MATIUSI 28 - KITABI HABARI MOPIOHE

Obobongu mai li Isa

¹ Tou̒ malo paluto dulahu Saabati, todulahu Ahadi donggo molaliyonu, ti Maria Mahadalena wau ti Maria wewolio boito lonao̒ mola lomilohe kuubulu boito.

² Debolo lotoduwolo mola liluhu ulaba-labaalo tutu. Malai̒kati ngota lo Eeya lotuhutai lonto sologa tulusi lopo lilideo̒ heu̒to botu boito wau lotihuloa̒a totudulio.

³ Baya lo malai̒kati boito debo odelo ilato, wau boo̒lio moputio̒ daa̒.

⁴ Suludadu tamoo-kawalia tahemodaha teto mailoohe daa̒ tilinggula timongolio hulu-huluhelio, wau lotambuti debo odelo milate.

⁵ Malai̒kati boito loloi̒ya mao̒ ode mongobua boito, “Diila oohe! Otaawau̒ timongoli hemo lolohe li Isa tamaa silalipulio boito.

⁶ Ti Isa diaaluo teea. Ti Isa malobongu debo odelo upilo tahuda-Lio muloololio mai. Dulo mai bilohi tambati u pilopo wulide o-Lio.

⁷ Botia, hua̒a ponao̒lo, mola polelea to tahidudua̒ o-Lio, ‘Tio malobongu, wau masaatia Tio maleimulo mola woli mongoli ode Galilea. Mola teto timongoli mamoo̒onto o-Lio!’ Poo̒toloma mao̒ wolo umaa piloleleu̒ mai olimongoli.”

⁸ Mahi alihe mongobua boito lololaa mao̒ kuubulu boito. Lou̒ laasa duiduito uu̒ulambohe wolo wengahu, timongolio mahitetea̒ mola lopo habari umalo toduo boito to tahidudua̒ li Isa.

⁹ Debolo ti Isa mai lodunggaya wolo mongobua boito, wau lotahuda mao̒, “Salamu!” Lapatao̒ timongolio malo himbideo̒ o-Lio, tulusi longoo̒de oa̒a-Tio wau lolubo o-Lio.

¹⁰ “Diila oohe,” tahuda li Isa ode limongolio, “ponao̒lo mola polelea mao̒ tomongo wutatu-U̒ alihu timongolio ode Galilea; mola teto timongolio mamoo̒onto ola-U̒.”

Dudulohu lo suludadu tamoo-kawalia

¹¹ Tou̒ mongobua boito malonao̒, dengolo lota suludadu tamoo-kawalia tahemodaha kuubulu boito luli lohualinga ode kota wau lopodulohe tomongo iimamu tau̒wa ngoa̒amila u lotoduo boito.

¹² Mongo iimamu tau̒wa boito malo dulohupa wolo mongo tau̒wa lo Yahudi, tulusi longohi mao̒ ngojumula daa̒ doi ode suludadu tamoo-kawalia boito,

¹³ wau loloi̒ya, “Timongoli musi moloi̒ya mao̒ deu̒ tahidudua̒ li Isa malonao̒ mai tou̒ hui wau mai lotao̒ milate li Isa tou̒ timongoli donggo hituluhe.

¹⁴ Wau wonu tigubolonulu moo̒dungohe sua̒li boito, mapiyoo lami tio alihu timongoli diila moo̒tapu totolo wolo-wolo.”

¹⁵ Yi suludadu tamoo-kawalia boito malohama doi boito, wau lohutu debo odelo u pilolahuli mao̒ olimongolio. Masababu uito wungguli boito donggo lolaloladu towolota taulo Yahudi tunggula todulahee botie.

Ti Isa lopobilohe batanga-Lio to tahidudua̒ o-Lio

¹⁶ Tamopulaa tuwau lota muri li Isa boito lonao̒ mola ode huludu to Galilea lotuuu̒de lou̒ pilomalenta li Isa olimongolio.

¹⁷ Tou̒ timongolio loo̒onto li Isa mola teto, timongolio malo sujudu lolubo o-Lio. Bo woluo towolota limongolio tadiila boti palacaya.

¹⁸ Ti Isa lohimbideo̒ olimongolio wau lotahuda mao̒, “Ngoa̒amila kawasa tosologa wau todunia mailudu-Lio mai ola-U̒.

¹⁹ Sababu uito ponao̒lo ode ngoa̒amilalo bangusa to ngoilanggubu dunia, pohutua mao̒ timongolio mowali muri-U̒. Wau lihua mao̒ timongolio lou̒ molanggula tangguli Paapa, wau Walao̒, wau Rohullah.

²⁰ Ajaalia mao̒ timongolio modungohe ngoa̒amila u mapilo malenta-U̒ mai olimongoli. Wau eelai mao̒ Wau̒ malaito pee̒-pee̒enta woli mongoli demola pulito lojamani.” 116