MIKHA 6 - KITABI HABARI MOPIOHE

Potuludu Eeya ode Isirai̒lu

¹ Dungohiilo wolo u pilotuludu Eeya ode Isirai̒lu. Pobonguulo, yaa Eeya, wau too̒woliyalo mai dudulohu Eeya! Huliaalo mao̒ hui̒dee wau huludu modungohe wolo u ohilaa potahuda lo Eeya.

² Wuu huhuu-ideyaalo, wuu wawaa-moo̒waalo dunia, dungohiilo podulohu Eeya! Eeya o palakala wolo Isirai̒lu umati-Lio wau mamohile wolo moo̒ohuu̒ olimongolio.

³ Eeya lotahuda, “Wuu umati-U̒, wolo u mapilohutu-U̒ ode limongoli? To delomo sua̒li wolo Wau̒ mopo totolo olimongoli? Tametilo mai Wau̒!

⁴ Timongoli madilelo-U̒ yilumualao̒ lonto Masiri, wau yilopato-U̒ monto polowato; Wau̒ malolao olei Musa, Haruuna, wau Miriyama u modelo olimongoli.

⁵ Umati-U̒, eelailo mola wolo u yilanjana lei Balak olongia lo Moab to olemu, wau wolo u pilolametai lei Bileam walae̒e Beor to olio. Eelailo mola wolo u lotoduo mai tononao̒ wolota piloti kemawa to Sitim wau to Gilgal. Wonu timongoli moe̒ela mola ngoa̒amilalo boito, timongoli mamo ngalati wolo u mapilohutu-U̒ u mopoa̒ahu olimongoli.”

Dewo u kilahandaki lo Eeya

⁶ Wolo u musi podewonto ode Eeya, Allahu Taa̒ala tosologa, wonu bolo ito monao̒ mai moi̒baadati to Olio? Wolo ito musi modelo sapi buboto u mopiohe daa̒ duo̒lo podewo odelo bake yilalango ode Olio?

⁷ Wolo Eeya masanangi wonu ito modelo ode Eeya hilihu-lihua himba meaalo leta-letaaa̒ daa̒ winulo jaitun? Wolo maamusi ito mopodewo ode Eeya walao̒onto tamohuhula daa̒ odelo potolota to duduu-saanto?

⁸ Diila! Eeya malo poi̒laalo mai olanto wolo u mopiohe. U pohilee-Lio wolo moo̒ohuu̒ monto olaanto yito alihu ito motihutu aadili, laito mongamali laasa tolia̒ngo, wau wolo dupadupapa lohilao tumumula motituwau wolo Allahu Taa̒alanto.

⁹ Tutuulio tutu laba-labaalo molinepo u moohe to Eeya. Tio mongiibode ode ulipu lokota, “Dungohiilo, wuu timongoli tahia̒mbua tokota!

¹⁰ Tobele lotau-tauwalo tahileeta woluo halata u lotapulio wolo wimbulo hidala-dalaala. Timongolio helomake titimenga paluti, tuwaulio lohuhutu u olonuu̒u-U̒. Taa u lohutu mao̒ mahukuu-maniyo-U̒.

¹¹ Diila pongalo aakali Wau̒ mongambungu taa u hipomakea titimenga u paluti?

¹² Tau-tauwalo tahi kayawa to kotamu hemodeehe taa mosikini, wau timongoli ngoa̒amila moohimbuloa.

¹³ Botia Wau̒ molumula molotaa̒ wau mongantulu olimongoli sababu duduu-saamu.

¹⁴ Timongoli mamo lamela, bo diila mowali mobutuhu – tumbao̒ debo pola-polaango. Timongoli mamomintaa̒ babaa-langiyalo, bo diila mowali mopoa̒amani mao̒. Penu boli wolo wambao̒ u poa̒amani mao̒ limongoli maa̒ntuluwo-U̒ todelomo popaatea.

¹⁵ Timongoli mamo mua̒yade pale, bo diila tamo ngotolo tilapulio. Timongoli mamohutu winulo monto hungo lojaitun, bo diila mowali mopohuna winulio. Timongoli mamo mitodeo̒ taluhu angguru, bo diila mowali mongilu taluhio.

¹⁶ Ngoa̒amila boito motoduo sababu timongoli helo dudua̒ huhuu-hutuwaalo u moleeto li Olongia Omri wau walai̒o, deu̒yito-yito ti Olongia Ahab. Timongoli helo dudua̒ duduu-delowaalo limongolio. Sababu uito Wau̒ mamo ngantulu olimongoli, wau timongoli mahenteo̒ wau hinaa lo totoonulalo bangusa.”