MIKHA 5 - KITABI HABARI MOPIOHE

Allahu Taa̒ala lodaantia ngotaalio takaawasa lonto Betlehemu

¹ Eeya lotahuda, “Wuu Betlehemu Eprata, yio̒ tala tuwau lo kota u pulito kikiio̒ to Yehuda! Bo monto olemu mabongulo-U̒ mai ngotaalio takaawasa duo̒lo Isirai̒lu tawaliilio monto muloololio daa̒.”

² Oditolio, Eeya mamopoluli umati-Lio kiluwaasa lo mumuu-suuwaalo limongolio tunggula taabua tatilantu u mowali tiilo lo takaawasa boito malo potutu mai o-Lio. Lapatao̒ uito tau-tauwalo ngobangusaalio tawoluo to polayahu mamuli potuwaulo wolo bangusa limongolio.

³ Wonu bolo takaawasa boito meidungga, Tio mamo malenta umati-Lio wolo olootolo wau okokawasa monto Eeya Allahu Taa̒alaalio lohihilao. Umati-Lio matumumulo wolo aamani, sababu ngoa̒amila tau to ngoilanggubu dunia mamo toloa̒kuo odudaa̒a-Lio,

^4-5 wau Tio mamo pohabari ududame. Wonu bolo suludadu lo Asyur moluhu mai lipunto wau mongantulu bintenginto, ito mamongambu mai mongo tau̒wanto tahi lotola daa̒ u moluhu olimongolio. Mongo tau̒wanto boito mamopo olaaheo̒ Asyur wolo olootolo tingolo, wau mopoa̒ahu olanto monto uluu̒ limongolio.

Polobeebasi wau hukuumani

⁶ Taulo Isirai̒lu, tadonggo ilolabita mamowali debo odelo wambulo olaasa mohuhulo monto Eeya duo̒lo dadaata bangusa, wau debo odelo tuhutio mai lodidi to pilomulo. Timongolio mamo tiwunela to Allahu Taa̒ala, wau diila tomanusia.

⁷ Taulo Isirai̒lu tadonggo hibiluloa̒wa towolota lo babaa-ngusawalo madebo odelo singa tohuungo lo bibii-natangiyalo to oa̒ayua meaalo to huungo himbala himba tohuta datahu wau luasi u pilobutua lo huo̒yoto. Singa boito tilumuwota tohuungo himbala himba boito sambela lolumbe-lumbetaa̒ wau longanta-ngantanga; diaaluo taa lowali lolopata hihii-mbawaalo boito.

⁸ Isirai̒lu mamopo olaaheo̒ mumuu-suulio wau mopoa̒ntulu olimongolio ngoa̒amila.

⁹ Eeya lotahuda, “Tou̒ boito Wau̒ mamopo loloopu ngoa̒amila wadalamu, wau mopobinasa kakaa-letawaalo popaateyamu.

¹⁰ Kokoo-tawaalo obiintengi tolipumu maa̒ntuluwo-U̒,

¹¹ Aa̒a-jimaamu mapo diaaluwo-U̒ wau ngoa̒amila tamoo-laamalia limongoli yinggilo-U̒.

¹² Wau̒ mamopo aantulu bubuu-iimu wau tutuu-guwaalo auliyaamu; timongoli diilalo molubo babaa-langiyalo huhutu lo uluu̒mu lohihilao.

¹³ Tutuu-guwaalo Dewi Asyera tolipumu mapo lohubuwo-U̒, wau kokootaamu u obintengi maa̒ntuluwo-U̒.

¹⁴ Todelomo omulukaa-U̒ uwali-walihuhu Wau̒ mamomaalasi ololeeto lo ngoa̒amila bangusa tadiila modungohe ola-U̒.”