LUKASI 1 - KITABI HABARI MOPIOHE

Pomuo̒

¹ Teopiilus taa u obudi, Dadaata tau malo tolopani loluladei wolo aa̒atulu tomimbihu popoo-lou̒tiyalo u mailowali mai to huungonto.

² Timongolio loluladu lotuuu̒de lou̒ u sililitalio mai ode olanto lotau-tauwala taloo̒onto lohihilao popoo-lou̒tiyalo boito monto bohulio, wau lapatao̒ helo pololadu habarilio.

³ Tou̒ watia wolo ulintapo lotulete mao̒ ngoa̒amilalo boito lonto bohulio, ilanggapu lowatia mopiohu u moluladei podulohu tuwau u aa̒atulu odeli Tuani.

⁴ Pilohutu lowatia uito, alihu otaawa mao̒ li Tuani deu̒ wolo u mapilo ngaajali odeli Tuani memangi otutu.

Pilotutua olei Yahya Tamopolihua piloo̒taa

⁵ Tou̒ tei Herodes lowali olongia tolipu lo Yudea, woluo iimamu ngota tanggulio Jakaria. Tio tuotuoto topalatei lomongo iimamu Abia. Dilelio tanggulio Elisabet, olo wali mai li iimamu.

⁶ Tutumulo lo motolodile boito moo̒sangi hilaa lo Allahu Taa̒ala. Duduulota modungohe palenta wau butoo̒ lo Eeya wolo lealeaatu lohilao.

⁷ Timongolio diila owalao̒ sababu ti Elisabet hunusa wau duduulotalo mapanggola.

⁸ Tou̒ dulahe tuwau, tou̒ palatei lei Abia loo̒tapu tayadu, tei Jakaria loponao̒ tuugasi debo odelo iimamu totalu lo Allahu Taa̒ala.

⁹ Wolo undiyani, u biasaalio hepohutuo mao̒ lomongo iimamu, tei Jakaria tilunulio u tumuwoto ode delomo Bele lo Eeya wau molapo alama.

¹⁰ Tou̒ upacala pomobuwalo alama donggo nao̒nao̒, dadaata tahi podua̒awa to bulemengio.

¹¹ Tou̒ boito malai̒kati lo Eeya lopo bilohei lobatanga odelei Jakaria. Malai̒kati boito tilimihulo to ambahu olowala lomeja tambati hepo lapowalo alama.

¹² Tou̒ tei Jakaria loo̒onto malai̒kati boito, tio lolingu wau yiloohe.

¹³ Bo malai̒kati boito loloi̒ya mao̒, “Diila oohe, Jakaria! Allahu Taa̒ala malo dungohe dua̒mu. Dilemu ti Elisabet mamopotutu mai walao̒ talolai̒ ngota. Yio̒ musi mongohi mao̒ tanggula olio Yahya.

¹⁴ Yio̒ mameengahe tutu wau dadaata tamaa motiwengahe wonu walao̒ boito de mapotutulio mai!

¹⁵ Tio mamowali tau daa̒ moduduo̒ bibilohu lo Eeya, wau tio diila tamongilu angguru meaalo minumani u mototoheto. Anggadu potutuolio mai tio makawasaa lo Rohullah.

¹⁶ Dadaata taulo Isirai̒lu mamuli podulungolio ode Allahu Taa̒ala, Eeya limongolio.

¹⁷ Tio mamowali utolia lo Eeya tamolotolo wau okawasa debo odelo tei Elia. Tio mamopo damea tiyamo wau walao̒, wau taadiila modungohe mamuli podulungolio ode dalalo pikiilangi u otutu. Lou̒ odito tio mopo dapato umati tuwau tomalei dapato ode Eeya.”

¹⁸ “Woloolo mola pongotaawa lowatia deu̒ sua̒li boito mamowali mai?” yilintu lei Jakaria ode malai̒kati boito. “Watia mapanggola, wau dile lowatotia olo mapanggola.”

