LUKASI 11 - KITABI HABARI MOPIOHE

Pongaajali li Isa pasali lodua̒

¹ Todulahu tuwau ti Isa lodua̒ totambati tuwau. Tou̒ mailapato lodua̒ ngotaalio lo tahidudua̒ o-Lio loloi̒ya, “Eeya, nte ajalia mai mongowatotia odelo tei Yahya helo ngaajali lodua̒ to tahidudua̒ olio.”

² Yi ti Isa lotahuda mao̒ olimongolio, “Wonu timongoli modua̒, loi̒ya mao̒ odie, ‘Allahu Taa̒ala, Eeyalo Paapa bo Tuwa-tuwaulo. Pohileaala dua̒ Eeya tuboolo wau hulumatiolo.

³ Wuduwalo mai timii̒du dulahu ua̒alo upalaluo lo mongowatotia,

⁴ Ambungua mai duduu-sawaalo mongowatotia, sababu mongowatotia olo hemo ngambungu timii̒du tau tao̒totala to mongowatotia. Wau diila mao̒ polulia mongowatotia oolia lo palacaya towakutu mongowatotia yimontalalio.’ ”

⁵ Ti Isa lotahuda mao̒ to tahidudua̒ o-Lio, “Humayaalio ngotaalio limongolio monao̒ ode bele lo tamanilio to tomutaa̒ lou̒ hui, wau moloi̒ya, ‘Tamani bulotipo mai roti tolobotu,

⁶ sababu tamaniu̒ tadonggo todelomo nonao̒, boheli lohepitao̒ ode bele wau wau̒ madidu o ua̒alo pohinta olio.’

⁷ Humayaalio tamani tanilao̒mu boito molametao̒ odie, monto delomo belelio, ‘Diila mao̒ posuusawa wau̒! Huhebu maleiuunti wau wau̒ wolo mongo walau̒uu̒ malo tuluhu. Wau̒ diilalo moo̒ bongu wau mongohi mai wolo-wolo olemu.’ ”

⁸ “Lapatao̒ woloolo mola?” Tahuda mao̒ li Isa wumbutio mola. “Wau̒ motahuda mai, ooo̒! Openu yio̒ tamanilio, tio diila tamohuto mobongu wau mongohi mai wolo-wolo olemu. Bo tumbao̒ sababu yio̒ diila molaasa moolito mohile to olio mololaalaaita, yi tio mamobongu olo wau mamongohi olemu wolo u palaluwomu.

⁹ Oditolio, Wau̒ motahuda mai olemu: Pohileelo, yi timongoli mawohialio; loloheelo, yi timongoli mamoo̒tapu; pongokoo̒lo, yi huhebu mahuo̒olio olemu.

¹⁰ Sababu tamohile mamololimo; tamololohu mamoo̒tapu wau tamongokoo̒ mahuo̒walio tohuhebu.

¹¹ Towolota limongoli tingga woluo tiyamo tamongohi tulidu to walai̒o, wonu walai̒o mohile uponula?

¹² Meaalo mongohi bambau, wonu walai̒o mohile putito?

¹³ Openu timongoli moleeto, debo otaawa limongoli olo mongohi u mopiohu towalai̒ mongoli. Tidiyolo mao̒ Allahu Taa̒ala to Sologa! Allahu Taa̒ala mamongohi mai Rohu-Lio to limongolio tamohile to o-Lio!”

Ti Isa wolo Beeljebul

¹⁴ Todulahu tuwau ti Isa lopohinggi rohu u moleeto yilumualao̒ lonto ngotaalio buubu. Tou̒ rohu u moleeto boito yilumualao̒, tau boito malo bisala. Dadaata tau lolinggolabu,

¹⁵ bo woluo talo loi̒ya, “Tio mowali mopohinggi rohu u moleeto sababu kawasa lo Beeljebulu, tau̒wa lorohu u moleeto boito.”

¹⁶ Woluo olo tau-tauwalo wewo tao̒hilaa mopotala li Isa, oditolio timongolio lohile li Isa mohutu u moo̒linggolabe odelo tuoto deu̒ Tio leidungga mai lonto Allahu Taa̒ala.

¹⁷ Bo otaawa li Isa makusudu limongolio. Yi Tio lotahuda mao̒ olimongolio, “Wonu lipu tuwau mopoo̒ mowali hipala-palateiya u tinggai mumuusua, lipu boito diila moo̒ tahangi. Wau wonu ungaalaa̒ tuwau mamo bubuua̒lawa wau mumuusua ngota timongota, ungaalaa̒ boito mamoa̒ntulu.

¹⁸ Odito olo todelomo bele biluloa̒ saaha li olongia lo Ibilisi; wonu ngopolemboa̒ moloohulua wolo polemboa̒ uwewo, yiladia boito mamoa̒ntulu. Timongoli hipoloi̒yawa deu̒ Wau̒ lopohinggi rohu u moleeto boito sababu kawasa lo Beeljebul.

¹⁹ Wonu odito, wolo kawasa lo tatoonu tahidudua̒ olemu lopohinggi roroo-huwaalo u moleeto boito? Tahidudua̒ olemu boitolo talo poi̒laalo mai deu̒ timongoli tilala!

