MATIUSI 9 - KITABI HABARI MOPIOHE

Ti Isa lopoo̒luli ngotaalio tadidu mowali monao̒

¹ Ti Isa malo titae̒ tobulotu, tulusi lobalango bulalo, wau lohualingo ode tambati pilohuluta loduhu-Lio.

² Mota teto tau lodelo mao̒ ode o-Lio ngotaalio tadidu mowali monao̒ balabalata to amongo. Tou̒ ti Isa loo̒onto malo odito udaa̒ iimani lotau-tauwalo boito, Tio malo tahuda ode tadidu mowali monao̒ boito, “Posabalilo, walau̒u-U̒! Duduu-saamu mai̒lambungu.”

³ Dengolo lota guru lo agama tawoluo teto mahipo loi̒yawa todelomo hilaa limongolio, “Tau botie hemohina Allahu Taa̒ala!”

⁴ Otaawa li Isa pikiilangi limongolio, oditolio Tio malo tahuda, “Yilongola pikiilangi limongoli malo odito leetio?

⁵ Toonu ulebe gambangi: motahuda mao̒, ‘Dusamu mai̒lambungu’, meaalo motahuda mao̒, ‘Pobongulo wau ponao̒lo’?

⁶ Bo botia Wau̒ mamopo bukuti mai olemu deu̒ todunia botie Walao̒ Manusia okawasa mongambungu dusa.” Lapatao̒ ti Isa lotahuda mao̒ ode taa didu mowali monao̒ boito, “Pobongulo, bintaa̒lo amongumu wau pohualingolo!”

⁷ Taa didu wowali monao̒ boito malobongu wau lohualinga ode belelio.

⁸ Tou̒ tau-tauwalo loo̒onto mao̒ ulotoduo boito, timongolio mailoohe wau helomuji Allahu Taa̒ala, sababu Allahu Taa̒ala malongohi mai kawasa u odito udaa̒lio ode manusia.

Ti Isa lotianga olei Matiusi

⁹ Lapatao̒ ti Isa lololaa mao̒ tambati boito. Tou̒ donggo nao̒nao̒, Tio loo̒onto ngotaalio tamootagia beya, tai̒lunte Matiusi, donggo hulohuloa̒a tokantoli lobeyalio. Ti Isa lotahuda mao̒ olio, “Dulo dudui̒ mai Wau̒!” Yi tei Matiusi matilimihulo wau loduduo̒ li Isa.

¹⁰ Tou̒ ti Isa donggo hemo lamela tobele lei Matiusi, malonao̒ mai ngohuntua tamootagia beya wau tau-tauwalo tahe anggapuo diila mopiohu lo ulipu, lodudua̒ lolamela pee̒-pee̒enta woli Isa wau tahidudua̒ o-Lio.

¹¹ Woluo tau-tauwalo Parisi taloo̒onto mao̒ sua̒li boito. Wau timongolio malohintu to tahidudua̒ li Isa, “Wolo sababuulio gurumu hemo lamela pee̒-pee̒nta wolo tamootagia beya wau tau-tauwalo tadiila hipiohe?”

¹² Ti Isa loo̒dungohe yiyintu limongolio boito tulusi lolametao̒, “Taa seehati diila momalalu dokuteli, bo taa u mongongoto wambao̒.

¹³ Tuletea mao̒ wolo boliilo ayati lokitabi botie: ‘Wau̒ mokahandaki odehu hilao, wau diila bake lo binatangi’. Sababu Wau̒ dungga-dungga mai diila mai motianga taa u monganggapu batangalio malopiohe, bo totaaa anggapuolio hina.”

Polosua̒li lou̒ mopuasa

¹⁴ Lapatao̒ uito tahidudua̒ olei Yahya Tamopolihua lonao̒ mai odeli Isa. Tulusi timongolio malohintu, “Yilongola amiaatia wau tau-tauwalo Parisi hemo puasa hiambola tahidudua̒ li Paaa̒ diila?”

¹⁵ Ti Isa lolametao̒, “Woloolo mola huhama limongoli? Tingga mowali tahe tiloduo to potihunggu lonika boito motisuukali lohilao wonu tibulentiti lai̒ donggo woluo pee̒-pee̒enta woli mongolio? Tantu diila! Bo mamei dungga wakutuulio tibulentiti lai̒ boito mahamaalio monto olimongolio. Tou̒ boito deu̒ito timongolio mamo puasa.

¹⁶ Diaaluo tau u momambola boo̒ u madeedelo wolo kaingi ngopita udonggo bohu. Sababu kaingi pomambola boito mamowali umonggolongo wau mongedenga boo̒ boito tilinggula mamoo̒ sababu kaidingio lebe mao̒ motanggalo.

¹⁷ Odito olo diaaluo taa u moluango angguru bohu todelomo bututu lowalito u deedelo. Sababu bututu boito mamobutao̒ wau molusa, tulusi anggurulio mamohua̒yadu. Angguru bohu musi tuangola tobututu bohu olo, alihu duduluolo debo mopiohu.”