¹⁹ Malai̒kati boito lolametao̒, “Wau̒ botie Jibrai̒ilu. Wau̒ hemomaya to Allahu Taa̒ala wau Tiolo talo poa̒hu mai olau̒ u mopo tunggulai habari mopiohu botie ode olemu.

²⁰ Wolo u mailoi̒yau̒ mai, mamowali to wakutuulio. Bo sababu yio̒ diila palacaya, yio̒ de diila moo̒ bisala; yio̒ mamowali bubu tunggula wolo uiloi̒yau̒ boito motoduo mai.”

²¹ Sambela uito, tau-tauwalo tulusi hemohima olei Jakaria. Timongolio lolinggolabe yilongola tio odito hiheolio todelomo Bele lo Eeya.

²² Wau tou̒ yilumualai, tio diila loo̒ bisala ode limongolio. Tio tulusi wambao̒ hemongohi isalati wolo uluu̒lio, wau debo buubu. Yi tau-tauwala olo lotota mao̒ deu̒ tio maloo̒onto tuwaulio lo bibilohu todelomo Bele lo Eeya.

²³ Lapatao̒ lopulito maasa lo tuugasilio to Bele lo Eeya, tei Jakaria olo lohualinga ode bele.

²⁴ Diila lohiheo lapatio mao̒, ti Elisabet dilelio maa ilombodaa̒ mai, tulusi lotiu̒lungo todelomo bele limo lohula mola hiheolio.

²⁵ Tio loloi̒ya, “Pulitio mao̒ Eeya malo tulungi mai olaatia wau lolulutao̒ ohihina laatia.”

Pilotutua li Isa piloo̒taa

²⁶ Tou̒ ti Elisabet maa ilombodaa̒ mai wolomo hula, Allahu Taa̒ala lopoa̒hu Malai̒kati Jibrai̒ilu ode Najaret, kota tuwau tomadala lo Galilea.

²⁷ Jibrai̒ilu yilao mota lo Allahu Taa̒ala ode tadulahu ngota, tai̒lunte Maria. Tadulahu boito matitii-lantahe wolo talolai̒ ngota tai̒lunte Yusu, wali li Olongia Dauda.

²⁸ Malai̒kati boito lonao̒ mai odeli Maria wau lotahuda mao̒, “Salamu, yio̒ tabilalakati lo Eeya wolo polu-polutuo̒! Eeya pee̒-pee̒enta wolemu!”

²⁹ Loo̒dungohe tahuda lo malai̒kati boito ti Maria iloohea, tilinggula mahemo hintu-hintu todelomo hilao wolo makusudu lo salamu boito.

³⁰ Yi malai̒kati boito lotahuda olio, “Diila oohe, Maria, sababu yio̒ motuuu̒de wolo hilaa lo Allahu Taa̒ala.

³¹ Yio̒ mao̒mbodaa̒ mai wau mamopotutu mai tau̒nge ngota, umusi wohiyamu mao̒ tanggulo Isa.

³² Tio mamowali udaa̒ wau maunteelo Walao̒ Allahu Taa̒ala Taa Laba-labaalo molanggato. Eeya Allahu Taa̒ala mamopowali o-Lio olongia debo odelo ti Olongia Dauda, nene moyalio.

³³ Wau Tio mamomalenta debo odelo olongia to wali mai lei Yako ohiheo-hiheolo mao̒. Yilaidia-Lio diila tao̒pulitio.”

³⁴ “Bo watia donggo tadulahu,” uali Maria ode malai̒kati boito, “woloolo mola sua̒li boito mamowali mai?”

³⁵ Malai̒kati boito malo lametao̒, “Rohullah mamei dungga mai ode olemu, wau kawasa lo Allahu Taa̒ala mamo henggubei olemu. Uitolo sababuulio walao̒ tapotutumu mai boito mau̒nteelo Mantali, Walao̒ Allahu Taa̒ala.

