LUKASI 23 - KITABI HABARI MOPIOHE

Ti Isa totalu lei Pilatus

¹ Ngoa̒amila majalisi boito tilimihulo, tulusi lodelo li Isa ode talu lei Pilatus.

² Teto timongolio malo potulude o-Lio, “Timongolio loloi̒ya, Malotapu lami tau botie hemopo lapalo ulipu. Tio hemo popatu totau alihu diila momayali beya toli Kaisali, sababu heloi̒yaa-Lio deu̒ Tio yito Almasi, ngotaalio li olongia.”

³ Lapatao̒ tei Pilatus lohintu mao̒ li Isa, “Tingga otutu Yio̒ olongia taulo Yahudi?” Tametao̒ li Isa, “Oditolo loi̒yamu.”

⁴ Yi loi̒ya mao̒ lei Pilatus ode mongo iimamu tau̒wa wau taa dadaata boito, “Wau̒ diila loo̒tapu totala penu boli tuwau mao̒ totau botie u pohukuu-maniyalo o-Lio.”

⁵ Bo timongolio lebe hemo huntulao̒ olo, “Wolo pongaajali-Lio, Tio hemo popatu taa to ngoilanggubu Yudea; bohu-bohulio to Galilea, wau botia matilinggula poli odiamai.”

Ti Isa totalu lei Herodes

⁶ Tou̒ tei Pilatus loo̒dungohe uito, tio malohintu, “wolo Tio botie taulo Galilea?”

⁷ Tou̒ piloo̒taalio mao̒ deu̒ ti Isa asalii-Lio lonto madala to kawasa lei Herodes, tei Pilatus malolao li Isa odelei Herodess, u tou̒ boito woluo olo to Yerusalemu.

⁸ Tei Herodes sanangi daa̒ tou̒ loo̒onto li Isa, sababu malohiheo tio loo̒dungohe pasalii-Lio wau ohilaa momilohe o-Lio. Tio hemo halapu moo̒ sakusi li Isa mohutu u moo̒linggolabe.

⁹ Sababu uito tei Herodes heloo̒woli mao̒ dadaata yiyintu ode o-Lio, boti Isa diila pee̒enta mao̒ lolameto.

¹⁰ Mongo iimamu tau̒wa wau guguu-ruwaalo agama lotaalua olo teto wau helo potulude wolo moo̒ohuu̒ li Isa.

¹¹ Tei Herodes wau mongo pongowaa̒ lo suludadulio helo poitohe wau lohina li Isa, lapatao̒ pilakealio Tio boo̒ odudaa̒, lapatao̒ luli yilaolio Tio odelei Pilatus.

¹² To dulahulo boito tei Herodes wolei Pilatus, tou̒ muloololio mai mumuusua, maluli lotamania.

Ti Isa dilehuwa hukumani mate

¹³ Tei Pilatus malongambu mongo iimamu tau̒wa, mongo tau̒wa, wau ulipu,

¹⁴ lapatao̒ loloi̒ya mao̒ olimongolio, “Timongoli malodelo mai tau botie ode olau̒ wau loloi̒ya deu̒ Tio helo poo̒lapalo totau-tauwalo. Botia totalu limongoli wau̒ malo malakisa o-Lio, bo wau̒ sama-samaata diila loo̒tapu u moleeto penu bo tuwau mao̒ u hepotuludi mongoli o-Lio.

¹⁵ Odito olo huhama lei Herodes, sababu tio olo maluli lolao mai li Isa boito ode olami. Tau botie diila helohutu penu bo tuwau mao̒ upaatuti pohukuu-maniyalo o-Lio wolo hukumani mate.

¹⁶ Sababu uito wau̒ mamo muboa̒a o-Lio, tulusi mopoluli mao̒ o-Lio.” [

¹⁷ Totimii̒du lameyangi lo Paska, tei Pilatus musi mopobebasi ngotaalio lotutupa ode ulipu.]

¹⁸ Ngoa̒amila tahia̒mbua teto longuatio̒, “Pateyalo Tio mate-mateelo mao̒! Bebasia mao̒ tei Barabas olami!” (

¹⁹ Tei Barabas tiluwotio ode tutupa sababu polomalakala ulowali tokota wau sababu polomatea yila-yilatelo mao̒.)

