapato u motuuhua, lapatao̒ lonao̒ lobalango Dutulaa Yordan lotidulunga ode Japon. Timongolio loloi̒ya mao̒ odelei Yepta, “Yilongola yio̒ lonao̒ loluhu bangusa lo Amon lou̒ diila loheinga olami? Botia ami mamo lumbila olemu wau ngotuango belemu.”

² Malo loi̒yaalo tei Yepta, “Towolota taulo Amon wau ami taulo Gilead woluo polo haamawa ulaba-labaalo. Timongoli matiliangai lowatia mai momantu molopata olaatia monto tau-tauwalo Amon boito, bo timongoli diila lonao̒ mai.

³ Oditolio, lapatao̒ watia yakini mao̒ deu̒ timongoli diila tamonao̒ mai momantu olaatia, yi watia nileekati u moluhu tau-tauwalo Amon boito, eleponu watia musi mate. Lapatao̒ Eeya longohi olaatia u loo̒haama toli mongolio. Yilongola botia timongoli mai moluhu olaatia?”

⁴ Lapatao̒ tei Yepta malo ngambu ngoa̒amila taulo Gilead, tulusi timongolio heloluhu wau lopoo̒laaheo̒ taulo Epraim. (Taulo Gilead tahi biluloa̒wa to Epraim wau Manasye mapilopo tulude lotau Epraim deu̒ timongolio malo pohalahu batanga lonto Epraim, sukulio).

⁵ Tau-tauwalo Gilead tadonggo hemopaatea boito, helo ngawaasa tataa-mbatiyalo pobalangalo to Dutulaa Yordan, alihu timongolio moo̒ bubulao̒ tau-tauwalo Epraim tao̒hilaa tumeteo̒. Tou̒ ngotaalio lo Epraim, tao̒hilaa mopolahi batanga, lohile luasi u mobalango, yi taulo Gilead helohintu olio, “Wolo yio̒ taulo Epraim?” Wonu tio molametao̒ “Diila,”

⁶ timongolio mopoa̒hu olio molapali mao̒ tahe “Sybolet”. Tio mamo lapali “Sybolet” sababu tio diila moo̒ lapali tahe boito lou̒ tuhata. Lapatao̒ timongolio mamo heu̒upa olio wau momate olio mate-mateelo mao̒ to tala tuwau lotambati pobalangalo boito. Yi mai̒lo patealio yila-yilateelo mao̒ wopato pulaa dulo lihulota taulo Epraim boito.

⁷ Wolomo taunu mola hiheolio tei Yepta helo titau̒wa totaulo Isirai̒lu. Lapatao̒ tio yilate tulusi yilobungio to kambungu pilohuluta loduhulio, deu̒yito-yito tokota Mispa to Gilead.

Tei Ebjan, Elon wolei Abdon

⁸ Lapatao̒ tei Yepta, umati lo Isirai̒lu tilau̒wa lei Ebjan lonto Betlehemu.

⁹ Tei Ebjan owalao̒ mongo lolai̒ tolo pulu lota wau mongobua tolo pulu lota. Walai̒o mongobua boito hepilopo nikaalio wolo tau-tauwala lonto suku wewo, wau tio helohama olo tolo pulu lota mongo dulahu lonto suku wewo ode walai̒o mongo lolai̒. Pitu lotaunu mola hiheolio tei Ebjan helo titau̒wa to umati lo Isirai̒lu,

¹⁰ lapatao̒ tio yilate wau yilobungio to Betlehemu.

¹¹ Lapatao̒ tei Ebjan, umati lo Isirai̒lu tilau̒wa lei Elon lonto suku Jebulon mopulu lotaunu mola hiheolio.

¹² Lapatao̒ tio yilate tulusi yilobungio to Ayalon tomadala Jebulon.

¹³ Lapatao̒ tei Elon, umati lo Isirai̒lu tilau̒wa lei Abdon walae̒e Hilel lonto Piraton.

¹⁴ Walai̒o mongo lolai̒ maito wopato pulu lota, wau wombulio mongo lolai̒ maito tolo pulu lota. Timongolio ngota-ngota okolodai tuwau u hetae̒yalio. Walu lotaunu mola hiheolio umati lo Isirai̒lu hetilau̒wa lei Abdon.

¹⁵ Lapatao̒ tio yilate tulusi yilobungio to Piraton tomadala Epraim tolipu hihui̒-hui̒dea taulo Amalek.