MATIUSI 16 - KITABI HABARI MOPIOHE

Tau-tauwalo Parisi mei̒hutu li Isa u moo̒linggolabe

¹ Woluo dengolo lota taulo Parisi wau taulo Saduki lonao̒ mai odeli Isa ohilaa mopotala o-Lio. Timongolio mei̒hutu o-Lio moo̒linggolabe umopo bukuti mao̒ deu̒ Tio dungga-dungga mai monto Allahu Taa̒ala.

² Ti Isa lolametao̒, “Wonu mato lodulahu donggo titiipa mota, timongoli mamoloi̒ya, ‘Dulahu mopiohu, sababu hulungio meela.’

³ Wau wonu dumodupo timongoli mamoloi̒ya, ‘Dulahu botie madidiyalo, sababu hulungo meela wau duo̒duo̒mo.’ Naa, timongoli mowali molaamali dulahu lou̒ momilohe mola hulungo, lebe-lebe pomao̒ totoonulalo tuoto lojamani diila olaamalia limongoli!”

⁴ “Mailaba leetio wau juluhakalio tau-tauwala tojamani botie. Timongoli mei̒hutu ola-U̒ u moo̒linggolabe. Timongoli diila tawohiyalo u moo̒linggolabe penu boli tuwau mao̒ ngopohia u moo̒linggolabe li Nabi Yunu.” Tou̒ yilapato lotahuda odito, ti Isa lololaa mao̒ olimongolio, tulusi malonao̒.

Ragi tau-tauwalo Parisi wau Saduki

⁵ Tou̒ tahidudua̒ li Isa leidungga mota ode ngotuwali lobulalo, bolo ilotaawa limongolio deu̒ timongolio loo̒lipata lodelo roti.

⁶ Ti Isa lotahuda olimongolio, “Poo̒daha-dahaalo mao̒ ragi tau-tauwalo Parisi wau Saduki.”

⁷ Loo̒dungohe tahuda li Isa odito, tahidudua̒ o-Lio malo loi̒ya ngota timongota, “Tio lotahuda odito sababu ito diila lodelo mai roti.”

⁸ Otaawa li Isa wolo u hebisalaa limongolio. Oditolio Tio malo tahuda mao̒, “Yilongola timongoli hemo susuua̒lia lou̒ diila oroti? Timongoli diila boti palacaya!

⁹ Debo diipo mongalati timongoli? Diila oe̒ela mola limongoli u roti limo lobotu mapili-pilitanga-U̒ ode taalimo lolihu lota? Ngoolo kalanji lebelio loroti u mailimoi̒ mongoli?

¹⁰ Wau woloolo mola olo wolo roti pitu lobotu ode tawopato lihu lota boito? Ngoolo kalanji lebelio lou̒ aalo u mailimoi̒ mongoli?

¹¹ Yilongola dilumutu timongoli diila mongalati deu̒ Wau̒ diila hemobisala woli mongoli pasali loroti? Poo̒daha-dahaalo mao̒ ragi tau-tauwalo Parisi wau Saduki!”

¹² Pulitio mao̒ tahidudua̒ li Isa boito longalati deu̒ ti Isa mei̒ podaha-dahaalo mao̒ olimongolio boito diila toragi u hepomake pohutu roti, bo to popoo-ngajaliyalo tau-tauwalo Parisi wau Saduki.

Tei Petrus lomasisi pasali li Isa

¹³ Ti Isa lonao̒ ode madala totili lokota Kaisarea Pilipi. Mota teto Tio lohintu to tahidudua̒ o-Lio, “Modudua̒ loi̒ya lotau, Walao̒ Manusia boito tatoonu?”

¹⁴ Tahidudua̒ o-Lio malo lametao̒, “Woluo talo loi̒ya tei Yahya Tamopolihua. Woluo olo talo loi̒ya tei Elia. Taawewo poli loloi̒ya tei Yeremia meaanto tala ngota lonabi.”