Walao̒ lotau̒wa bele potabiaalo wau Taabua talo dedeta li Isa

¹⁸ Tou̒ ti Isa donggo hemo tahuda ode tahidudua̒ olei Yahya Tamopolihua, malonao̒ mai tau̒wa ngota lobele potabiaalo. Tio malo tibonggohuu̒ totalu li Isa wau loloi̒ya mao̒, “Walao̒ watia taabua boheli yilate mola. Bo, ambunguolo potala ti Paaa̒ monao̒ mota modedeta olio alihu tio muli tumumulai.”

¹⁹ Ti Isa lato tilimihulao̒ wau pee̒-pee̒enta wolo tahidudua̒ o-Lio malonao̒ mota wolo tau boito.

^20-21 Tohuungo dalaalo taabua ngota tamaa mopulaa dulo taunu hiheolio mongongoto hepobaa̒ta loduhu u aa̒aita wolo dulahio, lohimbideo̒ loli wulea li Isa. To pikiilangilio, “Asali wau̒ bo moo̒ dedeta jumba-Lio, wau̒ mamoluli.” Tulusi tio malo dedeta biihu jumba li Isa.

²² Tou̒ boito ti Isa loili mao̒ wau loo̒onto taabua boito tulusi lotahuda olio, “Posabalilo, walau̒u-U̒! Kalana yio̒ walau̒u-U̒ palacaya ola-U̒, yio̒ mamoluli!” Tou̒ boitolo mola taabua boito loluli.

²³ Lapatao̒ ti Isa leidungga mota ode tau̒wa lobele potabiaalo boito. Tou̒ ti Isa loo̒onto tahi poitoheya muusiki polo tilimi wau dadaata tau hibuluhuta,

²⁴ yi ti Isa lotahuda mao̒ olimongolio, “Lualao̒ timongoli ngoa̒amila! Walao̒ botie diila yilate; tio bo tuutuluhu.” Ti Isa bo heilii̒ya limongolio ngoa̒amila.

²⁵ Tou̒ tau-tauwalo boito mailumualo, ti Isa tilumuwoto ode delomo huwali lo walao̒ boito wau lodihu mao̒ uluu̒lio. Tulusi walao̒ taabua boito malobongu.

²⁶ Habari boito lololadu lomola ode ngoilanggubu madala boito.

Ti Isa lopoo̒luli tapitoo̒ duulota

²⁷ Ti Isa malonao̒ lonteeto wau tohuungo dalalo tapitoo̒ duulota lodudua̒ o-Lio. Timongolio hiwaatia̒, “Walae̒e Dauda, ponua mai amiaatia!”

²⁸ Tou̒ ti Isa tilumuwoto ode delomo bele, tapitoo̒ duulota boito lonao̒ mai ode o-Lio. Ti Isa lohintu mao̒ olimongolio, “Wolo timongoli palacaya deu̒ Wau̒ mowali mopoo̒luli mao̒ olimongoli?” “Palacaya, Paaa̒!” tametao̒ limongolio.

²⁹ Lapatao̒ ti Isa malo dedeta mato limongolio wau lotahuda mao̒, “Kalana timongoli palacaya, motoduwolo mai wolo u hehalapuo limongoli.”

³⁰ Yi timongolio malowali loo̒onto. Ti Isa malo poe̒elao̒ olimongolio wolo pintalo, alihu timongolio diila mopoo̒taa sua̒li boito penu boli olo tatoonu.

³¹ Bo timongolio malonao̒ wau helo pololadu lomola habari pasali li Isa ode ngoilanggubu madala.

Ti Isa lopoo̒luli taabubu

³² Tou̒ taduulota boito malonao̒, taabubu ngota takiluwasa lorohu u moleeto dilelolio mai odeli Isa.

³³ Ti Isa lopolahi mao̒ rohu u moleeto boito wau tosaaa̒tilo boito tau boito malowali lobisala. Taa dadaata boito malo linggolabe wau hipo loi̒yawa, “Diipo pee̒enta mao̒ ami heloo̒onto ulotoduo mai debo odelo utie to Isirai̒lu!”

³⁴ Bo tau-tauwalo Parisi hipo loi̒yawa, “Tau̒wa lo roroo-huwaalo u moleeto boitolo tahe longohi kawasa o-Lio u mopolahi roroo-huwaalo u moleeto boito.”

Ti Isa lodehu hilaa-Lio loo̒onto taa dadaata

³⁵ Odi-odieelo mola ti Isa helo lontale lonto madala tuwau ode madala uwewo wau lonto kambungu tuwau ode kambungu uwewo. Tio helo ngaajali to bebee-leyaalo potabiaalo, wau helo pololadu Habari Mopiohe pasali lou̒ woloolo mola Allahu Taa̒ala momalenta odelo Olongia. Tio helo poo̒luli tau-tauwalo tahi duutola longongoto u hidala-dalaala wau tao̒ aibu batanga.

³⁶ Tou̒ ti Isa loo̒onto taa dadaata boito, malodehu hilaa-Lio olimongolio, sababu didu tantu hilaa limongolio wau didu olootolo, debo odelo himba u diilalo odiiti.

³⁷ Lapatao̒ ti Isa lotahuda mao̒ to tahidudua̒ o-Lio. “Tilapulio dadaata, bo taa u mongotolo mao̒ bo ngoi̒di.

³⁸ Sababu uito pohilea mao̒ totaa ohuu̒wo lo ilengi boito alihu molao mai tamongotolo duo̒lo tilapulio.”