MATIUSI 5 - KITABI HABARI MOPIOHE

Hutuba tohuludu

¹ Tou̒ ti Isa loo̒onto taa dadaata boito, Tio lotao̒dee mola ode huludu. Lapatao̒ Tio malo tihuloa̒a, tahidudua̒ o-Lio lonao̒ mai ode o-Lio,

² tulusi Tio lolumulao̒ longaajali olimongolio:

Osanangi u tutuulio tutu

³ “Potisanangilo tutu tamolaasa diilalo okawasa wau bolo wambao̒ hemo tiwunela mola to Allahu Taa̒ala; timongolio yito pongawaa̒ umati lo Allahu Taa̒ala!

⁴ Potisanangilo tutu taa hisuukalia lohilao; Allahu Taa̒ala mamoliyango olimongolio!

⁵ Potisanangilo tutu taa hidupapawa lohilao; Allahu Taa̒ala mamo poo̒polu mai danti-Lio ode limongolio!

⁶ Potisanangilo tutu taa mooloolo mohutu kahandaki lo Allahu Taa̒ala; Allahu Taa̒ala mamohutu molaasa sanangi hilaa limongolio!

⁷ Potisanangilo tutu taa u motolia̒ngo taawewo; Allahu Taa̒ala mamomonu mai olimongolio olo!

⁸ Potisanangilo tutu taa mantali hilaalio; Timongolio mamoo̒onuhe Allahu Taa̒ala.

⁹ Potisanangilo tutu tamopo toduo dame towolota lomanusia; Allahu Taa̒ala mamomasisi mai olimongolio odelo mongo wala-I̒o!

¹⁰ Potisanangilo tutu taa modutolo poloa̒linaya sababu hemohutu kahandaki lo Allahu Taa̒ala; timongolio yito pongawaa̒ umati lo Allahu Taa̒ala!

¹¹ Potisanangilo tutu timongoli wonu henteo̒lio, alinayalio wau pitanaalio domi Wau̒.

¹² Mongo nabi tahitumula tou̒ dipo-dipolulio mai limongoli maa ilalinayalio olo debo odelo uito. Potiwengahulo wau potisanangilo, sababu udaa̒ pahala tosologa upilopo dapato lo Allahu Taa̒ala olimongoli.”

Watingo wau mobaango

¹³ “Timongoli watingo lodunia. Wonu watingo diilalo olamita, wolo donggo mowali poo̒ panggelolo? Diduluo mao̒ hunalio, bo mapomahulio wau podudutaa̒ lotau.

¹⁴ Timongoli yito baango dunia. Kota toitaato huludu diila mowali tuuo̒lo.

¹⁵ Diaaluo tamopo lei̒ita tohe, lapatao̒ molau̒be tohe boito wolo tombe. Tio tumbaa̒ mamopodutu mao̒ tohe boito totambati lotohe, alihu moo̒baango motii̒du tau todelomo bele.

¹⁶ Odito olo baangumu wajibu tinetinela totalu lotau, alihu timongolio moo̒onto totoonulalo huhutuumu u mopiohe, tulusi mamomuji mola Allahu Taa̒ala limongoli tosologa.”

Pongaajali pasali butoo̒ agama lo Yahudi

¹⁷ “Diila mao̒ ponganggapu deu̒ Wau̒ dungga-dungga mai moluluta butoe̒e Musa wau pongaajali lomongo nabi. Wau̒ dungga-dungga mai diila molulutao̒ uito, bo mai mopoi̒laalo mao̒ bolilio u otutuulio mao̒.

¹⁸ Poo̒toloma mao̒! Ngotilonggadu hulungo wau dunia donggo woluo, boli hulupu ngotahe meaalo bontoo̒ u pulito kikiio̒ todelomo butoo̒ boito, diila talulutolo, wonu ngoa̒amilalo diipo motoduo mai!

