MATIUSI 4 - KITABI HABARI MOPIOHE

Ti Isa Yilimontala lo Ibilisi

¹ Lapatao̒ ti Isa dilelo lo Rohullah ode huta datahu u luasi daa̒ wau delita alihu mola yimontala lo Ibilisi.

² Wopato pulu hui ti Isa diila lolamela. Lapatao̒ Tio mapilolango.

³ Ibilisi lonao̒ mai ode o-Lio wau loloi̒ya mao̒, “Yio̒ botie Walao̒ Allahu Taa̒ala, diila odito? Nte ahuli mao̒ boboo-tuwaalo botie mowali roti.”

⁴ Ti Isa lolametao̒, “Todelomo Kitabi tulatulade: Manusia diila moo̒tumulo bo wolo roti wambao̒, bo olo monto motii̒du pilimani u pilotahuda mai lo Allahu Taa̒ala.”

⁵ Lapatao̒ uito ti Isa dilelo lo Ibilisi ode Yerusalemu, tokota mantali, wau pilopo tihulio Tio tobilinga Bele lo Eeya.

⁶ Lapatao̒ Ibilisi loloi̒ya mao̒ o-Lio, “Yio̒ botie Walao̒ Allahu Taa̒ala, diila odito? Wonu odito potidehulo mola ode walungo; sababu todelomo kitabi woluo tulatulade odie, ‘Allahu Taa̒ala mamopoa̒hu mai mamaa-lai̒kati-Lio moduo̒la ole-Mu, timongolio mamo langgomo ole-Mu wolo uluu̒ limongolio, alihu oa̒atu-Mu diila meiteduo̒ tobotu.’ ”

⁷ Ti Isa lolametao̒, “Bo todelomo Kitabi tulatulade olo, ‘Diila mowali yio̒ mohimontala Allahu Taa̒ala Eeyaamu.’ ”

⁸ Lapatao̒ Ibilisi luli lodelo mola li Isa ode hui̒dee molanggato daa̒ wau lopobilohe o-Lio ngoa̒amila bele biluloa̒ saaha li olongia todunia wolo okokayalio.

⁹ Lapatao̒ loloi̒ya mao̒ Ibilisi odeli Isa, “Ngoa̒amila botie mawohiu̒ mai ole-Mu, wonu Yio̒ mosujudu molubo olau̒.”

¹⁰ Ti Isa lolametao̒, “Pohinggi mao̒ yio̒, wuu Tamoo-heingawa ode dusa! Todelomo Kitabi tulatulade: Tubowa mola Allahu Taa̒ala Eeyaamu, wau pomayaalo to Eeya wambao̒!”

¹¹ Mapulitio Ibilisi lololaa mao̒ li Isa, wau mamaa-lai̒katiyalo lonao̒ mai lohinta li Isa.

Ti Isa lolumulo kalajaa-Lio to Galilea

¹² Tou̒ loo̒dungohe deu̒ tei Yahya mapilo tuwotio ode delomo tutupa, ti Isa malolahi ode Galilea.

¹³ Tilolaa-Lio mao̒ Najaret, tulusi mola lotibiluloa̒ to Kapernaum tobiihu lo Bulalo Galilea tomadala Jebulon wau Naputali.

¹⁴ Sababu ti Isa lohutu mao̒ suali boito, malo toduo wolo uiloi̒ya li Nabi Yesaya:

¹⁵ “Huta lei Jebulon wau huta lei Naputali, todalalo ode bulalo, to ngotuwali lo Dutulaa Yordan, Galilea huta lotaa diila Yahudi!

¹⁶ Bangusa tatumu-tumula todelomo u modio̒lomo maloo̒onto tinelo ulaba-labaalo motinelo! Duo̒lo tapoo̒-poo̒oyo todelomo lipu lomautu malobutu mai tinelo u mobaango!”

¹⁷ Tumulalo mai tou̒ boito ti Isa lolumula lopo habari, “Polilihulo monto duduu-sawaalo limongoli, sababu Allahu Taa̒ala mahua̒a momalenta odelo Olongia!”

Ti Isa lotianga wopatota tamoohalawa

¹⁸ Tou̒ ti Isa donggo nao̒nao̒ topentadu lo Bulalo Galilea, Tio loo̒onto duulota tamoohalawa, deu̒ito-yito tei Simon (tai̒lunte olo Petrus) wolo wutatio, tei Andreas. Timongolio donggo hipoheu̒pa tola tobulalo boito wolo pajala.

¹⁹ Ti Isa lotahuda mao̒ olimongolio, “Dulo dudui̒ mai Wau̒. Wau̒ mamo ngaajali mai olimongoli momajala tau.”

²⁰ Tulusi timongolio malo lolaa mao̒ pajala limongolio wau loduduo̒ li Isa.

²¹ Ti Isa lonao̒ tulusi, lapatao̒ loo̒onto poli taduulota mohutato wewo, deu̒ito-yito tei Yakobus wolei Yahya, mongo walae̒e Jebedeus. Timongolio pee̒-pee̒nta woliyamo limongolio donggo hemo poo̒piohe pajala todelomo bulotu. Ti Isa olo lotianga olimongolio,

²² wau timongolio hua̒a lololaa mao̒ bulotu woliyamo limongolio, lapatao̒ loduduo̒ li Isa.

Ti Isa helo ngaajali, helo hutuba, wau lopoo̒luli tau

²³ To Galilea, ti Isa lomalito ngoilanggubu lipu wau helo ngaajali to bebee-leyaalo u potabiaalo. Tio helo pohabari Habari Mopiohe deu̒ Allahu Taa̒ala mamomalenta. Wau Tio olo helo poo̒luli tahi ngongota wau tahi o aibua.

²⁴ Habari pasali li Isa boito malo loladu to ngoilanggubu lipu lo Siria, tilinggula dadaata taa lonao̒ mai ode o-Lio. Timongolio lodelo mai tau-tauwalo tahi duutola totoonulalo ngongoto u hidala-dalaala wau tahi suusawa. Tau-tauwalo tai̒lo tuanga lorohu u moleeto, tahe dudeetolo, didu mowali monao̒, ngoa̒amilalo piloo̒luli li Isa.

²⁵ Ngohuntua daa̒ tau talo duduo̒ li Isa tou̒ boito. Woluo talonto Galilea, woluo talonto Mopuulo Kota, lonto Yudea, wau woluo olo talonto lipu to ngotuwali lo Yordan.