MATIUSI 18 - KITABI HABARI MOPIOHE

Tatoonu tapulito udaa̒?

¹ Tou̒ boito tahidudua̒ li Isa lonao̒ mai ode o-Lio wau lohintu, “Tatoonu tahe anggapuolio pulito udaa̒ towolota umati lo Allahu Taa̒ala?”

² Ti Isa malo tiangai walao̒ talolai̒ kikiia̒ ngota, wau lopotihulo olio totalu limongolio.

³ Lapatao̒ ti Isa lotahuda mao̒, “Pomalacayalo! Bo wonu timongoli molomelo wau mowali debo odelo tau̒kekeei̒, timongoli mamowali pongawaa̒ umati lo Allahu Taa̒ala.

⁴ Taa u motidupapa lo batangalio wau mowali debo odelo tau̒kikiia̒ botie, tio-tiolo tapulito udaa̒ towolota umati lo Allahu Taa̒ala.

⁵ Wau taa u mololimo tau̒kikiia̒ tadebo odelo utie sababu Wau̒, boliilio mao̒ mololimo ola-U̒.”

Susuu-aliyaalo umoo̒ sababu tau mohutu dusa

⁶ “Tatoonu tamoo̒ sababu tala ngota lotau-tauwalo biaasa botie diilalo palacaya ola-U̒, lebe mopiohe wonu botu pohilingalo potihutolo to buloo̒lio wau tio loduo̒olo ode delomo deheto u modelomo.

⁷ Donggo boli topotalalio dunia botie sababu susuu-aliyaalo u moo̒sababu tau mohutu dusa. Memangi susuu-aliyaalo debo odelo uito malaito woluo, bo matopotala tamoo̒ sababu mao̒!

⁸ Wonu uluu̒mu meaanto oa̒atumu moo̒sababu olemu mohutu dusa, olota wau pomahula mao̒. Lebe mopiohe yio̒ tumumulo wolo Allahu Taa̒ala lou̒ didu o uluu̒ meaanto o oa̒ato ngotuwali, bo yio̒ mapomahu-Lio ode delomo tulu lonalaka wolo uluu̒ wau oa̒atumu dulo tuwali.

⁹ Wau wonu matomu moo̒sababu olemu mohutu dusa, luo̒heelo wau pomahula mao̒. Lebe mopiohe yio̒ tumumula wolo Allahu Taa̒ala didu omato ngotuwali lou̒ mapomahu-Lio ode delomo tulu lonalaka wolo mato dulo tuwali.”

Pohumaya pasali lohimba uilooli

¹⁰ “Poo̒dahai! Diila mao̒ pohina tala ngota monto tau-tauwalo ukikiio botie. Sababu poo̒toloma mao̒, mamaa-lai̒katiyalo limongolio laito woluo totalu li Paapa-U̒ tosologa. [

¹¹ Sababu Walao̒ Manusia dungga-dungga mai mopoaahu tailapalo!]

¹² Woloolo mola huhamaamu? Humayaalio woluo ngotaalio tao̒himba ngohetuto, tulusi tuwau towolota lo hihii-mbawaalo boito mooli, wolo u mapohutuo lotau boito? Tantu tio mamololaa mao̒ himba u tio lopulaa tio boito tohuludu wau mota mololohei uilooli boito.

¹³ Wau wonu tio muli moo̒dungga himba boito – pomalacayalo ola-U̒ – tio malebe meengaheo̒ tohimba u tuwau boito wolo u tio lopulaa tio wewolio boito udiila yilooli.

¹⁴ Odito olo Allahu Taa̒ala limongoli tosologa diila mohuto tala ngota lotau-tauwalo taboheeli palacaya to ola-U̒ botie lapalolo.”

Wonu wutatumu odusa

¹⁵ “Wonu wutatumu odusa olemu, ponao̒lo ode olio wau poo̒taa mao̒ totalaalio. Pohutua mao̒ uito wolo poo̒-poo̒oyo towolota limongoli duulota wambai̒o. Wonu tio modungohe loi̒yamu, yi maloa̒ahu yio̒ luli loo̒tapu mai wutatumu boito.

¹⁶ Bo wonu diila, podelo mota ngota meaanto duulota poli. Sababu todelomo Kitabi tulatuladu, ‘Pulito ngoi̒dilio duulota meaalo toulota sakusi tapalaluwolo u mopoi̒laalo ngotaalio tapilo tulude boito ototala.’

