LUKASI 12 - KITABI HABARI MOPIOHE

Poe̒ela totau-tauwalo munapiki

¹ Hilihu-lihua tau hipo huhuuntula tunggula woluo tai̒lo dutaa̒a to oa̒atio. Tou̒ tau-tauwalo boito donggo hia̒mbua ti Isa lotahuda mao̒ ode tahidudua̒ o-Lio, “Poo̒daha-dahaalo mao̒ ragi tau-tauwalo Parisi, makusudu-U̒ omunaapiki limongolio.

² Diaaluo utuutuo̒ udiila oontonga, diaaluo u hitua-tuawua u sangaja hetuuo̒lo wau diila tamo bonggali.

³ U heloi̒ya limongoli tou̒ hui mao̒dungohe towakutu dulahu; wau u pilolohumi mongoli ode bulonga lotau todelomo huwali heu̒heu̒to, mapo malalumu lomola moloo̒po-oopolo mao̒.”

Oohelo mola to Eeya

⁴ “Poo̒toloma mao̒, mongo sahabati-U̒! Diila mao̒ oohe toli mongolio tamomate batanga mate-mateelo mao̒ bo diila mowali mohutu ulebe mao̒ leeto.

⁵ Mopiohulo poi̒laalo-U̒ mai olemu tatoonu tawajibu oohe limongoli. Oohelo mola Allahu Taa̒ala! Sababu lapatao̒ momate mate-mateelo mao̒, Tio okawasa olo mopomahulo ode delomo nalaka! Pomalacayalo, Tiolo tawajibu oohe limongoli.

⁶ Dinggota mohelu limo pilotali ngohalaga deeduluo mato lodoi upulito kikiio̒. Eleponu odito diaaluo penu boli tuwau mao̒ olipata lo Allahu Taa̒ala.

⁷ Huwoo̒ to lunggongumu olo mailia̒apa ngoa̒amilalo, sababu uito diila mao̒ oohe; timongoli lebe mao̒ ohalaga daa̒ wolo diding-gotawalo boito!”

Motolongaku li Isa Almasi totalu lotaa dadaata

⁸ “Poo̒toloma mao̒ tio̒otutua: Tamo tolongaku totalu lotaa dadaata deu̒ tio muri-U̒, tio matoloa̒kuo olo lo Walao̒ Manusia totalu lo mamaa-lai̒katiyalo Allahu Taa̒ala.

⁹ Bo tamomaahu totalu lotaa dadaata deu̒ tio muri-U̒ tio mapaahu olo lo Walao̒ Manusia totalu lo mamaa-lai̒katiyalo Allahu Taa̒ala.

¹⁰ Wonu tau moloi̒ya u hitua-tuawua lou̒ motehengi Walao̒ Manusia, tio mowali ambunguolo; bo wonu tio mohina Rohullah, yi tio diila mowali ambunguolo.

¹¹ Wonu timongoli deloolio ode bebee-leyaalo potabiaala u butoo̒lio totalu lo pamalenta meaalo takawa-kawasa, diila mao̒ polowalo tomimbihu woloolo mola timongoli musi mopodulua batanga meaalo tomimbihu wolo umusi loi̒ya limongoli.

¹² Sababu wolo umusi loi̒ya limongoli boito maa̒ajalio lo Rohullah olemu to wakutuulio.”

Pohumaya lotaakaya tamohulodu

¹³ Ngotaalio towolota lotaa dadaata loloi̒ya odeli Isa, “Paaa̒ Guru, nte ahuli mao̒ li Paaa̒ wutato lowatia molayadei halata ngotayadu monto halata u tilolaa mao̒ liyamo lamiaatia.”

¹⁴ Ti Isa lolametao̒, “Wutato, tita talomuduo̒ ola-U̒ lowali hakimu meaalo tamooloyade pusaka towolota limongoli duulota?”

