MONGO HAKIMU 11 - KITABI HABARI MOPIOHE

¹ Tei Yepta yito ngotaalio lopajule tagaaga boli buheli daa. Biluloa̒lio to Gilead. Tiyamolio tailunte Gilead bo tiilolio ngotaalio lo tasuuntali.

² Tiyamolio boito olo owalao̒ mongo lolai̒ wewo lonto dilelio tasaaha. Tou̒ mongo walai̒o mai̒ludaa̒ mola, timongolio lopolaaheo̒ olei Yepta lonto bele. Uali mongolio olio, “Yio̒ diila tamoo̒tapu waliisani wolo-wolo monto oliyamo lami, sababu yio̒ walao̒ lotaabua wewo.”

³ Sababu uito tei Yepta lobua̒aya mao̒ wolo mongo wutatio lapatao̒ malonao̒ mola lotibiluloa̒ tomadala lo Tob. Mola teto ngopolemboa̒ tahileeta lopanggala wolio lapatao̒ timongolio helo lambato.

⁴ Dengolo wakutu mola lapaatio mao̒ taulo Isirai̒lu hetiluhu taulo Amon.

⁵ Tou̒ sua̒li boito lotoduo tahimuloa lo ulipu lo Isirai̒lu to Gilead lonao̒ mota wau helo heinga olei Yepta mololaa mao̒ madala lo Tob.

⁶ Timongolio malo loi̒ya, “Tau̒wai mai ami moluwali taulo Amon.”

⁷ Bo tei Yepta lolametao̒, “Diila matimongoli tamolonua̒a daa̒ olaatia? Timongoli malo polaaheo̒ olaatia lonto bele liyamo lowatia. Yilongola botia tou̒ timongoli ilodungga lou̒ suukali, timongoli lonao̒ mai ode laatia?”

⁸ Timongolio lolametao̒, “Ami lonao̒ mai sababu ami ohilaa alihu yio̒ motitau̒wa mao̒ to ngoilanggubu ulipu lo Gilead u moluhu bangusa lo Amon botiyaalo olo.”

⁹ Ualei Yepta mao̒, “Wonu timongoli moheinga olaatia muli mohualinga ode Gilead u moluhu bangusa lo Amon, wau Eeya mopoo̒haama mai olaanto, yi wawaatiyalo tamaa mowali motolo-kawasa mao̒ olimongoli.”

¹⁰ Timongolio lolametao̒, “Ami akolo, Eeyaalo tasakusiilio.”

¹¹ Yi malo monggato tei Yepta pee̒-pee̒enta wolo mongo tau̒wa lo Gilead. Lapatao̒ ulipu lo Gilead lumudua̒ao̒ olio lowali talo tolokawasa wau tau̒wa. Wau totalu lo Eeya to Mispa, tei Yepta helo podudulao̒ hihii-leyaalo wolo moo̒ohuu̒lio ode ulipu lo Gilead.

¹² Lapatao̒ uito tei Yepta lolao tau odeli olongia lo Amon u lolele mao̒ odie, “Wolo totala lamiaatia tilinggula timongoli heloluhu lipu lamiaatia?”

¹³ Ti Olongia bangusa lo Amon lolametai tomongo utolia boito, “Tou̒ umati lo Isirai̒lu leidungga mai lonto Masiri, timongolio helohama huta lami, tumulalo mao̒ lonto Dutulaa Arnon demola Dutulaa Yabok wau Dutulaa Yordan. Botia powalingalo mai uito wolo dame.”

¹⁴ Lapatao̒ tei Yepta luli lolao tau-tauwalo odeli olongia Amon,

¹⁵ u lolametai odie, “Umati lo Isirai̒lu sama-samaata diila helo lambata huta taulo Moab meaalo huta taulo Amon.

¹⁶ Tou̒ taulo Isirai̒lu lololaa mao̒ Masiri, timongolio helo tidulunga ode Wulungo Akaba loli huta ohungayo u luasi daa̒ lapatao̒ leidungga mola to Kades.

¹⁷ Lapatao̒ timongolio lolao tau odeli olongia Edom u mei̒ poluasi molibaya tolipulio. Bo tio diila lopuasi olimongolio. Lapatao̒ timongolio helohile sua̒li u tutuuwauwa odeli olongia lo Moab, bo tio olo diila lopoluasi olimongolio lolibaya to madalalio. Sababu uito umati lo Isirai̒lu malo tibiluloa̒ to Kades.

¹⁸ Lapatao̒ timongolio helo potolonga mola nonao̒ limongolio lolibaya huta ohungayo u luasi daa̒, bo diila lolibaya tomadala lo Edom wau Moab, bo malohama dalala lohelili tunggula leidungga mola to ambahu tiimuru lo Moab, to ngotuali lo Dutula Arnon. Timongolio helo tikema mola teto, bo diila lobalangao̒ todutula boito, sababu madala boito leituwoto tomadala lo Moab.

¹⁹ Lapatao̒ uito umati lo Isirai̒lu lolao tau odelei Sihon, olongia lo Amori to Hesybon mota mei̒ poluasi u molibaya tomadala lo Amori, sababu timongolio ohilaa ode madala limongolio lohihilao.

²⁰ Bo tei Sihon diila lopoluasi olimongolio sababu tio diila palacaya deu̒ timongolio bo mohuto lumaode wambao̒. Tio tumbao̒ helo himoa̒ ngoilanggubu diti lo popaatealio tulusi loti malakasi to Yahas lapatao̒ loluhu Isirai̒lu.