¹⁹ Masababu uito, titaalo tita tamo lambanga tala tuwau lo papaa-lentaalo boito, penu boli pulito ukikiio̒ wau mongaajali mao̒ taawewo mohutu olo u odito, mamowali tapulito ukikiio̒ towolota umati lo Allahu Taa̒ala. Bolii̒o mao̒, titaalo tita tamoponao̒ papaa-lentaalo boito wau mongaajali taawewo mohutu u odito olo, mamowali udaa̒ towolota umati lo Allahu Taa̒ala.

²⁰ Oditolio eelai mao̒: Timongoli diila pongalo aakali mowali umati lo Allahu Taa̒ala, wonu diila mongilabotao̒ guguu-ruwaalo agama wau tau-tauwalo Parisi todelomo sua̒li moponao̒ kahandaki lo Allahu Taa̒ala!”

Nasehati pasali lo oyiyingo

²¹ “Otaawa limongoli deu̒ toli nenemoyanto, woluo pongaajali debo odelo utie: Diila mao̒ pomate mate-mateelo mao̒; titaalo tita tamomate mate-mateelo mao̒, musi adiliyolo.

²² Bo botia potahuda-U̒ mai olimongoli, titaalo tita tamoingo taawewo, maa adiliyolo; wau titaalo tita tamomuayo taawewo, maa adiliyolo totalu lo Mahakama Agama. Wau titaalo tita moloi̒ya taawewo, ‘Mohulodu’, paatuti tapilola ode delomo tulu lonalaka.

²³ Masababu uito, wonu tala ngota towolota limongoli donggo hemo podewo wowohilio ode Allahu Taa̒ala, tulusi loo̒e̒ela mola deu̒ woluo taa mongongoto hilaa to olio,

²⁴ mamusi tolaaliopo dewolio boito totalu lotambati podewowalo, tulusi monao̒opo mota modameya wolo tau boito. De lapatio mao̒ uito, bolo tio mowali mohualingai mopodewo wowohilio ode Allahu Taa̒ala.

²⁵ Humayaalio woluo taa mopodulohe olimongoli ode mahakama, podameyapo wolio ngotilonggadu timongoli donggo owakutu tou̒ diipo meidungga mota ode mahakama. Wonu diila, tau boito mamohudu olimongoli ode hakimu, tamamohudu mao̒ olimongoli ode pulisi. Lapatao̒ pulisi mamopo tuwoto olimongoli ode delomo tutupa.

²⁶ Wau poo̒toloma mao̒: Tantu timongoli diila tamoo̒ lualai monto tutupa boito, tou̒ diipo moo̒bayali sama-samaata ngoa̒amila dintamu boito.”

Pasali lou̒ mojina

²⁷ “Otaawa limongoli deu̒ woluo pongaajali debo odelo utie: Diila mao̒ pojina.

²⁸ Bo botia Wau̒ motahuda mai olemu: titaalo tita molontongo taabua ngota wau lohuo̒ hilaalio, yi tau boito malojina wolo taabua boito todelomo hilaalio.

²⁹ Wonu matomu olowala moo̒sababu olemu mohutu dusa, luo̒heelo wau tapilalo botu lomato boito! Lebe mopioheo̒ oolia tala tuwau lo pongawaa̒mu lou̒ ngangaawaa̒lo mao̒ matapilo-Lio ode delomo nalaka.

³⁰ Wonu uluu̒mu olowala moo̒sababu olemu mohutu dusa, putua mao̒ tapilalo uluu̒ boito! Lebe mopioheo̒ oolia lo uluu̒mu ngotuwali lou̒ ngangaawaa̒lo mao̒ tumuwoto ode nalaka.”

Pasali logu motalaki

³¹ “Woluo olo pongaajali debo odelo utie: motii̒du taa u motalaki dilelio tabua, patuti mongohi mao̒ tuladu talaki olio.

³² Bo botia potahuda-U̒ mai olemu: titaalo tita tamo talaki dilelio lebe-lebe pomao̒ taabua boito diila lohama pipia, moo̒sababu dilelio boito mojina, wonu dilelio boito muli monika. Wau titaalo tita tamonika wolo taabua tatilalaki boito, yi tio olo malojina.”