²⁰ Tei Pilatus ohilaa mopoluli mao̒ li Isa, sababu uito tio luli lobisala pee̒entapo totaa dadaata boito.

²¹ Bo timongolio longuatio̒, “Salipua Tio, salipua Tio!”

²² Lapatao̒ u otolulio tei Pilatus longibode olimongolio, “Bo wolo totalaa-Lio? Wau̒ diila loo̒tapu penu boli tuwau mao̒ totala to o-Lio upaatuti pohukuu-maniyola o-Lio hukumani mate! Wau̒ mamo muboa̒a o-Lio tulusi mopoluli mao̒ o-Lio.”

²³ Bo timongolio tulusi hiwatia̒ lodaa̒-daa̒alo mao̒ deu̒ ti Isa musi salipuolo. Wau pulitio mao̒ wuwaatii̒ mongolio lomata.

²⁴ Yi tei Pilatus malo podehu hukumani mate li Isa loduduo̒ utohilaa lotaa dadaata boito,

²⁵ wau lopoluli taa u pilohile limongolio, deu̒ito-yito taa u tiluwotio ode tutupa sababu polo molakala wau polomatea yila-yilatelo mao̒. Lapatao̒ ti Isa yiludulio ode limongolio u lololimo totoonulalo u otohilaa pohutuo limongolio o-Lio.

Ti Isa silalipulio

²⁶ Yi ti Isa madilelo limongolio. Tohuungo dalalo, timongolio lodunggaya wolo ngotaalio tai̒lunte Simon, u asaliilio mai lonto Kirene, tadonggo tuwo-tuwotai ode kota. Timongolio loheu̒pa olio, tulusi lomakusa olio lomota ayu salipu boito to wulea li Isa.

²⁷ Dadaata taa tunu-tunuhe towulea li Isa – to wolotalio woluo olo dengolo lota mongobua. Mongobua boito hehiyonga wau hipo hilimutawa li Isa.

²⁸ Boti Isa malomilohe ode limongolio wau lotahuda mao̒, “Mongobua lo Yerusalemu! Diila mao̒ hiyongi Wau̒. Hiyongilo mola batangamu lohihilao wau mongo walau̒mu.

²⁹ Sababu mamei dungga wakutuulio tau mamoloi̒ya, ‘Donggo boli pae̒daalio mongobua tadiila pee̒enta mao̒ ilombodaa̒, tadiila pee̒enta mao̒ owalao̒ wau diila pee̒enta mao̒ lopotutu lotau̒nge!’

³⁰ Tou̒ boitolo tau mamoloi̒ya to huhuu-iduwaalo, ‘Deehilo mai ami!’ Wau to huhuu-luduwalo, ‘Tambulilo mai ami!’

³¹ Sababu wonu to ayu udonggo hitumula, tau malohutu debo odelo utie, wolo poli u mapohutuo limongolio to ayu umalo hengu!”

³² Woluo poli taduulota wewo – duduulotalo tamoleeto – tadilelo limongolio u hukuu-maniyola mate pee̒-pee̒enta woli Isa.

³³ Tou̒ malei dungga mola totambati u ilunte “Bakakau,” timongolio malo salipu li Isa wolo taduulota tamoleeto boito – ngotaalio to ambahu olowala wau ngotaalio poli to ambahu oloihi li Isa.

³⁴ Tulusi ti Isa malodua̒, “Paapa, ambunguwalo mai timongolio! Diila otaawa limongolio wolo upilohutu limongolio.”

³⁵ Pakeyangi li Isa hetila-tilayadio teto towolota limongolio wolo undi. Tau-tauwalo tahitihula teto sambela hibilohe, tulusi mongo tau̒wa lo Yahudi hipohentea̒ li Isa wolo loi̒ya, “Tio malo poa̒ahu taa wewo; ntali botia Tio mopoa̒ahu batanga-Lio lohihilao, wonu Tio tutuulio tutu Olongia Tamoo-poa̒ahua tatilulaoto Allahu Taa̒ala!”

³⁶ Mongo pajule olo hemohentea̒ li Isa. Timongolio lonao̒ mai longohi angguru molotingo o-Lio

³⁷ wau loloi̒ya, “Wonu Yio̒ olongia taulo Yahudi, poa̒ahuwalo lohihilao batanga-Mu!”

