MATIUSI 19 - KITABI HABARI MOPIOHE

Pongaajali li Isa pasali lou̒ motalaki

¹ Lapatao̒ ti Isa yilapato lotahuda mao̒ ngoa̒amilalo boito, Tio lololaa mao̒ Galilea tulusi lonao̒ ode madala lo Yudea to ngotuwali lo Dutulaa Yordan.

² Dadaata talo dudua̒ o-Lio, wau Tio malo poo̒luli olimongolio mota teto.

³ Lapatao̒ tau-tauwalo Parisi lonao̒ mai lopotala o-Lio. Timongolio helohintu, “Modudua̒ butoo̒ lo agamanto, tingga mowali ngotaalio motalaki dilelio taabua penu boli alasani wolo wambai̒o?”

⁴ Ti Isa lolametao̒, “Wolo diipo pilobaca limongoli todelomo Kitabi deu̒ Allahu Taa̒ala talo powali manusia, tou̒ bohulio mai helo powali olimongolio talolai̒ wau taabua?

⁵ Wau lapatao̒ uito Tio lotahuda, ‘Uito sababuulio talolai̒ mololaa mao̒ oliilolio wau oliyamolio wau motituwau wolo dilelio, yi duduulotalo mowali tuwau.’

⁶ Oditolio timongolio diilalo duulota, bo ngota. Uito sababuulio wolo u mapilopo tuwau lo Allahu Taa̒ala diila mowali talakia lomanusia.”

⁷ Lapatao̒ tau-tauwalo Parisi lohintu o-Lio, “Wonu odito yilongola tei Musa lei̒wohi totau tuladu talaki ode dile taabua taa tilalakilio boito?”

⁸ Ti Isa lolametao̒, “Tei Musa mopoluasi olimongoli motalaki dilemu taabua sababu timongoli mototolo daa̒ ajaliyolo. Bo tutuulio tutu diila odito tou̒ bohulio mai.

⁹ Oditolio, dungohi mao̒ utie: Titaalo tita tamotalaki dilelio – lebe-lebe pomao̒ taabua boito diila lohama pipia – lapatao̒ monika poli wolo taabua wewo, yi tau boito malojina.”

¹⁰ Yi tahidudua̒ li Isa malo loi̒ya o-Lio, “Wonu sua̒li lou̒ wumbuta lo motolo dilea yito debo odelo uito, lebe mopiohu diila ponika.”

¹¹ Ti Isa lolametao̒, “Diila ngoa̒amila tau moo̒ tolimo tataa-heyaalo boito, bo wambao̒ tau-tauwalo tamaa tilantu mai lo Allahu Taa̒ala.

¹² Sababu woluo taa diila mowali monika, sababu timongolio memangi mapilo tutulio mai odito. Woluo olo taa diila mowali monika sababu tio pilohutu odito lotaa wewo. Wau woluo olo taa molulaoto lohihilao udiila monika, alihu mowali momaya to Allahu Taa̒ala. Taa mambo mololimo pongaajali botie, huliilo mao̒ tio mololimo uito.”

Ti Isa lobalakati tau̒kekeei̒

¹³ Woluo tahe lodelo mai tau̒kekeei̒ odeli Isa alihu Tio mopodutu lo ulu-I̒o toitaato lunggongi mongolio wau modua̒ mola olimongolio. Bo tahidudua̒ li Isa maloingo totau-tauwala boito.

¹⁴ Yi ti Isa lotahuda mao̒ ode tahidudua̒ o-Lio, “Hulii mao̒ tau̒kekeei̒ boito monao̒ mai ode ola-U̒! Diila mao̒ dinia timongolio, sababu tau-tauwalo debo odelo utieelo tamowali pongawaa̒ umati lo Allahu Taa̒ala.”

¹⁵ Tulusi ti Isa helo podutu ulu-I̒o toitaato lunggongo lo tau̒kekeei̒ boito wau lobalakati mao̒ olimongolio. Lapatao̒ Tio lonao̒ lonteeto.

