LUKASI 17 - KITABI HABARI MOPIOHE

Susuu-aliyaalo umoo̒ sababu tau mohutu dusa

¹ Ti Isa lotahuda mao̒ to tahidudua̒ o-Lio, “Sua̒li umoo̒ sababu tau mohutu dusa tantulo mao̒ debo woluo. Bo matopotala taa u moo̒sababu mao̒!

² Lebe mopiohu wonu botu pohilingalo potihutolo to buloo̒lio, tulusi tio pomahulolo ode delomo deheto lou̒ tio mamoo̒ sababu tala ngota lotau-tauwalo tabiasa botie mohutu dusa.

³ Sababu uito, poo̒dahailo! Wonu wutatumu odusa, dinia mao̒ tio. Wonu tio molee̒e, ambungua mao̒ tio.

⁴ Wonu tio odusa to olemu poo̒opitu ngohui wau timii̒du monao̒ mai ode olemu wau moloi̒ya, ‘Watia mohile maa̒apu,’ ambungua mao̒ tio.”

Pasali lo iimani

⁵ Mongo rasulu malo loi̒ya odeli Isa Eeya, “Yaa Eeya, poo̒lotola mai iimani lomongo watotia.”

⁶ Eeya lolametao̒, “Wonu timongoli o iimani debo odelo udaa̒ bili losawi, timongoli mowali moloi̒ya ode bungo lo ayu mulubei botie, ‘Pobunggatolo yio̒ wau meilodungolo mola todelomo deheto,’ tantulo mao̒ bungo lo ayu botie mamoduduo̒ palentamu.”

Uwajibu ngotaalio lowato

⁷ “Humayaalio ngotaalio limongoli owato u hemomadeo̒ to halabolu meaalo hemo himbala himba. Wonu bolo wato boito mohualingai, wolo tio mamoloi̒ya olio, ‘Dulo aliheo̒ molamelo’?

⁸ Tantulo mao̒ diila! Bolii̒o mao̒ tio mamoloi̒ya olio, ‘Pohetua mao̒ ua̒alou̒. Pomakeyalo boo̒ ubelesi wau wimai mao̒ wau̒ donggo hemolamelo wau hemongilu; lapatao̒ uito yio̒ mamowali molamelo.’

⁹ Wato boito diila palalu pujiolo sababu malo dungohe palenta lituanilio, diila odito?

¹⁰ Odito olo timongoli. Wonu timongoli malohutu ngoa̒amila upilo malentalio mai olimongoli, loi̒yawa mao̒, ‘Ami bo wato biaasa; ami bo wambao̒ mohutu uwajibu olami.’ ”

Ti Isa lopoo̒luli tamopulu lota

¹¹ To nonao̒ ode Yerusalemu, ti Isa lolibaya to sipatana madala lo Samaria wau Galilea.

¹² Tou̒ tilumuwoto to kambungu tuwau, Tio nilao̒ mai lo tamopulu lota tao̒ngongoto lo alipo u moo̒tihela hapato. Timongolio hitihula tou̒ molamingo,

¹³ wau hiwaatia̒, “Isa! Tuani! Ponua mai mongowatotia!”

¹⁴ Tou̒ ti Isa loo̒onto olimongolio, Tio lotahuda mao̒, “Ponao̒lo ode mongo iimamu, pohilea mao̒ olimongolio momalakisa wawau̒mu.” Tou̒ timongolio donggo hinao̒wa, mailooli ngongoti mongolio.

¹⁵ Tou̒ ngotaalio limongolio loo̒laasa mao̒ deu̒ tio maloluli, tio malo hualingo sambela wenga-wengahe daa̒ helomuji Allahu Taa̒ala.

¹⁶ Tulusi totalu li Isa tio losujudu wau lolapali oduo̒lo o-Lio. Tau boito ngotaalio lo Samaria.

¹⁷ Lapatao̒ ti Isa lotahuda mao̒, “Diila mopulu lota tamaa piloo̒luli? Matou̒toonu taa tiolota?