³⁶ Eelai mao̒: ti Elisabet, ilaatamu boito maa ilombodaa̒ wolomo hula, eleponu tio mapanggola wau tau hipoloi̒yawa deu̒ tio hunusa.

³⁷ Sababu ode Allahu Taa̒ala diaaluo u diila pongalo aakali.”

³⁸ Lapatao̒ ti Maria loloi̒ya mao̒, “Watia botie wato lo Eeya; huliaalo mai motoduo to olaatia debo odelo uiloi̒yamu.” Lapatao̒ malai̒kati boito malonao̒ lololaa mao̒ oli Maria.

Ti Maria mola lomilohe oli Elisabet

³⁹ Lolamemeto lapatio mao̒ uito, ti Maria lonao̒ mola ode kota tuwau to Yudea tomadala hihui̒-hui̒de.

⁴⁰ Tio lonao̒ ode bele lei Jakaria, wau tou̒ tilumuwotao̒, tio longohi salamu odeli Elisabet.

⁴¹ Wau odito ti Elisabet loo̒dungohe salamu li Maria, walao̒ tato delomo talomo li Elisabet boito ilumoliyoo̒. Yi ti Elisabet kiluwasa mai lo Rohullah,

⁴² tulusi longibode, “Yio̒lo talaba-labaalo bilalakati mai towolota lo ngoa̒amila mongobua! Babaa-kakatilo walao̒ tamaa potutumu mai boito!

⁴³ Tatoonu watia botie tilinggula ti Ibu lo Eeya lonao̒ mai ode laatia?

⁴⁴ Odito watia loo̒dungohe salamunto, walao̒ todelomo talomo lowatia ilumoliyoo̒ yileengahe.

⁴⁵ Potisangilo tutu yio̒, sababu palacaya deu̒ wolo u tilahuda lo Eeya olemu boito mamotoduo mai!”

Lapali sukuru li Maria

⁴⁶ Ti Maria loloi̒ya, “Hilaa lowatotia momuji mola to Eeya,

⁴⁷ wau jiwa lowatotia meengahu sababu Allahu Taa̒ala Tamoo-poa̒ahua lowatotia.

⁴⁸ Tio loe̒elai watotia, Wato-Lio taahina! Tumulalo mai botia ngoa̒amila bangusa hemoloi̒ya watotia sanangi tutu.

⁴⁹ Sababu Allahu Taa̒ala Taa Laba-labaalo kawasa lohutu mai susuu-aliyaalo udaa̒ olo watotia. Mantalilo mola tanggu-Lio.

⁵⁰ Wali domi wali Eeya lodehu hilao totaa moohe to o-Lio.

⁵¹ Wolo uluu̒-Lio u molotolo wau buheli Tio lopo bubuua̒yawa tahi sombongia, wau lopo ambulati patuju limongolio.

⁵² Mongo olongia yilaa-Hio lonto tambati huhuloa̒ li olongia wau taahina pilopolaio̒.

⁵³ Taa pola-polaango pilopotolu-Lio wolo totoonulalo u mopiohu, taakaya pilopolahi wolo laulau.

⁵⁴ Tio lotulungi Isirai̒lu wato-Lio, loduduo̒ danti u pilohutu-Lio woli nenemoyanto.

⁵⁵ Eeya diila lolipata danti-Lio, Tio ilomura lohilao odelei Abraham wau walilio mola tunggula ohiheo-hiheolo mao̒.”

⁵⁶ Otanu tolo hula mola hiheolio ti Maria lotibiluloa̒ woli Elisabet, bolo tio lohualinga ode belelio.

Pilotutua olei Yahya Tamopolihua

⁵⁷ Malei dungga wakutuulio ti Elisabet u motutu mai. Tio lopotutu mai walao̒ talolai̒ ngota.

⁵⁸ Mongo tiheedio wau mongo pohutatalio loo̒dungohe malo odito piohio Eeya toli Elisabet, wau timongolio olo lodudua̒ lotiwengahe wolio.