³⁸ Toitaato ayu salipu li Isa, tulatuladu tataa-heyaalo odie: “Tabotieelo Olongia Taulo Yahudi.”

³⁹ Tala ngota lo tamoleeto tasilalipu teto hemohina li Isa. Tio loloi̒ya, “Yio̒ Olongia Tamoo-poa̒ahua, diila odito? Nte, poa̒ahuwalo batanga-Mu wau ami!”

⁴⁰ Bo tamoleeto ngota poli lodini to tamaniilio boito, loi̒yaalio mao̒, “Tingga yio̒ diila moohe to Allahu Taa̒ala? Yio̒ pee̒-pee̒enta hilukuu-manilio mate debo odelo Tio.

⁴¹ Bo hukuu-maninto duulota memangi malo tuuu̒de wolo huhutuunto. Bo Tio sama-samaata diila ototala!”

⁴² Tulusi tio loloi̒ya, “Isa, Eelai mai watia, wonu Ito meidungga mai odelo Olongia!”

⁴³ “Pomalacayalo,” tahuda mao̒ li Isa olio, “Dulahee botie yio̒ mapee̒-pee̒enta wola-U̒ to Pirdaus.”

Opopate li Isa

⁴⁴ Otanu dulahee totau̒, mato lodulahu diila otinelio, wau ngoilanggubu lipu boito lowali lodio̒lomo daa̒ tunggula jamu tiga lolaango.

⁴⁵ Lalante untaya-ntayanga todelomo Bele lo Eeya, lokaidingo duluo.

⁴⁶ Tulusi ti Isa longuatia̒ wolo suala daa̒, “Paapa! Ode delomo uluu̒ li Paapa wuduo mola lo Watia batanga lo Watia!” Tou̒ yilapato loloi̒ya odito, Tio yilate!

⁴⁷ Tou̒ polowila lo pasukani loo̒onto wolo u mailowali, tio malomuji Allahu Taa̒ala. Tulusi tio loloi̒ya, “Otutu Tio diila ototala!”

⁴⁸ Taa dadaata talonao̒ mai odito u momilohe, loo̒onto mao̒ wolo u mailowali. Timongolio ngoa̒amila malo hualingo wolo hilaa ulee̒-lee̒e daa̒.

⁴⁹ Wau ngoa̒amila tamoo̒taawa woli Isa, tuwotuwoto mongobua talo dudua̒i o-Lio lonto Galilea, hitihula lonto u molamingo wau loo̒onto ngoa̒amilalo boito.

Pilolobunga li Isa

^50-51 Woluo ngotaalio tai̒lunte Yusu, u asaliilio mai lonto kota Arimatea tolipu lo Yudea. Tio tau ngota mopiohu tahe hulumatio lotau, wau tadonggo hemohima wakutuulio Allahu Taa̒ala molumula momalenta odelo Olongia. Eleponu tio waito Mahakama lo Agama, tio diila akolo wolo putuusani wau huhutu lo mahakama boito.

⁵² Tei Yusu botie lonao̒ mota lotaalua wolei Pilatus wau lohile alihu milate li Isa wohi mao̒ olio.

⁵³ Lapatao̒ yilaahio milate li Isa lonto ayu salipu, tulusi tilaputio wolo latu lonto lenani. Lapatao̒ uito tio malopo balato li Isa todelomo kuubulu upilohutu todelomo huludu botu – kuubulu boito diipo pee̒enta mao̒ pilomake.

⁵⁴ Dulahu boito dulahu Jumaa̒ti; wau dulahu Saabati wimbedeo̒ tumulalio.

⁵⁵ Mongobua talonao̒ mai woli Isa lonto Galilea lodudua̒ olei Yusu wau lomilohe kuubulu boito. Timongolio olo loo̒onto woloolo mola milate li Isa pilopo balatio todelomo kuubulu.

⁵⁶ Lapatao̒ timongolio malo hualingo tulusi lopodapato lamba-lamba wau yinulo moonu u polamahio tomilate li Isa. Todulahu Saabati, timongolio lohuheli lokalaja u loduduo butoo̒ lo agama.