Taa bohulotau takaaya

¹⁶ Todulahu tuwau talolai̒ ngota lonao̒ mai odeli Isa, “Paaa̒ Guru,” ualio mao̒, “huhutu mopiohe wolo umusi pohutuo lowatia alihu mowali mololimo tutumula ututuulio tutu wau ohiheo-hiheolo mao̒?”

¹⁷ Ti Isa lolametao̒, “Yilongola yio̒ mohintu ola-U̒ tomimbihu wolo u mopiohe? Bo woluo Tuwau u mopiohe. Wonu yio̒ mohuto tumumulo, yio̒ musi modungohe totoonulalo palenta lo Allahu Taa̒ala.”

¹⁸ “Palenta utoonu uito?” yilintu mao̒ lotau boito. Ti Isa lolametao̒, “Diila mao̒ pomate-mateelo mao̒, diila mao̒ pojina, diila mao̒ potao̒, diila mao̒ pongohi sakusi udiila otutu,

¹⁹ hulumatia mao̒ tiilamu wau tiyamamu; wau tolia̒nga mao̒ ngota timongotamu debo odelo yio̒ motolia̒ngo batangamu lohihilao.”

²⁰ “Ngoa̒amila palenta boito madiludua̒ lowatia,” tametao̒ lo taa bohulotau boito. “Donggo wolo poli upalalu?”

²¹ Ti Isa luli lotahuda olio, “Wonu yio̒ motohilaa mowali wimu-wimumuto ngoa̒amilalo, ponao̒lo mota wau potalia mao̒ ngoa̒amila milikimu. Wohia mao̒ doilio ode taa mosikini, wau yio̒ mamoo̒tapu halata tosologa. Lapatao̒ uito, ponao̒lo mai modudua̒ ola-U̒!”

²² Loo̒dungohe tahuda boito, taa bohulotau boito malonao̒ wau hilaalio siluukali daa̒ sababu tio kaya daa̒.

²³ Lapatao̒ ti Isa lotahuda mao̒ ode tahidudua̒ o-Lio, “Wau̒ motahuda mai olemu, suukali daa̒ taakaya mowali pongawaa̒ umati lo Allahu Taa̒ala.

²⁴ Wau utie olo utohilaa potahuda-U̒ mai olemu; lebe gambangi unta tuwau tomuwoto ode huango dudetu wolo taakaya ngota tumuwoto ode Dunia Bohu lo Allahu Taa̒ala.”

²⁵ Tou̒ tahidudua̒ li Isa loo̒dungohe tahuda li Isa boito, timongolio lolinggolabe. “Wonu odito,” uali mongolio, “tatoonu tamowali moa̒ahu?”

²⁶ Ti Isa lomiloheo̒ olimongolio tulusi lotahuda mao̒, “Duo̒lo manusia, uito diila pongalo aakali! Bo duo̒lo Allahu Taa̒ala, ngoa̒amila pongalo aakali.”

²⁷ Tulusi tei Petrus loloi̒ya mao̒, “Bilohilo, amiaatia malo lolaa mai totoonulalo u hitua-tuawua wau lodudua̒ li Paaa̒. Wau wolo u matolimo lamiaatia?”

²⁸ Ti Isa lotahuda mao̒ olimongolio, “Pomalacayalo: To Dunia u Bohu, Walao̒ Manusia mamo tihuloa̒a toitaato tambati huhuloa̒-Lio u lailaio̒. Tou̒ boito timongoli tahidudua̒ ola-U̒ mamo tihuloa̒ toitaato lo mopulaa duluo tambati huhuloa̒ li olongia wau mamomutoo̒ tamopulaa duluo kaumu bangusa lo Isirai̒lu.

²⁹ Wau motii̒du taa u malo lolaa mao̒ bele, meaanto wutatio talolai̒ meaanto taabua, meaanto oliilolio oliyamolio, meaanto mongo walai̒o, meaanto halabolu kalana Wau̒, tau boito mamuli mololimo poo̒hetuto piu̒wa. Wau tio mamo lolimo olo tutumulo ututuulio tutu wau ohiheo-hiheolo mao̒.

³⁰ Bo dadaata taa u masaatia botie tabohulio mamowali tapulitio wau tamasaatia botie tapulitio mamowali tabohulio.”