MATIUSI 12 - KITABI HABARI MOPIOHE

Yiyintu tomimbihu dulahu Saabati

¹ Todulahu Saabati tuwau, tou̒ ti Isa yilumaodeo̒ to halabolu lopale ngopita, tahidudua̒ o-Lio malolipu pale, tulusi pilolamelio sababu hipolaanga.

² Tou̒ tau-tauwalo Parisi loo̒onto mao̒ uito, malo loi̒ya timongolio odeli Isa, “Bilohi! tahidudua̒ ole-Mu malo lambanga butoo̒ lo agamanto lou̒ hipohutua u dinidini todulahu Saabati.”

³ Ti Isa lolametao̒, “Diipo pee̒enta pilobaca limongoli tomimbihu wolo u pilohutu lei Dauda tou̒ tio wau taulio hipolaanga?

⁴ Tio tilumuwoto ode delomo Bele lo Allahu Taa̒ala; tulusi lolamela roti u mapilo dewolio ode Allahu Taa̒ala. Lebe-lebe pomao̒ modudua̒ butoo̒ lo agamanto, tio boli taulio diila mowali molamela roti boito – bo mongo iimamu wambao̒ tamowali.

⁵ Meaalo diipo pee̒enta timongoli lopobaca mao̒ todelomo butoe̒e Musa u timii̒du dulahu Saabati mongo iimamu tahe otuugasia to Bele lo Eeya, hipo lambangawa wuu̒du lodulahu Saabati, bo diila pilopo talalio?

⁶ Poo̒tuota mao̒ wolo u tilahuda-U̒ botie: teea woluo talebe udaa̒ mao̒ wolo Bele lo Eeya.

⁷ Todelomo Kitabi tulatulade: Odehu hilaolo u kahandakiyo-U̒, diila bake lo binatangi. Wonu humayaalio timongoli otu-otutuulo mao̒ mongalati tahuda-U̒ boito, tantu timongoli diila tamo potala totau-tauwalo tadiila ototala.

⁸ Sababu Walao̒ Manusia okawasa todulahu Saabati.”

Taa uluu̒lio yilate ngotuwali

⁹ Ti Isa lololaa mao̒ tambati boito tulusi lonao̒ ode bele ngowale potabiaala.

¹⁰ Mota teto woluo tamailate uluu̒lio ngotuwali. Dengolo lota tao̒hilaa mololohe totala li Isa, lohintu mao̒ o-Lio, “Wolo mowali mopoo̒luli tau todulahu Saabati?”

¹¹ Ti Isa lolametao̒, “Humayaalio woluo ngotaalio towolota limongoli ohimba tuwau, wau todulahu Saabati himba boito lodehu ode huango u modelomo; wolo taa ohuu̒wo lohimba boito diila motolopani momatulai himba boito monto huango boito?

¹² Naa, manusia lebe ohalaga wolo himba! Oditolio, wonu odito, mowali motulungi tau todulahu Saabati.”

¹³ Lapatao̒ ti Isa lotahuda mao̒ ode tailate uluu̒lio ngotuwali boito, “Popotulude mai uluu̒mu.” Tau boito malo potulide uluu̒lio, wau uluu̒lio boito maloluli debo odelo uluu̒lio ngotuwali.

¹⁴ Bo tau-tauwalo Parisi lololaa mao̒ bele potabiaala boito, lapatao̒ loheeluma u momate li Isa mate-mateelo mao̒.

Utolia tatilulaoto Allahu Taa̒ala

¹⁵ Otaawa li Isa deu̒ tau-tauwalo Parisi boito opatuju u moleeto to batanga-Lio. Oditolio Tio malo lolaa mao̒ tambati boito wau dadaata tau lodudua̒ o-Lio. Lapatao̒ Tio malo poo̒luli ngoa̒amila tahi ngongota.

¹⁶ Bo Tio lodini olimongolio mopoo̒taa pasalii-Lio ode taawewo.

¹⁷ Lou̒ odito malo toduo wolo upilo tahuda mai lo Allahu Taa̒ala lotimbulude toli Nabi Yesaya,

¹⁸ “Tabotieelo utoliya-U̒ Tatilulaotu-U̒, tapilonu-U̒ wau tamotuuu̒de tohilaa-U̒. Rohu-U̒ mawohi-U̒ mao̒ o-Lio, oa̒adili-U̒ mapo habario-Lio ode babaa-ngusawalo.