⁵⁹ Tou̒ tau̒nge boito o umulu walu hui, timongolio lonao̒ mai loluuna olio. Timongolio motohilaa mongunte mao̒ tau̒nge boito Jakaria modudua̒ tangguli paapalio, bo timaamalio loloi̒ya mao̒, “Diila!

⁶⁰ Tio musi wohiyalo tanggula Yahya.”

⁶¹ “Diaaluo penu boli ngotaa mao̒ monto mongo pohutatamu otanggula odito,” uali mongolio olio.

⁶² Tulusi wolo isalati, timongolio lohintu mao̒ odelei Jakaria tanggula wolo u mawohi mao̒ to walai̒o.

⁶³ Tei Jakaria malohile botulei tuwau tulusi loluladeo̒, “Tanggulio Yahya.” Timongolio ngoa̒amila lolinggolabe.

⁶⁴ Tou̒ boito olo tei Jakaria luli lowali lobisala wau lomuji mola Allahu Taa̒ala.

⁶⁵ Mongo tiheedio ngoa̒amila mailoohe, wau habari boito lololadulo mola ode ngoilanggubu madala to hihui̒-hui̒de lo Yudea.

⁶⁶ Ngoa̒amila taloo̒ dungohe sua̒li boito helo hintu todelomo hilao, “De mowali wolo walao̒ boito?” Sababu Eeya pee̒-pee̒enta wolio.

Tei Jakaria helo potunggulo habari lonto Eeya

⁶⁷ Tei Jakaria, tiyamo lowalao̒ boito, kiluwasa mai lo Rohullah tilinggula tio lopo tunggulo tahuli lonto Eeya. Tio loloi̒ya mao̒,

⁶⁸ “Dulo ito momuji mola to Eeya, Allahu Taa̒ala bangusa lo Isirai̒lu! Tio malei dungga mai lotulungi umati-Lio wau lopobebasi olimongolio.

⁶⁹ Tio longohi mai olanto tamoo-poa̒ahua tamolotolo boli buheli, wali lei Dauda, wato-Lio.

⁷⁰ Muloololio mai daa̒ lotimbuludu tomongo nabi tatilulao-Tio, Eeya malongohi danti-Lio

⁷¹ u mopoa̒ahu olanto monto musunto wau monto kawasa lotau-tauwalo tamolonuo̒ olanto.

⁷² U mopobilohei omura lohilaa-Lio ode loluhurunto, danti-Lio u mantali boito mapomataa-Lio mai.

^73-74 Tio lotadia tolei Abraham tipaapanto, wau lodanti u mopoa̒ahu olanto monto musunto, alihu ito diila moohe momaya o-Lio,

⁷⁵ laito taa̒luku wau hulumati o-Lio wau moposanangi hilaa-Lio ngotupa lo tutumulunto.

⁷⁶ Yio̒, wuu walau̒uu̒ mau̒nteelo nabi Allahu Taa̒ala Taa Laba-labaalo molanggato. Yio̒ yilao leimulo wolo Eeya mai momuo̒ dalalo o-Lio,

⁷⁷ u mopololadu ode umati-Lio deu̒ timongolio mapoa̒ahuwolo wonu Allahu Taa̒ala malo ngambungu duduu-sawaalo limongolio.

⁷⁸ Eeyanto mura lohilao wau boli tamoomonua; huna mopoa̒ahu olanto Tio dungga-dungga mai. Debo odelo mato lodulahu mobutu mai tou̒ dimodupo,

⁷⁹ odieelo mola Tio mongohi mai baangio to ngoa̒amila tau tahitumula todelomo u modio̒lomo wau hiwoohea. Tio modelo olanto ode dalalo udulu-dulunga ode odudame.”

⁸⁰ Walae̒e Jakaria boito he oduhenga mola udaa̒ wau he oduhenga mola lotolo rohulio. Tio lotibiluloa̒ to huta datahu u luasi daa̒ wau delita, tunggula leidungga wakutuulio tio lopobilohe batangalio to bangusa lo Isirai̒lu.