MONGO HAKIMU 10 - KITABI HABARI MOPIOHE

Tei Tola

¹ Lapatao̒ tei Abimelekh yilate mao̒, tei Tola walae̒e Pua, lowali tau̒wa u lopo lopato taulo Isirai̒lu. Tio yito woombu lei Dodo lonto suku Isakhar. Biluloa̒lio to Samir tolipu hihui̒-hui̒dea lo Epraim.

² Dulo pulaa tolo taunu mola hiheolio tio helo titau̒wa to umati lo Isirai̒lu, lapatao̒ tio yilate mao̒ tulusi yilobungio to Samir.

Tei Yair

³ Lapatao̒ tei Tola, Isirai̒lu tilau̒wa lei Yair dulo pulaa dulo taunu mola hiheolio. Tei Yair asaliilio mai lonto Gilead.

⁴ Walai̒o mongo lolai̒ woluo tolopulu lota. Timongolio okolodai tolopulu u hetae̒alio wau tolo pulu kambungu tolipu lo Gilead. Kakaa-mbunguwalo boito donggo unte-unte kakaa-mbunguwalo lei Yair.

⁵ Tei Yair yilate olo, wau yilobungio to Kamon.

Tei Yepta

⁶ Umati lo Isirai̒lu luli ilodusa poli to Eeya. Timongolio diila lomandungi Eeya wau diilalo lolubo o-Lio. Timongolio helolubo bubuu-iyaalo Baal wau Asytoret, wau bubuu-iyaalo bangusa lo Siria, Sidon, Moab, Amon wau Filistin.

⁷ Sababu uito Eeya lomuluka to umati lo Isirai̒lu, tunggula Tio lopoluli mao̒ bangusa lo Filistin wau bangusa lo Amon longawaasa olimongolio.

⁸ Mopulu lotaunu mola hiheolio oluo bangusa boito helodeehe ngoa̒amila taulo Isirai̒lu tahi biluloa̒wa to Gilead, deu̒yito-yito madala taulo Amori to ambahu tiimuru lo Dutulaa Yordan. Timongolio helo pohutu tau-tauwalo Isirai̒lu wolo diila omanusia.

⁹ Taulo Amon tumbao̒ helo balango Dutula Yordan u lonao̒ loluhu suku Yehuda, Benyamin wau Efraim tunggula umati lo Isirai̒lu helo dutolaa daa̒.

¹⁰ Lapatao̒ umati lo Isirai̒lu helo ngiibodu mola ode Eeya, ualio mao̒, “Mongowatotia mailodusa to Eeya, mongowatotia diila lomandungi to Eeya, oo Allahu Taa̒ala lo mongowatotia. Mongowatotia helolubo bubuu-iyaalo Baal.”

^11-12 Eeya lolametai, “Omoo̒omolu timongoli hekiluwasa wau hepilalenta lo bangusa Masiri, Amori, Amon, Filistin, Sidon, Amalek wau bangusa Maon. Lapatao̒ tou̒ boito timongoli helo ngiibodu lei̒ tulungi ola-U̒ diila odito? Nte eelaimola wolo Wau̒ diila lopoa̒ahu olimongoli lonto okokawasa limongolio?

¹³ Eleponu odito, timongoli tumbao̒ debo helo bulemenga ola-U̒, lapatao̒ lonao̒ helolubo bubuu-iyaalo. Botia Wau̒ diilalo mohuto molopata olimongoli.

¹⁴ Ponao̒lo wambao̒ ode bubuu-iyaalo u tilulaoto limongoli boito. Pongibodulo toli mongolio! Huliilo mao̒, timongolio tamo tulungi tou̒ timongoli odungga lou̒ suusa.”

¹⁵ Bo umati lo Isirai̒lu loloi̒ya ode Eeya, “Mongowatotia mai̒lodusa, Eeya. Pohutuwalo mai wolo wambao̒ u kahandakia lo Eeya, asali Eeya motulungi mai olo mongowatotia todulahee botie.”

¹⁶ Lapatao̒ timongolio malolapi ngoa̒amila bui̒ baalahala, lapatao̒ lolubo Allahu Taa̒ala. Yi Allahu Taa̒ala olo malodehu hilaa-Lio loo̒onto olimongolio todelomo suusa.

¹⁷ Tou̒ boito suludadu lei Amon donggo dapa-dapato u mopaatea. Timongolio lotikema to Gilead. Umati lo Isirai̒lu olo malo tia̒mbu wau lotikema to Gilead.

¹⁸ Mola teto ulipu wau mongo tau̒wa lonto susuu-kuwaalo Isirai̒lu boito tinggai hemo hihiintua wolo woluo towolota limongolio tabuheli momintaa̒a tingolo moluwali bangusa lo Amon. Tau boito mapo waliyola tau̒wa to ngoilanggubu ulipu lo Gilead.