¹⁵ Lapatio mao̒ totaa ngoa̒amila tawoluo teto, ti Isa lotahuda, “Poo̒daha-dahaalo mao̒ wau pou̒lintapolo mola, diila bolo timongoli mowali tamaa̒. Sababu tutumulo manusia diila tolomodu mohalapu to okokayalio, eleponu halataalio laba-labaalo daata.”

¹⁶ Lapatao̒ ti Isa lohungguli mao̒ pohumaya botie, “Woluo taakaya ngota. Tio ohuta u hemongohi tilapulo ngohuntua daa̒.

¹⁷ Taakaya boito mahemo mikiilangi mola todelomo hilaalio, ‘Madidu otambati poli u polahuwalo tilapulo hutau̒. Wolo aakaliu̒ botia?’

¹⁸ Lapatao̒ tio muli lomikiilangi mola wau loloi̒ya to batangalio lohihilao, ‘Naa, wau̒ oa̒akali; yibunguu̒ mapei̒ longgaluu̒ tulusi mapei̒ bonguu̒ ulebe udaa̒ mao̒. Mota teto matahuwou̒ paleu̒ ngoa̒amila wau wolo babalangiu̒ uwewo.

¹⁹ Lapatao̒ maloi̒yau̒ mao̒ to batangau̒ lohihilao: Yio̒ mapilaae̒da! Totoonulalo umopio malo tapumu wau diila hua̒a mopulito ngotilonggadu ota-otaunualio mola. Pohuhelilo masaatia! Polamelolo pongilulo wau nii̒matiyalo tutumulumu!’

²⁰ Bo Allahu Taa̒ala lotahuda mai olio, ‘Wuu tamohulodu! Tohuilo botie yio̒ maamate, lapatao̒ tatoonu tamaa moo̒tapu ngoa̒amila okokaya u mailimou̒mu ode batangamu boito?’

²¹ Odieelo mola waliilio lou̒ timii̒du tahemo tolopani mowali kaya ode batangalio lohihilao, bo diila motolopani mowali kaya tomato lo Allahu Taa̒ala.”

Pomalacayalo to Allahu Taa̒ala

²² Lapatao̒ ti Isa lotahuda mao̒ to tahidudua̒ o-Lio, “Uito sababuulio Wau̒ motahuda mai, ‘Diila mao̒ polawalo tomimbihu tutumulumu, wolo umaa polameli mongoli, meaalo wolo umaa pomake limongoli.’

²³ Tutumulo botie lebe mao̒ lou̒ aalo, wau batanga lebe mao̒ wolo pakeyangi.

²⁴ Poo̒tuota mao̒ bubuu-lungiyalo paao̒! Timongolio diila helo pomulo, diila helolipu, diila olo ohudungu meaalo oyibungo. Bo Allahu Taa̒ala helolaala olimongolio! Timongoli lebe ohalaga daa̒ wolo bubuu-lungiyalo boito!

²⁵ Tatoonu towolota limongoli wolo ololawalio mowali mopohayao̒ tutumulio eleponu bo ngoi̒di?

²⁶ Wonu sua̒li debo odelo kikii̒o leeto olo, madiila mowali pohutuo limongoli, yilongola molawalo u wewolio?

²⁷ Poo̒tuota mao̒ woloolo mola bubuu-ngawaalo patihu boito mobutu; bubuu-ngawaalo boito diila hipo kalajawa, diila olo hipo hewola; Bo Olongia Salomo tao̒dito kayalio olo diila helomake boo̒ u odito piohio odelo bubuu-ngawaalo boito!

²⁸ Huo̒yoto tohuta datahu wau luasi mobutu dulahe botie wau loombu mola mapobuolio tunggula maahu. Openu boli odito Allahu Taa̒ala helo podadai huo̒yoto boito odito piohio. Tidiyolo mao̒ timongoli! Bo timongoli diila boti palacaya!

