MIKHA 1 - KITABI HABARI MOPIOHE

¹ Tei Mikha asaliilio mai lonto kota tuwau mooyoto, u ilunte Moresyet. Tomaasa lipu lo Yehuda pilalenta tutuuntunga mola li Olongia Yotam, Ahas wolei Hiskia, tei Mikha lololimo tahuli lo Eeya pasali lo Samaria wau Yerusalemu.

Lapali hilimuta duo̒lo Samaria wau Yerusalemu

² Dungohiilo, wuu babaa-ngusawalo! Poo̒tuotilo, wuu tuango lipu ngoilanggubu dunia! Eeya Taa Laba-labaalo molanggato dungga-dungga mai odelo sakusi moluwali olimongoli ngoa̒amilalo! Dungohiilo Eeya motahuda mai monto Belee-Lio u mantali tosologa.

³ Eeya lotuhutai lonto piloti biluloa̒a-Lio u mantali wau lolontale toitaato boboo-litutuo̒walo hui̒du todunia.

⁴ Huhuu-ideyaalo lodidi towalungo baa̒a-Tio debo odelo talu todelomo tulu u lei̒-lei̒ita; hutalio yiloohu ode luluu-mbayaalo, debo odelo taluhee toitaato huludu tolotolohe mola ode walungo.

⁵ Ngoa̒amila boito mamotoduo sababu taulo Isirai̒lu odusa wau lomintaa̒ tingolo ode Allahu Taa̒ala. Tatoonu taloo̒ sababu Isirai̒lu ilodusa? Diila maa Samaria tiilo lokotaalio lohihilao? Tatoonu taloo̒ sababu Yehuda lolubo balaahala? Diila maa Yerusalemu lohihilao?

⁶ Uito sababuulio Eeya lotahuda, “Wau̒ mamopowali Samaria huntua lotuode tohuta datahu wau luasi, wau tambati lotau mopomulo bungo lo angguru. Tuodio lokota boito matapilo-U̒ ode delomo lumbaya wau wuwuu-mbatio mabonggaliyo-U̒.

⁷ Bubuui̒lio u ohalaga maa̒ntuluwo-U̒, wau timii̒du balangi u wohi ode mongobua tao̒ tuugasi tokuili mapobuolo, wau ngoa̒amila balaahalalio po-binasaalo. Babaa-langiyalo boito yito tilapulo ibaadatilio ode dewa u molomiodu. Botia ngoa̒amilalo boito mabintao̒ lo mumuu-suulio duo̒lo dewo sukuru ode dedeewaalo limongolio.”

⁸ Sababu uito watia, Mikha, siluukali lohilao wau lopoilaalo suusa. Watia mamonao̒ diila o pakeyangi wau diila o wapidu oa̒ato u mopobiloheo̒ deu̒ mailaba suukalilio hilaa lowatia. Watia mamo heuwanga debo odelo opula lo oa̒ayua wau mokokodako debo odelo bulungi unta.

⁹ Sababu papaa-liyaalo Samaria diila mowali moluli, Yehuda mao̒dungga lo paladu u tutuuwauwa. Baala malei dungga ode Yerusalemu, huhebu hulubangi pilohuluta loduhu lo bangusaau̒.

Musu wimbideo̒ meidungga ode Yerusalemu

¹⁰ Diila mao̒ poo̒taa ode mumuu-suunto to Gat pasali lo baalaanto; diila mao̒ polulia timongolio moo̒onto olimongoli hiyo-hiyoongo. Wuu ulipu lo Bet-Le-Apra, potililidulo mola todelomo peaahuo̒ odelo tuoto lopulito halapani!

¹¹ Timongoli ulipu lo Sapiri, pomonggatolo ode polayahu wolo diila opakeyangi wau wolo laasa moolito! Tau-tauwalo Jaa̒nan diila buheli lumualao̒ monto kota limongolio. Wuwaatio̒ ulipu lo Bet-Haejel mopobilohei olemu deu̒ mola teto diilalo woluo poloduo̒la.

¹² Baala monto Eeya malei dungga totalu lohuhebu hulubangi lo Yerusalemu! Sababu uito, diila pongalo aakali taulo Marot meibantu.

¹³ Timongoli ulipu lo Lakhis, poluliaalo mao̒ wadala tokaleta lo popaatea! Timongoli loo̒baaya duduu-sawaalo u pilohutu to Isirai̒lu tunggula loo̒sababu Yerusalemu olo ilodusa.

¹⁴ Botia, wuu taulo Yehuda timongoli mao̒olia lokota Moresyet-Gat. Mongo olongia lo Isirai̒lu diilalo moo̒tapu tulungi monto kota lo Akhjib.

¹⁵ Wuu taulo Maresya, Eeya mamohudu olimongoli ode musu tao̒hilaa mopotaa̒luku kotaamu. Mongo tau̒wa lo Isirai̒lu tao̒kawasa mamotituuo̒ todelomo gogoowaalo to Adulam.

¹⁶ Wuu taulo Yehuda, huntingilo huwou̒mu odelo tuoto motilimi duo̒lo mongo walau̒mu tao̒tolia̒ngi mongoli. Uluheelo lunggongumu tunggula dayato debo odelo bulungi moongaala milate, sababu mongo walau̒mu mabintao̒lo ode polayahu.