MIKHA 7 - KITABI HABARI MOPIOHE

Adabu lo Isirai̒lu lolaahe daa̒

¹ Topotala wau̒! Wau̒ debo odelo taa polaangolo mota molipu hungo lapatio mao̒ mopaluto sembolio. Diduu̒ huhuu-ngowaalo to bubuu-ngowaalo ayu. Hungo lo angguru wau hungo lo ara u hipiohe ngoa̒amilalo malo pulito tilipu.

² Taa motulidu hale madiduu̒ lonto lipu, taa u tatapu wau molotolo hilao to Allahu Taa̒ala diilalo odungga. Timii̒du tau hipohimawa hiyangio u momate mateelo mao̒. Ngota-ngota hemolaala taalo ode timongotalio.

³ Ngoa̒amilalo moolato todelomo mohutu u moleeto. Tadihu-dihu pantungo lipu wau hakimu hipohilea doi solooi̒, wau tao̒ tilanggula todelomo ulipu hemo makusa u otohilaalio, odi-odieelo mola timongolio helo woomboa pee̒-pee̒enta.

⁴ Talaba-labaalo mopiohe wau talaba-labaalo motulidu hale monto olimongolio olo debo odelo diu̒to oduhi udiila ohuna. Malei dungga wakutuulio Allahu Taa̒ala mohukuumani umati-Lio debo odelo u mapilopo eelaa-Lio mao̒ olimongolio lotimbulude tomongo nabii-Lio. Botia matilumodei tolonggalo towolota limongolio.

⁵ Diila mao̒ yakinia to tiheedumu, diila mao̒ potiwunela to sahaabati. Poo̒daha-dahaalo mao̒ wolo loloo-i̒yaamu eleponu tamo dungoheo̒ yito dilemu taabua lohihilao.

⁶ Sababu, tomaasa debo odelo utie pongawaa̒ lo ngaalaa̒ tinggai momuusua: walao̒ talolai̒ mohina oliyamolio, walao̒ taabua moluwali oliilolio, wau moluhengo taabua mobuutola wolo tiilo moluhengio.

⁷ Bo ito mohalapu to Eeya; wolo oyakininto u lealeaatu mohima Allahu Taa̒alanto. Eeya mamo dungohe dua̒anto wau mopoa̒ahu olanto.

Eeya mopoa̒ahu mai

⁸ Diaaluo alaasani duo̒lo mumuu-suunto u motiwengahu to oa̒antulunto. Sababu eleponu ito modehu, ito mamuli mobongu. Botia ito woluo todelomo modio̒lomo, bo Eeya mamo linelai olanto.

⁹ Ito mai̒lodusa to Eeya, sababu uito botia ito musi molaasa mao̒ omulukaa-Lio. Bo diilalo mohiheo Eeya mamo poduulua olanto wau mongohi u aadili olanto. Eeya mamodelo olanto lumualao̒ ode mobaango; ito mamoo̒laasa lohihilao deu̒ Eeya mopoa̒ahu mai olanto.

¹⁰ Muloololio mai musu hemohina olanto wolo moloi̒ya, “Tou̒toonu Eeya, Allahu Taa̒alamu boito?” Bo botia timongolio mamoo̒onto wolo u pilohutu lo Eeya ode olanto, wau timongolio mamowali moolito. Ito mamo sakusi mumuu-suunto boito olaahe wau lumbe-lumbetaa̒lio debo odelo latao̒ todalalo.

¹¹ Wuu Yerusalemu! Malei dungga wakutuulio timongoli muli momongu didii-ngingaalo meeseli lo kotaamu. To dulahee boito madalamu mapo luasiyolo.

¹² Tau-taumu mamuli mohualingai ode olemu monto utoonulalo mao̒ – monto Asyur to ambahu tiimuru, monto Masiri to ambahu huliaalio, monto madala Dutulaa Eprat, monto ngotuali lodeheto wau monto huhuu-ideyaalo u molamingo.

¹³ Bo dunia mamowali diilalo pobutua lo pilomulo sababu ololeeto lo ulipulio.

Dua̒ mei odehu hilao lo Eeya duolo Isirai̒lu

¹⁴ Yaa Eeya, himbalai mai umati lo Eeya, umati tilulaoto Eeya. Timongolio bilu-biluloa̒ tihitihi to oa̒ayua polodu, tohuungo huta u molomiodu. Huliilo mao̒ timongolio moo̒tapu ua̒alo tohuta datahu wau luasi u pilobutua lo huo̒yoto lo Basyan wau to Gilead debo odelo tojamani muloololio mai.

¹⁵ Pohutuwalo mai u moo̒linggolabu duo̒lo mongowatotia, yaa Eeya, debo odelo u piohutu lo Eeya muloololio mai tou̒ Eeya lodelo mongowatotia yilumualao̒ lonto Masiri.

¹⁶ Babaa-ngusawalo mamoo̒onto suali boito wau mowali moolito sababu mongalati mao̒ deu̒ totoonulalo olootoli mongolio diila oboliilio wolo-wolo. Timongolio mao̒olia lo aakali tilinggula diila mowali mobisala meaalo modungohu.

¹⁷ Timongolio maa umalalapo tohuta debo odelo tulidu. Wolo duiduito wau hulu-huluhelio timongolio malumualo monto polo biintengi limongolio, lapatao̒ monao̒ mai ode Eeya, yaa Eeya Allahu Taa̒ala lo mongowatotia.

¹⁸ Diaaluo Allahu Taa̒ala debo odelo Eeya, yaa Eeya, tamo ngambungu dusa lo umati tilulaoto Eeya u ilolabita. Diila u ohiheolo mao̒ Eeya muluka; bolii̒o mao̒, Eeya sanangi mopobilohei ponu lo Eeya udiila o eenggadelio boito.

¹⁹ Eeya mamuli modehu hilao to mongowatotia wau mongambungu olo mongowatotia. Duduu-sawaalo mongowatotia malumbe-lumbetaa̒ wau pomahulo Eeya ode wamoo̒ deheto!

²⁰ Ode umati lo Eeya, wali mai lei Abraham wolei Yako, Eeya mamo pobilohei otatapu wau olootolo hilao lo Eeya wau ponu lo Eeya udiila eenggadelio boito debo odelo u pilodanti mai lo Eeya ode loluuhuru lo mongowatotia muloololio daa̒.