MIKHA 3 - KITABI HABARI MOPIOHE

Tei Mikha helo tehengi mongo tau̒wa lo Isirai̒lu

¹ Dungohiilo, wuu timongoli tahi kawaasawa to Isirai̒lu! Wajibulio otaawa mao̒ limongoli wolo u aadili,

² bo timongoli tumbao̒ molonuo̒ u mopiohe, wau sanangi tou̒ moleeto. Bangusa lowatia yilaalita limongoli tumu-tumulo, wau ilantangi mongoli tapulio lonto tutuu-laalio.

³ He iliila limongoli bangusa lowatia. Alipio hei̒la-ilantangi mongoli wau tutuu-laalio ilaantulu limongoli. Timongoli helo lamba-lambalao̒ olimongolio debo odelo lolambala tapu u tuangolo to ulongo.

⁴ Mamei dungga wakutuulio timongoli monguatio̒ mei̒ tulungi ode Eeya, bo Eeya diila mohuto molametai. Eeya diila tamo dungohe duduua̒amu, sababu timongoli malohutu u moleeto.

⁵ Bangusa lowatia ilaakali lo mongonabi tahi polaamalia u mopiohe ode taa u hipongohia doi, bo motolo muusua wau mopodupapa taa u diila hemongohi. Ode mongonabi tao̒dito boito, Eeya lotahuda,

⁶ “Wuu nabi, wakutuumu mawimbideo̒ mopulito; mato lo dulahumu donggo tulotulopo. Timongoli diilalo moo̒toduo mai bibilohe u mopoi̒laalo mai lalaa-njanaa-U̒. Timongoli diilalo moo̒ laamali wolo-wolo.”

⁷ Tau-tauwalo tahi polaamalia dulahee momooli mamoo̒tapu woolito sababu laamalilio diila tiluhata. Timongolio ngoa̒amila oolia lobaya sababu Allahu Taa̒ala diila molametai olimongolio.

⁸ Bo tomimbihu batanga lowatia botie, Eeya malo luwangai olaatia wolo rohu-Lio wau kawasaa-Lio. Watia yilohia lo Eeya huhama pasali u aadili, wau olo obobuheli u mopoi̒laalo ode taulo Isirai̒lu duduu-sawaalo u mapilo hutulio.

⁹ Dungohiilo tataa-heyaalo lowatia botie, wuu timongoli tahi kawaasawa to Isirai̒lu tamolonuo̒ u aadili wau helopo loloombulia u otutu.

¹⁰ Timongoli helo mongu Yerusalemu, kota lo Allahu Taa̒ala, patopatoa̒ to polomatea mate-mateelo mao̒ wau odiila aadili.

¹¹ Tahipo ngawasawa kota helo malentao̒ u moo̒tapu mai doi solooi̒, mongo iimamu helo ngaajali butoo̒ lo Eeya duo̒lo wuupa, wau mongonabi hipohilea potuhata monto Allahu Taa̒ala u moo̒tapu mao̒ doi – lapatao̒ timongolio ngoa̒amila hipo lontobua deu̒ Eeya lotiwambao̒ ode limongolio. Timongolio hemoloi̒ya, “Eeya woluo to huunginto; ito diila tao̒dungga lobaala hidala-dalaala.”

¹² Sababu ololeetumu boito, Sion mapadeo̒lio debo odelo halabolu, Yerusalemu mamowali huntua lotuodu, wau huludu Bele lo Eeya mamowali huta u datahu wau luasi u pilobutua lo aa̒a-yuwaalo kekeei̒.