¹⁷ Wonu tio diila mololimo nasehati lotau-tauwala boito, poo̒taa mao̒ sua̒li boito ode jamaa̒. Wau pulitio mao̒, wonu tio diila mohuto mololimo nasehati lojamaa̒, anggapuwalo tio odelo tamootagia beya meaanto ngotaalio tadiila motota lo Allahu Taa̒ala.”

U dinidini wau u banaliyalo

¹⁸ “Ototai mao̒: Wolo udinio limongoli todunia, dinidini olo tosologa. Wau wolo u banalia limongoli todunia, banabanali olo tosologa.

¹⁹ Wau ototai mao̒ olo: Wonu towolota limongoli todunia botie taduulota aa̒akolowa pasali lolo wambai̒o wau modua̒ mola uito, yi dua̒ boito matolimo li Paapa-U̒ tosologa.

²⁰ Sababu tou̒toonu duulota meaanto toulota motia̒mbu sababu Wau̒, Wau̒ woluo tohuungi mongolio.”

Pohumaya pasali lowato tadiila mohuto mongambungu tau

²¹ Lapatao̒ tei Petrus malonao̒ mai odeli Isa wau lohintu, “Oo Eeya, wonu wutato lowatotia odusa towatotia, tunggula poo̒ongolo watotia musi mongambungu olio? Tunggula poo̒opitu mao̒?”

²² Ti Isa lolametao̒, “Diila, diila tunggula poo̒opitu, bo poo̒opitu lopulaa pitu piu̒wa!

²³ Sababu wonu bolo Allahu Taa̒ala momalenta, owowoluwoalio debo odelo pohumaya botie: Ngotaalio li Olongia motohilaa mopoo̒ lapato bibii-loliyaalo lomongo watolio.

²⁴ Tou̒ tio lolumulo lomalakisao̒, mapilopo taluwolio mai ode olio wato ngota tao̒biloli heyuta-yutaawa,

²⁵ wau diila loo̒bayali biloliilio. Oditolio ti olongia boito malei̒ potali mao̒ wato boito pee̒-pee̒enta wolo walai̒o wau dilelio taabua, wau ngoa̒amila milikiilio u pomayali biloliilio.

²⁶ Wato boito malo sujudu totalu li olongia boito, wau lomolohone mao̒, ‘Tuani, posabalipo ode watotia. Watotia mamo poo̒polu mai ngoa̒amila biloli boito.’

²⁷ Ti Olongia boito malo tolia̒nga olio, tilinggula tio malo luluto ngoa̒amila biloliilio.

²⁸ Tou̒ wato boito yilumualao̒, ilodunggaalio tio wolo sahabatilio, wato ngota olo, tao̒biloli to olio dengolo lihu. Tio malo heu̒pa sahabatilio boito, tilingoloi̒o, wau loloi̒ya mao̒, ‘Bayalia mai ngoa̒amila bilolimu!’

²⁹ Tulusi sahabatilio boito malo sujudu totalulio wau lohile, ‘Posabalipo sahabati, ngoa̒amila mabayaliyau̒ mai!’

³⁰ Bo wato boito diila lohuto. Bolii̒o mao̒, tio bo malo potuwoto olio ode delomo tutupa tunggula tio loo̒ bayali biloliilio.

³¹ Tou̒ mongo wato wewo loo̒onto mao̒ wolo ulotoduo boito, timongolio masiluukali wau lopodulohe sua̒li boito odeli olongia.

³² Yi ti olongia boito malei̒ tianga wato tamoleeto boito wau loloi̒ya olio, ‘Wato tamoleeto! Ngoa̒amila bilolimu mailulutuu̒ bo sababu yio̒ malo molohone mai olau̒.

³³ Wolo yio̒ diila patutilio olo motolia̒nga sahabatimu debo odelo wau̒ malo tolia̒nga olemu?’

³⁴ Ti Olongia boito maloingo daa̒. Wato tamoleeto boito mapilopo tuwotio ode tutupa tunggula ngoa̒amila biloliilio bilayalialio.”

³⁵ Ti Isa lopoo̒ pulitao̒ silitaa-Lio wolo tataa-heyaalo botie, “Odito olo ti Paapa-U̒ tosologa mopohutu mai olimongoli ngota-ngota, wonu timongoli diila mongambungu wutatumu wolo ihilasi.”