²⁰ Bo Wau̒ lopohinggi rohu u moleeto boito wolo kawasa lo Allahu Taa̒ala, wau uito boliilio mao̒ deu̒ Allahu Taa̒ala malo lumulo lomalenta tohuungi mongoli.

²¹ Wonu tamolotolo ngota, wolo otingolo wimu-wimumuto, modaha belelio lohihilao, ngoa̒amila milikiilio mamoa̒ahu.

²² Bo wonu ngotaalio talebe molotolo moluhu wau moo̒laahe olio yi taa u lebe molotolo boito mamohehu ngoa̒amila tingolo u hepo ngakulio lotaa ohuu̒o lobele boito, lapatao̒ molaya-layadeo̒ ngoa̒amila balangilio.

²³ Taa u diila motiwambao̒ de ola-U̒, tutuulio tutu moluwali ola-U̒, wau taa diila momantu ola-U̒, tutuulio tutu mopoo̒lusa kalajaa-U̒!”

Wuwalingai lorohu u moleeto

²⁴ “Wonu bolo rohu u moleeto mololaa mao̒ tahingota-ngotawa, rohu boito momalito to tataa-mbatiyalo u mohengu u molololohe pohuhelialio bo diila motapulio. Masababu uito, tio moloi̒ya, ‘Wau̒ mamuli mohuwalinga mola ode bele u matilolau̒ mai!’

²⁵ Tou̒ tio leidungga mola odito, ilodunggalio bele boito belesi wau aa̒atulu.

²⁶ Lapatao̒ tio lonao̒ wau lodelo pitu rohu uwewo ulebe mao̒ moleeto wolio. Tulusi timongolio tilumuwoto ode delomo tau boito lapatao̒ lotibiluloa̒ teto. Wau pulitio mao̒ owowoluwoa lotau boito lowali lebe loleetao̒ wolo ubohulio.”

Osanangi u tutuulio tutu

²⁷ Lapatao̒ ti Isa lotahuda mao̒ odito, taabua ngota towolota lotaa dadaata boito loloi̒ya li Isa, “Otutu sanangi tutu taabua talo potutu mai wau longohi tutu ole-Mu!”

²⁸ Boti Isa lolametao̒, “Lebe sanangi tutu poli taa u modungohe tahuda lo Allahu Taa̒ala wau pohutuolio!”

Tau-tauwalo mei̒hutu li Isa u moo̒linggolabe

²⁹ Tou̒ tau-tauwalo donggo hia̒mbua totili li Isa, Tio lopo tolonga mola bibiisalawa-Lio, “Ua-Lio mao̒. Donggo boli leetio tau-tauwalo tojamani botie. Timongolio mei̒hutu tuwaulio moo̒linggolabu alihu timongolio moo̒ palacaya ola-U̒. Bo timongolio diila tawohiyalo penu boli tuwau mao̒ moo̒linggolabu, ngopohia moo̒linggolabu li Nabi Yunu.

³⁰ Odelo woloolo mola ti Nabi Yunu tuwaulio u moo̒linggolabe totau-tauwalo kota to Niniwe, odito olo Walao̒ Manusia mamowali tuwaulio lo moo̒linggolabe totau-tauwala tojamani botie.

³¹ Todulahu kiama Olongia Tabua monto Huliaalio mamobongu mai pee̒-pee̒enta wolo tau-tauwala tojamani botie, wau mopotuludu olimongolio. Sababu, u modungohe pongaajali lei Salomo tamolinepo, Olongia Tabua boito malo huwato ode u molaminga daa̒ monto huudu dunia. Bo teea botia woluo talebe udaa̒ wolei Salomo!

³² Todulahu kiama, tuango lipu lo Niniwe mamobongu pee̒-pee̒enta wolo tau-tauwalo tojamani botie, wau mopotuludu olimongolio, sababu taulo Niniwe boito lolilihu to duduu-sawaalo limongolio tou̒ tei Yunu lohutuba to limongolio. Bo teea botia woluo talebe udaa̒ wolei Yunu!”

Mobaango wau modio̒lomo

³³ “Diaaluo taa u mopoleitaa tohe lapatao̒ tuuo̒lio meaalo tau̒belio wolo tombe. Madutuolio tohe boito to oa̒ato tohe, alihu taa tumuwotao̒ mamoo̒onto tilangio.

³⁴ Mato yito tohe lobatanga. Wonu matomu motilango, ngoa̒amila batangamu mobaango daa̒. Bo wonu matomu mopulau, ngoa̒amila batangamu mowali modio̒lomo daa̒.

³⁵ Masababu uito, poo̒daha-dahaalo mao̒, diila bolo tinelo uwoluo to batangamu boito mowali modio̒lomo.

³⁶ Wonu ngoa̒amila batangamu mobaango, wau penu boli ngotayadu diila modio̒lomo, yi ngoa̒amila batangamu boito mobaango daa̒ debo odelo tilinela lotinelo tohe.”