¹⁹ Tio diila tamo buutola meaanto monguatio̒, meaanto mopidato todala-dalaalo daa̒.

²⁰ Talilo u putuputuo̒ diila tabolio-Lio, tohe u iyo-iyoopo diila tapatee-Lio. Tio mamohipate tunggula oa̒adili odungga;

²¹ ngoa̒amila bangusa mamo tiwunela to o-Lio.”

Ti Isa wau Beeljebul

²² Lapatao̒ dilelolio mai odeli Isa ngotaalio tapitoo̒ wau bubu sababu makiluwasa lorohu u moleeto. Ti Isa lopoo̒luli mao̒ tau boito tilinggula tio malowali loo̒onto wau lobisala.

²³ Ngoa̒amila tau lolinggolabe wau hipo loi̒yawa, “Wolo maa Tio botie walae̒e Dauda tadilanti boito?”

²⁴ Tou̒ tau-tauwalo Parisi loo̒dungohe uito, timongolio lolametao̒, “Tau botie bo mowali mohinggi rohu moleeto, sababu Beeljebul, tau̒wa lo roroo-huwaalo moleeto boito malongohi kawasa boito o-Lio.”

²⁵ Ilotaawa li Isa pikiilangi lotau-tauwalo Parisi boito. Oditolio Tio malo tahuda ode limongolio, “Wonu lipu tuwau mopoo̒ mowali hipole-polemboa̒ wau mumuusua, lipu boito diila tamoo̒ taahangi. Wau kota tuwau meaanto ngaalaa̒ u mopoo-pooo̒ wau mumuusua ngota timongota mamoa̒ntulu.

²⁶ Odito olo todelomo bele biluloa̒ saaha li olongia lolati; wonu ungopo lemboa̒ mopohinggi ungopo lemboa̒ wewo, yi bele biluloa̒ saaha li olongia lolati boito malo poo-pooo̒ wau mamoa̒ntulu.

²⁷ Timongoli hemoloi̒ya deu̒ Wau̒ helo pohinggi rohu u moleeto sababu kawasa lo Beeljebul. Wonu odito wolo kawasa lotatoonu tahidudua̒ olemu mopohinggi rohu u moleeto. Tahidudua̒ olemu lohihilao boitolo talopo bukuti deu̒ timongoli tilala!

²⁸ Bo Wau̒ mopohinggi rohu u moleeto wolo kawasa lo Rohullah. Wau uito boliilio deu̒ Allahu Taa̒ala malo lumulo lomalenta tohuungi mongoli.

²⁹ Woloolo mola tau moo̒ tuwotao̒ ode delomo bele ngotaalio tamolotolo molambata halataalio, wonu tio diila momungupo tamolotolo boito? Lapatao̒ uito, deu̒ito tio moo̒ lambatao̒ halataalio.

³⁰ Taa diila motiwambao̒ ode ola-U̒ tutuulio tutu motehengi ola-U̒. Wau taadiila momantu ola-U̒ tutuulio tutu mongantulu kalajaa-U̒!

³¹ Masababu uito, ototai mao̒, wonu tau mohutu dusa wau moloi̒ya u mohina, tio mowali ambunguolo! Bo wonu tio mohina Rohullah, tio diila mowali ambunguolo!

³² Wonu tau moloi̒ya u hitua-tuawua motehengi Walao̒ Manusia, tio mowali ambunguolo, bo wonu tio mohina Rohullah, tio diila mowali ambunguolo, mopio botia boli mola to ahiilari!”

Bungo lo ayu wau huhuu-ngolio

³³ “U moo̒tapu mao̒ hungo u mopiohu, bungolio musi molomiodu. Wonu bungolio diila molomiodu hungolio olo diila mopiohu. Molomiodu meaalo diila bungo lo ayu ngobungo mao̒taawa monto hungolio.

³⁴ Timongoli tau moleeto, diila pongalo aakali timongoli moo̒ loi̒ya susuu-aliyaalo u mopiohe, wonu timongoli moleeto? Wolo uiloi̒ya lotunggilo ui-uitolo u molepatai monto hilao!

³⁵ Taa mopiohu mobisala susuu-aliyaalo u mopiohu, sababu tio polupolu lou̒ mopiohu. Bo bolii̒o mao̒ taa moleeto mobisala susuu-aliyaalo lou̒ moleeto sababu tio polupolu lou̒ moleeto.