²⁹ Oditolio, diila mao̒ polawalo wau polingu tomimbihu wolo umaa polamelo wau yilumolo.

³⁰ Susuu-aliyaalo debo odelo uito heilapita lotaa diila motota lo Allahu Taa̒ala. Lebe-lebe pomao̒ otaawa lo Allahu Taa̒ala limongoli deu̒ timongoli palalu ngoa̒amilalo boito.

³¹ Bo timongoli musi motolopani alihu Allahu Taa̒ala momalenta to tutumulumu, yi uwewolio boito mawohi lo Allahu Taa̒ala olo olemu.”

Halata tosologa

³² “Timongoli u bo ngoi̒di jumulaalio, diila mao̒ oohe! Sababu Allahu Taa̒ala limongoli sanangi mongohi mai olimongoli balakati monto Pomalentaa-Lio.

³³ Potaliyalo milikimu wau wohia mota doilio ode taa mosikini. Pohutua mao̒ ode batangamu lohihilao dompeti udiila mowali moodulo, deu̒ito-yito halata u tilahu tosologa. Halata boito diila mowali mooli sababu tamootao̒wa diila mowali mohama wau wale olo diila mowali mopolusa mao̒.

³⁴ Sababu tou̒toonu halatamu teto olo hilaamu!”

Tamoomayawa talaito dapadapato

³⁵ “Poo̒daha-dahaalo mao̒ motaalua lotimii̒du sua̒li. Timongoli musi laito dapadapato mohiboo̒ wau tohemu debo lei̒lei̒ito,

³⁶ tutuuwauwa odelo tahi pomayawa tadonggo dapadapato hemohima oli tuanilio mohualingai monto potihunggu lonika. Wonu tituani boito mohualingai wau mongokoa̒ huhebu, timongolio mahua̒a momuo̒ huhebu.

³⁷ Donggo boli pae̒daalio tahi pomayawa u odungga donggo hemohima towakutu tituanilio meidungga mai. Pomalacayalo: tituani boito mamoti dapato wau mopoa̒hu mao̒ tahi pomayalio boito motihuloa̒a, tulusi tio mohinta olimongolio.

³⁸ Donggo boli pae̒daalio tahi pomayawa boito wonu tituani limongolio moo̒dungga olimongolio donggo hiwimawa, eleponu tio meidungga to tomutaa̒ lou̒ hui meaalo lebe moboyu mai woleeto!

³⁹ Eelai mao̒ utie! Wonu otaawa lotaa ohuu̒wo lobele jamu ngoolo tamootao̒wa monao̒ mai, tio mamo poo̒daha alihu tamootao̒wa diila tumuwoto ode delomo belelio.

⁴⁰ Sababu uito timongoli olo musi motidapato sababu Walao̒ Manusia mamei dungga mai tosaaa̒ti udiila helantobu limongoli.”

Tamoomayawa u tatapu wau molotolo hilao wau tamoomayawa tadiila tatapu wau molotolo hilao

⁴¹ “Eeya, wolo pongaajali boito pilomatuju lo Eeya ode mongowatotia meaalo totaa ngoa̒amilalo?” yilintu mao̒ lei Petrus.

⁴² Eeya lolametao̒, “Tatoonu tamoomayawa u tatapu wau molotolo hilao wau molinepo tilinggula piluduo̒ lituanilio mowali tau̒wa lo tahi pomayawa wewolio alihu tio mopotamela olimongolio to wakutuulio?

⁴³ Donggo boli sanangilio tamoomayawa boito wonu tituanilio mohualingai wau moo̒dungga olio donggo hemoponao̒ tuugasilio!

⁴⁴ Pomalacayalo: Tituani boito mamo pomalacaya mao̒ ngoa̒amila halataalio to tamoomayawa boito.

