MIKHA 4 - KITABI HABARI MOPIOHE

Eeya helo malenta dunia wolo damee

¹ To duduu-laheyalo u dungga-dungga mai huludu, tambati Bele lo Eeya, matihu-tihula motiludu wau oontonga mongilabotao̒ huhuu-ideyaalo wau huhuu-luduwaalo. Totoonulalo bangusa tutuuyuta dadaata daa̒ odito mola

² timongolio ngoa̒amila mamoloi̒ya, “Dulo ito mobotula mola ode huludu Eeya ode Bele lo Allahu Taa̒ala lo Isirai̒lu! Eeya mamo ngaajali mai olanto wolo u musi pohutuwonto. Ito mamo dudua̒ dala-Lio sababu pongaajali lo Eeya meidungga mai monto Yerusalemu; monto Sion Eeya lotahuda ode umati-Lio.”

³ Eeya mamolantu mai palakala towolota lo babaa-ngusawalo, towolota lilii-puwaalo u molotolo, u molaminga meaalo u meembidu. Timongolio mamodupa wamilo limongolio mowali popadeo̒ wau totoo-buo̒owalo limongolio mowali pito pomopoto. Babaa-ngusawalo diilalo moluluuhua, diila olo motidapa-dapato u mopaatea.

⁴ Timii̒du tau matumumulo aamani wau salaamati tohuungo ilengi lo angguru wau ileengi lo aralio; diaaluo tamo poo̒ohe-oohe olio, uitolo danti lo Eeya Taa Laba-labaalo kawasa.

⁵ Timii̒du bangusa todunia molubo wau modungohe todewalio lohihilao. Bo ito mamodungohe to Eeya Allahu Taa̒alanto wau molubo o-Lio u ohiheo-hiheolo mao̒.

Isirai̒lu mamuli mohualingai monto polayahu

⁶ Eeya lotahuda, “Mamei dungga wakutuulio Wau̒ mohimoa̒ tau-tauwalo tahukuu-maniyo-U̒, deu̒yito-yito timongolio tahidutolaa to polayahu.

⁷ Timongolio mapilopo lupuhu-Lio wau molamingo monto kambungu pilohuluta loduhulio. Bo, monto tau-tauwalo tahe ilolabita boito Wau̒ mamo lumulao̒ tuwaulio lowali mai u bohu. Timongolio mamowali bangusa u leidaa̒ wau molotolo. Wau̒ mamo malenta olimongolio to Huludu Sion tunggula ohiheo-hiheolo mao̒.”

⁸ Wau yio̒ Yerusalemu, tambati lo Allahu Taa̒ala modaha mao̒ umati-Lio debo odelo diti hemodaha himbala lo himbalio, yio̒ mamuli mowali tiilo lokota yilaidiaamu debo odelo muloololio mai.

⁹ Yilongola yio̒ humoyonga daa̒-daa̒alo mao̒? Yilongola yio̒ modutolo debo odelo taabua tao̒hilaa mopotutu mai? Wolo kalana yio̒ diila o olongia, wau tahipo naseehatia olemu mailate?

¹⁰ Wuu ulipu lo Yerusalemu, potirekadu lomola wau poi̒laalo lomola suusa debo odelo taabua tadonggo hemo potutu mai! Sababu, botia timongoli musi mololaa mao̒ kota wau motibiluloa̒ tohuta u datahu wau luasi. Timongoli musi monao̒ mola ode Babel, bo mola teto Eeya mamo lopata olimongoli monto mumuu-suumu.

¹¹ Dadaata bangusa maa lotitia̒ambu u moluhu olemu, wuu Yerusalemu! Timongolio loloi̒ya, “Yerusalemu musi aantuluolo! Ami maa momilohe kota boito mowali tuodu!”

¹² Bo babaangusawaalo boito diila motota wolo u donggo he raanjana lo Eeya. Timongolio diila mongalati deu̒ timongolio maa ilaambu-Lio u hukumanio-Lio, tutuuwaua debo odelo pale u yilomoi̒o u pomolotolo.

¹³ Eeya lotahuda, “Wuu u lipu lo Yerusalemu, ponao̒olo wau lumbetai̒ mao̒ musu-musumu! Wau̒ maa mopowali mai olimongolio molotoolo debo odelo sapi u o tunge wate wau o luo̒be tombaha. Timongoli maa mopoa̒antulu dadaata bangusa, wau okokaya umotapu mao̒ limongolio monto yilambato maa podewo limongoli ola-U̒, Eeya ngoilanggubu aalamu.”

¹⁴ Wuu u lipu lo Yerusalemu, pohileaalo mola wolo tio̒otutua lo mao̒ alihu Eeya motuulungi mai oleu! Ito donggo bala-bala! Musu donggo hemoluhu tau̒wa lo Isirai̒lu!