³⁶ Oditolio, poo̒toloma mao̒: to Dulahu Kiama, ngota-ngota musi momanta timii̒du uiloi̒yaalio udiila ohuna.

³⁷ Sababu loi̒yamu lohihilao boitolo u pomake u molantu wolo yio̒ ototala meaanto diila.”

Tau-tauwalo Parisi mei̒hutu li Isa u moo̒linggolabu

³⁸ Lapatao̒ dengolo lota guru lo agama wau tau-tauwalo Parisi loloi̒ya mao̒, “Paaa̒ Guru amiaatia ohilaa momilohe li Paaa̒ mohutu u moo̒linggolabu.”

³⁹ “Donggo boli leetio wau juluhakalio tau-tauwala tojamani botie!” tametao̒ li Isa, “Timongoli mei̒hutu ola-U̒ u moo̒lingolabu? Timongoli diila tawohiya-U̒ penu boli tuwau mao̒ u moo̒lingolabu, ngopohia u moo̒linggolabu li Nabi Yunu.

⁴⁰ Tei Yunu lotibiluloa̒ dulahio totolu wau huilio totolu todelomo ombongo tola leidaa̒. Odito olo Walao̒ Manusia mamo tibiluloa̒ huilio totolu wau dulahio totolu todelomo ombongo huta.

⁴¹ To Dulahu Kiama, tuango lipu lo Niniwe mamobongu mai pee̒-pee̒enta wolo tau-tauwalo tojamani botie wau mamopo tuludu olimongolio. Sababu tau-tauwalo Niniwe boito malo lilihu lonto dusa limongolio, tou̒ tei Yunu lohutuba to limongolio. Bo teea botia woluo talebe udaa̒ mao̒ wolei Yunu!

⁴² To Dulahu Kiama, ti olongia taabua monto lipu lo Hulialio mamobongu mai pee̒-pee̒enta wolo tau-tauwalo tojamani botie wau mamopo tuludu olimongolio. Sababu u modungoheo̒ pongaajali lei Salomo tamolinepo, ti olongia taabua boito malo huwato ode u molaminga daa̒ lonto huudu dunia. Bo teea botia woluo talebe udaa̒ mao̒ wolei Salomo!”

Wuwalingai lorohu u moleeto

⁴³ “Wonu bolo rohu u moleeto mololaa mao̒ tahingota-ngotaawa, rohu boito momalita tataa-mbatiyalo u mohengu mololohe tambati pohuhelialio, bo diila odunggaalio.

⁴⁴ Masababu uito tio moloi̒ya, ‘Wau̒ mamuli mohualinga mola ode bele u matilolaau̒ mai.’ Tou̒ tio leidungga mola odito, bele boito madidu otua, belesi wau aa̒atulu.

⁴⁵ Lapatao̒ tio lonao̒ wau malodelo pitu rohu wewo ulebe moleetao̒ wolio. Lapatao̒ timongolio tilumuwoto ode delomo tau boito, tulusi lotibiluloa̒ teto. Wau pulitio mao̒ owowoluwoa lotau boito lowali lebe loleetao̒ wolo u bohulio mai. Ui-uitolo olo u mamotoduo mai totau-tauwalo hileeta tojamani botie.”

Tiilo wau mongo wutati Isa

⁴⁶ Tou̒ ti Isa donggo hemo bisala wolo taa dadaata boito, malonao̒ mai tiilo wau mongo wuta-Tio. Timongolio tilimihulao̒ to bulemengio sambela hipo tolopania alihu moo̒bisala wo-Lio.

⁴⁷ Ngotaalio lotaa dadaata boito malo loi̒ya mao̒ odeli Isa. “Paaa̒, tiilo wau mongo wutati Paaa̒ woluo to bulemengio. Timongolio ohilaa mobisala woli Paaa̒.”

⁴⁸ Lapatao̒ ti Isa lolametao̒, “Tatoonu tiilaU̒? Tatoonu mongo wutatu-U̒?”

⁴⁹ Lapatao̒ Tio malolunu to tahidudua̒ o-Lio wau lotahuda mao̒, “Tabotieelo tiila-U̒ wau mongo wutatu-U̒.

⁵⁰ Taa moponao̒ kahandaki li Paapa-U̒ tosologa, tio-tiolo wutatu-U̒ talolai̒, wau wutatu-U̒ taabua, wau tiila-U̒.”