²¹ Bo Eeya, Allahu Taa̒ala lo Isirai̒lu, longohi to umati lo Isirai̒lu loo̒haama tolei Sihon wolo diti lo popaatealio. Odieelo mola umati lo Isirai̒lu heloo̒tapu ngoa̒amila huhuu-tawaalo taulo Amori tahi biluloa̒wa tolipu boito.

²² Madala lo Amon boito hiluloa̒a limongolio lonto Arnon to ambahu huliaalio, demola to ambahu tilayo lo Dutulaa Yabok, wau lonto huta ohungayo u luasi daa̒ to ambahu tiimuru, demola Dutula Yordan to ambahu otolopa.

²³ Oditolio Eeya, Allahu Taa̒ala lo Isirai̒lu, boitolo talo polahi tau-tauwalo Amori ode polohuna daa̒ umati lo Eeya.

²⁴ Wau masaatia botie wolo yio̒ ohilaa muli mohama mao̒? Huta uilohi lei Kamos, dewamu boito, ode olemu mowaliilo debo haku limongoli. Bo wolo u mailohi lo Eeya, Allahu Taa̒ala lamiaatia ode lamiaatia madebo dihima lamiaatia tio̒otutua.

²⁵ He lantobumu wau̒ lebe mopiohu wolei Balak walae̒e Zipor, olongia lo Moab? Tei Balak diila pee̒enta mao̒ helo tehengi meaalo helopaatea wolamiaatia.

²⁶ Tolo hetuto lotaunu mola hiheolio Isirai̒lu helo ngawaasa Hesybon wau Aroer wau dedee-sawaalo to palitio wau ngoa̒amila kokoo-tawaalo tobiihu Dutulaa Arnon. Wau yilongola ngotilonggudu uito yio̒ diila luli lohama mao̒?

²⁷ Diila, ami diila ototala to olemu. Yio̒olo tao̒totala sababu loluhu olami. Eeyaalo hakimu u dulahee botie molantu mao̒ palakala botie wolota bangusa lo Isirai̒lu wau bangusa lo Amon.”

²⁸ Bo ti olongia Amon diila lomaduli tahuli lonto olei Yepta boito.

²⁹ Lapatao̒ Rohullah longawasa mai olei Yepta. Yi malonao̒ tei Yepta lomilohe madala lo Gilead wau Manasye lapatao̒ luli lohualingo ode Mispa to Gilead. Lonteeto tio lopotolonga molalo nonao̒lio ode madala bangusa lo Amon.

³⁰ Tei Yepta lohutu mao̒ danti botie ode Eeya, “Wonu Eeya mopoluasi olo watatia mopo olaaheo̒ taulo Amon,

³¹ wau watotia muli mohualingo wolo moa̒ahu, yi penu boli tatoonu wambai̒o tabohu-bohulio lumualai monto bele lowatotia u molutulo lowatotia mapodewo lowatotia odelo bake yilalango ode Eeya.”

³² Lapatao̒ tei Yepta lobalango Dutulaa Yordan u loluhu taulo Amon, wau Eeya lopoo̒haama olio.

³³ Tei Yepta heloluhu olimongolio lopuli-pulitolo mao̒ lonto Aroer demola madala topalito Minit – ngoa̒amilalo dulo puulo kota – wau demola ngoilamingo Abel-Keramim. Dadaata daa̒ taulo Amon tailate, tunggula ilolaahelo mola timongolio lo taulo Isirai̒lu.

Walao̒ tadulahu lei Yepta

³⁴ Tou̒ Yepta luli lohualinga ode Mispa, walai̒o tadulahu mai lolutulao̒ olio wolo elungo sambela hemo laa̒apa rabana. Uitolo walai̒o tatuwa-tuwaulo.

³⁵ Odito tei Yepta loo̒onto mao̒ olio, tei Yepta masiluukali daa̒ tilinggula tio longedenga boo̒lio, sambela loloi̒ya mao̒, “Aduu walau̒uu̒, malo antuluulo mao̒ hilaau̒! Yilongola musi yio̒ taloo̒ sababu hilaau̒ loa̒ntulu? Wau̒ malotadia ode Eeya, wau wau̒ diilalo mowali mopotouli mai!”

³⁶ Lapatao̒ ualo tadulahu boito odelei Yepta, “Ti Paapa malotadia ode Eeya, wau Eeya malo poluasi oli Paapa helo maalasi ololeeto tau-tauwalo Amon, musu li Paapa boito. Oditolio, wolo u mapilo danti li Paapa, mamusi poponao̒wa mao̒ li Paapa.”

³⁷ “Bo,” ualo tadulahu boito wumbutio mola, “watia momolohone sua̒li tuwau: Wohia mai watia wakutu dulo hula mola u montalenga to hihui̒-hui̒dea pee̒-pee̒enta wolo mongo sahabati lowatia. Mola teto watia demaa humoyongao̒ paladu lowatia, sababu watia maamate tou̒ donggo tadulahu.”

³⁸ Ti Paapalio lopoluasi olio lapatao̒ lolopata olio lonao̒. Tadulahu boito wau mongo sahabatilio lonao̒ ode hihui̒-hui̒dea u lotisuukali lohilao mola teto, sababu tio maamate tou̒ diipo monika wau owalaa̒i.

³⁹ Lapatao̒ lopaluto dulo hula mola, tio luli lohualingai odeli paapalio, tulusi tipaapalio lopohutu mao̒ wolo u madilantilio ode Eeya. Yi mailatelo mola tadulahu boito tou̒ donggo diipo ilodedeta lo talolai̒. Ui-uitolo asaliilio mai, yilongola towolota taulo Isirai̒lu, biasaalio

⁴⁰ walao̒ mongo dulahu tonggonao̒ ngotilonggadu wopato pulu hui mola u motisuukali lohilao moe̒ela mola walae̒e Yepta to Gilead.