MATIUSI 6 - KITABI HABARI MOPIOHE

Nasehati pasali lou̒ mosadaka

¹ “Eelai mao̒, diila pohutua limongoli u pilopo wajibu lo agama totalu lotaa dadaata alihu oontonga lotau. Wonu timongoli mohutu u odito, yi timongoli diila tawohia lo Allahu Taa̒ala limongoli wuupa monto sologa.

² Oditolio, wonu timongoli mongohi sadaka ode taa mosikini diila mao̒ pololade sua̒li boito debo odelo u hepohutuo lotau-tauwalo tahi munapikia. Timongolio yinao mohutu u odito todelomo bele potabiaalo wau to dalala daa̒ alihu pujio lotau. Eelai mao̒, timongolio malo lolimo wuupalio.

³ Bo timongoli, wonu timongoli mongohi sadaka, wohia mao̒ wolo poo̒-poo̒oyo, tilinggula diaaluo tamotota.

⁴ Huliaalo mao̒ huhutuumu boito diila otaawa boli lotatoonu, ngopohia Allahu Taa̒ala limongoli tosologa. Allahu Taa̒ala moo̒onto mai huhutuumu u tuutuo̒ boito wau mamongohi mai wuupa olemu.”

Nasehati pasali lou̒ modua̒

⁵ “Wonu timongoli modua̒, diila mao̒ potihutu debo odelo tahi munapikia. Timongolio motohilaa modua̒ hitihula tobele potabiaalo wau topotanga lodalalo alihu oontonga lotau. Eelai mao̒, ui-uitolo wuupa u matilolimo limongolio.

⁶ Bo wonu timongoli modua̒, tuwotao̒ ode huwali wau heu̒ti mai huhebu, wau podua̒alo mola ode Allahu Taa̒ala limongoli tadiila oontonga boito. Yi Allahu Taa̒ala limongoli tamoo̒onto huhutuumu u tuutuo̒ boito mamongohi mai wuupa olemu.

⁷ Wonu timongoli modua̒, diila mao̒ wulita wuwuulia tilinggula diaaluo bungolio wau huudio debo odelo tau-tauwalo tadiila hitooawa to Eeya. Timongolio hipo lantobua deu̒ hihiie limongolio madungohe-Lio sababu dua̒ limongolio u hayahayaa̒ boito.

⁸ Diila mao̒ potihutu debo odelo timongolio. Mai̒lotaawa lo Allahu Taa̒ala limongoli wolo upalaluo limongoli, tou̒ diipo pohile mola limongoli.

⁹ Oditolio podua̒alo mola odie, ‘Allahu Taa̒ala lo mongowatotia to Sologa: Eeyaalo Allahu Taa̒ala tabo Tuwa-tuwaulo. Pohileaala dua̒ Eeya tuboolo wau hulumatiolo.

¹⁰ Eeyaalo Olongia lo mongowatotia. Pohileaala dua̒ Eeya momalenta todunia wau kahandaki lo Eeya dungohelio debo odelo tosologa.

¹¹ Wuduwalo mai todulahee botie ua̒alo u palaluo lo mongowatotia.

¹² Ambungua mai mongowatotia monto totala lo mongowatotia, debo odelo mongowatotia malo ngambungu taa u ototala to mongowatotia.

¹³ Diila mao̒ polulia mai mongowatotia oolia lo palacaya tou̒ mongowatotia yimontalalio bo lopatalo mai mongowatotia monto kawasa lo Ibilisi. [Eeyaalo Olongia tao̒kawasa wau molamahu u ohiheo-hiheolo mao̒. Amien.]’

¹⁴ Wonu timongoli mongambungu tao̒totala tolimongoli, Allahu Taa̒ala limongoli tosologa olo mamo ngambungu mai totalamu.

¹⁵ Bo wonu timongoli diila mongambungu totala lotaa wewo, Allahu Taa̒ala limongoli tosologa olo diila mongambungu mai totalamu.”

Nasehati pasali lou̒ mopuasa

¹⁶ “Wonu timongoli mopuasa, diila mao̒ potihutoo̒ debo odelo tahi munapikia. Timongolio molomelo baya limongolio alihu ngoa̒amila tau motota deu̒ timongolio hipuasawa. Eelai mao̒, ui-uitolo wuupa u matilolimo limongolio.