¹⁸ Yilongola bo taa deli botie talo hualingai lolapali oduo̒lo to Allahu Taa̒ala?”

¹⁹ Lapatao̒ ti Isa lotahuda mao̒ ode tau boito, “Pobongulo, wau nao̒olo. Sababu yio̒ palacaya ola-U̒, yio̒ maloluli.”

Tou̒ Allahu Taa̒ala meidungga mai u momalenta

²⁰ Dengolo lota taulo Parisi lohintu toli Isa omolua Allahu Taa̒ala meidungga mai u momalenta. Ti Isa lolametao̒, “Pamalenta lo Allahu Taa̒ala diila tumulalio wolo tutuuotalo umowali oontonga lotau, tilinggula tau mowali moloi̒ya,

²¹ ‘Dulo, bilohi, botie Tio!’ meaalo, ‘Teto mola Tio!’ Sababu Allahu Taa̒ala malo lumulo lomalenta tohuungi mongoli.”

²² Lapatao̒ uito ti Isa lotahuda to tahidudua̒ o-Lio, “Mamei dungga wakutuulio timongoli ohilaa momilohe dulahe tuwau monto duduu-laheyaala lo Walao̒ Manusia, bo timongoli diila mowali moo̒onto mao̒.

²³ De tau mamoloi̒ya olemu, ‘Bilohi, teto!’ meaalo ‘Bilohi, teea!’ Bo timongoli diila polualao̒ u mololohe olio.

²⁴ Odelo woloolo molo ilato pukapukao̒ tohulungo, wau motinelo monto huudio ode huudio, odito olo de owowoluwoa lo Walao̒ Manusia todulahio.

²⁵ Bo bohu-bohulio Tio musi modutolopo dadaata wau diila tolimoo lotau-tauwalo tojamani botie.

²⁶ Todulahee lo Walao̒ Manusia de poi̒laalolio, owowoluwoalio odelo tojamani li Nabi Noho tou̒ boito.

²⁷ Tau molamelo mongilu, wau monika; oditolo mola mololaalaaita tunggula ti Nabi Noho tilumuwoto ode kapali wau taluhe daa̒ leidungga tunggula loo̒sababu tau-tauwala boito lopunungo ngoa̒amila.

²⁸ Wau olo debo odelo tojamani lei Lot. Tau-tauwalo hipo lamela hipo ngiluma, hipopo taalia, hipo tolopania halabolu wau pangimba wau hipo mongula bele.

²⁹ Bo tou̒ tei Lot yilumualai lonto Sodom, todulahu boito tulu wau walilangi lotuhutai lonto hulungo wau lopobinasa olimongolio ngoa̒amila.

³⁰ Odieelo mola owowoluwoalio de todulahee lo Walao̒ Manusia poi̒laalolio mai.

³¹ Todulahee boito taa donggo woluo toitaato watopo belelio diila mao̒ polaahu u mohama babaa-langilio todelomo bele. Odito olo taa donggo to halabolu diila mao̒ pohualingo ode belelio.

³² Eelai mola wolo u malowali todile lei Lot!

³³ Taa motolopani mopoa̒ahu tutumulio, mao̒olia lo tutumulio. Bo tao̒olia lo tutumulio mapoa̒ahuwolo.

³⁴ Pomalacayalo: Tohui boito, duulota tadonggo tuutuluhu toheetule tuwau, ngota madeloolo; wau ngota tolaalio mao̒ poli.

³⁵ Mongobua duulota donggo hemo hilinga pale, ngota madeloolo wau ngota tolaalio mao̒ poli. [

³⁶ Taduulota donggo hemokalaja to halabolu, ngota madeloolo, wau ngota tolaalio mao̒ poli]”

³⁷ Tahidudua̒ li Isa malohintu mao̒, “Mamowali tou̒toonu uito Eeya?” Ti Isa lolametao̒, “Tou̒toonu omilate, teto obulungi mongongala milate.”