Pasali lou̒ motadia

³³ “Otaawa limongoli deu̒ toli nenemoyanto woluo pongaajali debo odelo utie: diila mao̒ pomalonga danti. Wolo u mapilo dantimu wolo tadia totalu lo Allahu Taa̒ala, musi pohutuwomu mao̒.

³⁴ Bo botia potahuda-U̒ mai olemu: diila mao̒ potadia sama-samaata, mopio domi hulungo, sababu hulungo yito tambati huhuloa̒ lo Allahu Taa̒ala,

³⁵ meaalo domi dunia, sababu dunia yito wapidu oa̒a-Tio; meaalo domi Yerusalemu, sababu ui-uitolo kota li Olongia daa̒.

³⁶ Diila mao̒ potadia olo domi lunggongumu, sababu yio̒ lohihilao diila mowali mohutu huwou̒mu mowali hula meaalo mowali moitomo, penu boli ngopata mao̒.

³⁷ Loi̒yaalo mao̒ wambao̒, ‘Ooo̒’ meaalo ‘Diila’ – lebe mao̒ leeto dudunggalio mai monto ibilisi.”

Nasehati pasali lo polomalasi

³⁸ “Otaawa limongoli deu̒ woluo olo pongaajali debo odelo utie: mato tuloa̒ala lomato, dungito tuloa̒ala lodungito.

³⁹ Bo botia potahuda-U̒ mai olimongoli: diila mao̒ poniyati totaau hipohutua u moleeto to olemu. Bolii̒o mao̒ wonu woluo tau molambali putongimu olowala polulia mao̒ tio molambali olo putongimu oloihi.

⁴⁰ Wau wonu woluo tau mopodulohe olimongoli ode butoo̒ wau mohile wolo moo̒ohuu̒ boo̒mu, wohia mao̒ jumbamu olo to olio.

⁴¹ Wonu ngotaalio takawa-kawasa momakusa olimongoli momota balangilio ngokilo lamingio, potaala mao̒ tunggula dulo kilo lamingio.

⁴² Wonu tau mohile u hitua-tuawua to olemu, wohia mao̒ tio. Wau diila mao̒ potoulia olo taa motohilaa mobulota u hitua-tuawua monto olemu.”

Motolia̒ngo tomusu

⁴³ “Otaawa limongoli deu̒ woluo olo pongaajali debo odelo utie; tolia̒nga mao̒ mongo sahabatimu wau oingoi mao̒ mongo satulumu.

⁴⁴ Bo botia potahuda-U̒ mai olimongoli: tolia̒nga mao̒ mongo satulumu, wau dua̒i mola tau-tauwalo tahipo ngalinayawa olimongoli,

⁴⁵ Alihu timongoli mowali mongo walao̒ Allahu Taa̒ala limongoli tato sologa. Sababu Allahu Taa̒ala mopobutu mai mato lodula-Hio ode taa u mopiohe wau ode taa u moleeto olo. Allahu Taa̒ala mopo tuhutai didi ode taa hipohutua u otutu wau ode taa hipohutua umoleeta olo.

⁴⁶ Sababu wonu timongoli motolia̒ngo bo taa motolia̒ngi mongoli wambao̒, pongola Allahu Taa̒ala musi molontuli mai huhutuumu boito? Diila odito olo u hepilohutu lo tahipo tagia beya?

⁴⁷ Wau wonu timongoli mongohi mao̒ salamu bo tomongo sahabatimu wambai̒o, wolo hebatilio? Tau-tauwalo tadiila hitotaawa to Allahu Taa̒ala olo hipohutua odito!

⁴⁸ Allahu Taa̒ala limongoli tosologa momonu mai ngoa̒amila tau wolo wimu-wimumuto ngoa̒milalo. Timongoli olo musi odito.”