¹⁷ Bo wonu timongoli mopuasa, polimamutao̒ wau heidi mola huwou̒mu,

¹⁸ alihu diaaluo tamotota deu̒ timongoli hipuasawa, ngopohia Allahu Taa̒ala limongoli tadiila oontonga boito wambao̒. Allahu Taa̒ala moo̒onto huhutuumu u tuutuo̒ boito wau mamongohi mai wuupa olemu.”

Halata tosologa

¹⁹ “Diila mao̒ pohimoa̒a halata ode batangamu todunia, tou̒toonu wale wau taato mowali mopolusa wau tamootao̒wa monao̒ mai motao̒ mao̒.

²⁰ Bolii̒o mao̒, pohimoo̒lo halata tosologa, tou̒toonu diaaluo wale wau taato u mopolusa wau tamootao̒wa diila monao̒ mai u motao̒ mao̒.

²¹ Sababu tou̒toonu halatamu teto olo hilaamu!”

Baango duo̒lo batanga

²² “Mato yito tohe lobatanga. Wonu matomu mobaango, ngoa̒amila batangamu mobaango daa̒.

²³ Bo wonu matomu pulauwolo ngoa̒amila batangamu modio̒loma daa̒. Oditolio wonu tohe todelomo batangamu boito modio̒lomo, donggo boli tontoyoo̒mo odio̒loma boito!”

Allahu Taa̒ala wau halata upango

²⁴ “Diaaluo penu boli ngota mao̒ tamowali mokalaja ode tuani duulota. Sababu tio maalebe motolia̒ngo ngotaalio wolo tawewo. Meaalo tio maalebe tatapu wau molotolo hilao toli tuani ngota wolo tawewo. Odito olo wolimongoli. Timongoli diila mowali mokalaja duo̒lo Allahu Taa̒ala wau duo̒lo halata upango olo.

²⁵ Sababu uito poo̒toloma mao̒: diila mao̒ polawalo pasali lou̒ potumulumu, deu̒ito-yito wolo umaa polameli mongoli wau uilumolo, meaalo wolo u mapomake limongoli. Diila matutumulo boito mongilabotao̒ wolo ua̒alo wau batanga boito wolo boo̒?

²⁶ Pomilohe mola bulungi to dulente. Bubuu-lungiyalo boito diila hipomuloa, diila hipolipua, wau diila olo hipohimoa̒ tilapula lou̒ pilomulolio todelomo yibungo. Penu boli odito Allahu Taa̒ala limongoli tosologa helo laalao̒ bubuu-lungiyalo boito! Wolo timongoli diila lebe ohalaga wolo bulungi?

²⁷ Tatoonu monto olimongoli tawolo ololawalio mowali mopohayaa̒ tutumulio penu boli ngoi̒di mao̒?

²⁸ Yilongola timongoli molawalo pasali lou̒ pomakemu? Poo̒tuoti mota bubuu-ngawaalo baakungi u hibutua tohuta datahu wau luasi. Bubuu-ngawaalo boito diila hipo kalajawa wau diila hipo hewola;

²⁹ Boti Olongia Salomo penu boli odito kayalio, diila helomake boo̒ debo odelo piohio lo bubuu-ngawaalo boito!

³⁰ Huo̒yoto tohuta datahu wau luasi mobutu mai todulahee botie wau loombulio mola pobuolio tunggula maahu. Bo Allahu Taa̒ala helo podadai huo̒yoto boito odito piohio. Tidiyolo mao̒ timongoli! Bo timongoli diila boti palacaya.

³¹ Diila mao̒ polawalo wau moloi̒ya, ‘Wolo umaa lamelonto’, meaalo ‘wolo u mailumonto’, meaalo ‘wolo umaa pomakento’?

³² Susuu-aliyaalo boito laito heilapita lotaa diila hitooawa lo Allahu Taa̒ala. Lebe-lebe pomao̒ Allahu Taa̒ala limongoli tato sologa motota deu̒ timongoli momalalu ngoa̒amilalo boito.

³³ Oditolio, potolo anipo meimulo alihu Allahu Taa̒ala momalenta mai tutumulumu wau pohutua mao̒ kahandaki-Lio. Yi, ngoa̒amila u wewolio mawohi mai lo Allahu Taa̒ala olo olemu.

³⁴ Masababu uito, diila mao̒ polawalo pasali lou̒ loombu. Sababu uloombu olo woluo ololawalio lohihilao. Dulahee otie malo tuuu̒de osuusalio, diilalo mao̒ duhengi.”