⁴⁵ Bo wonu tamoomayawa boito moloi̒ya todelomo hilaalio, ‘Tuani donggo mohiheo watia mohualingai,’ tulusi tio momate ngoa̒amila tamomayawa wau molamelo mongilu tunggula huwoa̒alo,

⁴⁶ yi tituanilio mamo hualingai todulahu wau jamu udiila ota-otaawa mao̒. Wau tamoomayawa boito mapateelio mongo-mongongotolo mao̒ lituanilio wau pohutuolio ngopaladu wolo tau-tauwalo tadiila modungohe to Allahu Taa̒ala.

⁴⁷ Tamoomayawa tamotota hilaa lituanilio, bo diila motidapato wau diila mohutu u kahandakio lituanilio boito, mabuboa̒lio mongo-mongongotolo mao̒.

⁴⁸ Bo tamoomayawa tadiila motota u otohilaa lituanilio, lapatao̒ mohutu hitua-tuawua utalatala tilinggula musi buboa̒lo, yi mabuboa̒lo lou̒ moheelo wambao̒. Sababu taa u mailohia dadaata, monto olio mopohilelio wolo moo̒ohuu̒ u dadaata olo. Wau tamaa pilo-malacaya mao̒ udadaata, monto olio mapohilelio wolo moo̒ohuu̒ u dadaata olo.”

Diila polodame bo pololawani

⁴⁹ “Wau̒ dungga-dungga mai mopotoodei u moo̒pobu todunia botie. Donggo boli piohio wonu tululio madilumei̒to!

⁵⁰ Donggo woluo polodutolo polu-polutuo̒ umusi dutola-U̒. Wau hilaa-U̒ balisa daa̒ tou̒ uito boito diipo motoduo mai.

⁵¹ Wolo to lantobi mongoli Wau̒ meidungga mai modelo polodame ode dunia? Diila, diila polodame bo wambao̒ pololawani.

⁵² Tumula mao̒ botia ungaalaa̒ tilitangoa lou̒ limolota tinggai motehengia, toulota moluwali taduulota meaalo taduulota moluwali tatoulota.

⁵³ Tiyamo mamoluwali walai̒o talolai̒ wau walai̒o talolai̒ mamoluwali oliyamolio. Tiilo moluwali walai̒o bua wau walai̒o bua mamoluwali oliilolio. Tiilo moluhengo mamoluwali moluhengio bua wau moluhengo bua mamoluwali tiilo moluhengio.”

Moo̒onuhe tuoto lojamani

⁵⁴ Ti Isa lotahuda mao̒ olo totaa dadaata, “Wonu timongoli moo̒onto heengo mobotulo ode ambahu otolopa, timongoli hua̒a moloi̒ya, ‘Madidiyalo.’ Wau otu-otutuulo mao̒ dilidia mai.

⁵⁵ Wonu timongoli moo̒laasa dupoto meidungga mai monto hulialio, timongoli mamoloi̒ya, ‘Mamopatu mai’ Wau otu-otutuulo mao̒ mopatu.

⁵⁶ Timongoli taa u motohilaa diila otu-otutuulo mao̒! Timongoli mowali motakusili lou̒ momilohe owowoluwoa lohulungo wau dunia. Yilongola tutuuotaalo jamani botie diila mowali takusilio limongoli?”

Podameyalo wolo musu

⁵⁷ “Yilongola timongoli diila molantu lohihilao wolo ubanali?

⁵⁸ Wonu woluo tau mopodulohu olimongoli ode bubutoo̒, tolopania mao̒ tio̒otutua u mopoo̒ lapato palakala boito wolio tou̒ timongoli donggo tohuungo dalalo. Wonu diila, de tio tamodedea̒ olimongoli ode talu lobutoo̒ wau butoo̒ boito mamohudu olimongoli ode Pulisi, wau Pulisi mamopo tuwoto olimongoli ode delomo tutupa. Pomalacayalo!

⁵⁹ Timongoli diila talumualai monto tutupa boito tou̒ diipo moo̒bayali dintamu ngoa̒amila.”