¹⁵ “Bo modudua̒ olimongoli lohihilao, tatoonu Wau̒ botie?”

¹⁶ Tei Simon Petrus lolametao̒, “Ti Paaa̒ yito Olongia Tamoo-poa̒ahua Walao̒ Allahu Taa̒ala Tatumu-tumulo.”

¹⁷ “Mai̒luntungi daa̒ yio̒, Simon walae̒e Yona!” tahuda li Isa. “Sababu diila manusia tamalo poo̒taa mai sua̒li boito to olemu, boti Paapa-U̒ tosologa.

¹⁸ Sababu uito ototai mao̒, yio̒ botie tei Petrus, botu u motoheeto. Wau toitaato wumbato botu botieelo Wau̒ mamomongu mao̒ galeja-U̒, udiila mowali olaahe; penu boli lomautu!

¹⁹ Wau̒ mamongohi mai olemu uu̒nti Dunia Bohu lo Allahu Taa̒ala. Wolo u diniyomu toitaato dunia, uito olo dididini tosologa. Wau wolo u banaliyamu toitaato dunia, uito olo banaliyalo tosologa.”

²⁰ Lapatao̒ ti Isa malo poe̒elao̒ to tahidudua̒ o-Lio alihu timongolio diila mopoo̒taa boli olo tatoonu deu̒ Tio-tiolo Olongia Tamoo-poa̒ahua.

Ti Isa helo bisala pasali odudutolo wau opopate-Lio

²¹ Tumulalo mai tosaaa̒ti boito, ti Isa lotahuda wolo juujulu ode tahidudua̒ o-Lio, deu̒ Tio musi monao̒ ode Yerusalemu wau mola modutolo dadaata monto mongo tau̒wa, mongo iimamu tau̒wa wau guguu-ruwaalo agama. Tio mapateelio mate-mateelo mao̒, bo todulahu otolulio Tio mamuli mobongu mai.

²² Lapatao̒ tei Petrus lomantangao̒ li Isa ode yintili wau lodini o-Lio, ualio mao̒, “Pohileaala dua̒ Allahu Taa̒ala mopo lamingao̒ sua̒li boito, oo Eeyau̒! Diila bolo sua̒li boito motoduo mai to Eeya!”

²³ Ti Isa maloili mao̒ tulusi lotahuda odelei Petrus, “Pohinggi mao̒ monteea Tamoo-heingawa ode dusa! Yio̒ mongabu-ngabuuto ola-U̒. Pikiilangimu boito pikiilangi lomanusia; diila pikiilangi lo Allahu Taa̒ala!”

²⁴ Lapatao̒ ti Isa lotahuda ode tahidudua̒ o-Lio, “Taa u mohuto modudua̒ ola-U̒, musi momalonga polohuna daa̒ batangalio lohihilao wau momota salipulio, wau tulusi modudua̒ ola-U̒.

²⁵ Sababu taa u motohilaa momintengi tutumulio, mao̒olia lo tutumulio. Bo taa u mopobake tutumulio ode ola-U̒, mamoo̒tapu tutumulio.

²⁶ Wolo untungilio ode tahingota-ngotaawa, wonu ngoilanggubu dunia botie mowali milikiilio, bo tio oolia lo tutumulio? Wolo mowali tutumulo boito tuloa̒lo lou̒ hitua-tuawua?

²⁷ Diilalo mohiheo Walao̒ Manusia, pee̒-pee̒enta wolo mamaa-lai̒ikati-Lio, mamei dungga wolo kawasa li Paapa-Lio. Tou̒ boito Tio mamolontuli mai timii̒du tau motuuu̒de wolo huhutuulio.

²⁸ Ototai mao̒! Towolota limongoli teewe woluo tadiila mate, tou̒ diipo moo̒onto Walao̒ Manusia meidungga mai odelo Olongia.”