Ti Isa lopotala tau-tauwalo Parisi wau guguu-ruwaalo agama

³⁷ Tou̒ ti Isa lapato lotahuda mao̒, ngotaalio lo Parisi loloduo o-Lio lolamelo to belelio. Ti Isa malonao̒ mota lolamela teto.

³⁸ Taulo Parisi boito lolinggolabu loo̒onto li Isa lolamela lou̒ diila longulo uluu̒-Lio loduduo̒ wuu̒du lo agama.

³⁹ Sababu uito Eeya lotahuda mao̒ olio, “Memangi timongoli tau-tauwalo Parisi u biasaalio hemo poo̒belesi manggo wau pingge towimbihu bulemengio, bo to batangamu lohihilao polupolu wolo palangi wau moleeto.

⁴⁰ Timongoli mohulodu! Diila maa Allahu Taa̒ala talohutu towimbihu bulemengio boito, malohutu olo towimbihu delomio?

⁴¹ U woluo todelomo manggo wau pinggemu boito, uitolo umusi wohi mao̒ limongoli totau-tauwalo mosikini. Wolo pohuli boito, ngoa̒amilalo mamowali belesi olemu.

⁴² Matopotala timongoli, tau-tauwalo Parisi! Tilapulo lou̒ pilomulomu debo odelo solasi wau denggu-denggu wau lamba-lamba uwewolio, yilohi limongoli ngotayade mopulu ode Allahu Taa̒ala, bo ua̒adili wau motolia̒ngo to Allahu Taa̒ala diila padulio limongoli. Lebe-lebe pamao̒ uitolo u patutilio pohutuo mao̒ limongoli, lou̒ diila momalongo uwewolio olo.

⁴³ Matopotala timongoli, tau-tauwalo Parisi! Timongoli motohilaa huhuloa̒a u hehulumatio lotau todelomo bele potabiaalo, wau motohilaa hulumatiolio to papaa-taliyaalo.

⁴⁴ Matopotala! Timongoli debo odelo kuubulu u diilalo opai̒talio, u hepo duduutaa̒ lotau lou̒ diila totatota lou̒ tau.”

⁴⁵ Tala ngota guru lo agama loloi̒ya mao̒ odeli Isa, “Paaa̒ Guru, wolo tataa-heyaalo boito, ti Paaa̒ malohina olami olo!”

⁴⁶ Ti Isa lolametao̒, “Matopotala timongoli olo, guguu-ruwaalo agama! Timongoli hemohile wolo moo̒ohuu̒ susuu-aliyaalo u mototolo wau hemongohi wuwuu-uduwaalo u hibuuheta, bo timongoli lohihilao openu bo ngoi̒di mao̒ diila mohuto motulungi tau moponao̒ uito.

⁴⁷ Matopotala timongoli! Timongoli lomongu kuubulu ode mongo nabi, u tumbao̒ hepilate yila-yilatelo mao̒ linenemoyamu lohihilao.

⁴⁸ Oditolio timongoli lohihilao lomasisi deu̒ timongoli akolo wolo umaa pilohutu linenemoyamu; sababu memangi timongolio talomate yila-yilatelo mao̒ mongo nabi boito wau timongolilo talo mongu kuubululio.

⁴⁹ Uito sababuulio Tinepo lo Allahu Taa̒ala lotahuda, ‘Wau̒ mamolao mai ode limongolio mongo nabi wau mongo utoliya-U̒ ngotayadu mapateelio mate-matelo mao̒ wau ngotoyadu maa alinayalio!’

⁵⁰ Allahu Taa̒ala mohutu mai uito alihu tau-tauwala tojamani botie moo̒tapu hukumani sababu timongolio malomate yila-yilatelo mao̒ u pilohutu limongolio tomongo nabi ngoa̒amila anggadu dunia botie pilopowali,

⁵¹ tumulalo mao̒ monto pilomatea olei Habel yila-yilatelo mao̒ demola pilomatea olei Jakaria yila-yilatelo mao̒ uilowali towolota lomesba wau Bele lo Eeya. Pomalacayalo: Tau-tauwalo tojamani botie tantu mahuku-maniyolo sababu ngoa̒amilalo boito.

⁵² Matopotala timongoli, guguu-ruwaalo agama! Uu̒unti u pomuo̒ huhebu lo pongotota tahutahu to limongoli, bo timongoli lohihilao diila mohuto tumuwoto ode delomio u mololohe pongotota boito. Bolii̒o mao̒ timongoli hemo ngabu-ngabuto tau-tauwalo tahemo tolopani tumuwoto ode delomio!”

⁵³ Tou̒ ti Isa lololaa mao̒ tambati boito, guguu-ruwaalo agama wau tau-tauwalo Parisi helo tulete wolo ulintapo li Isa wolo moo̒ohuu̒. Timongolio mahemo podudulao̒ totoonulalo yiyintu u motota mao̒ tuango hilaa lotau to o-Lio alihu Tio mohuto mobisala pasali lou̒ dadaata sua̒li.

⁵⁴ Wau sambela uito timongolio hemo poo̒tuoto tio̒otutua o-Lio wau hemololohe totala lou̒ wolo u heloi̒yaa-Lio.