KOLOSE 3 - KITABI HABARI MOPIOHE

¹ Timongoli maluli pilotumu-lai pee̒-pee̒enta woli Almasi. Sababu uito mamusi timongoli motolopani u moo̒tapu susuu-aliyaalo u tosologa, tou̒toonu ti Isa hemo malenta pee̒-pee̒enta wolo Allahu Taa̒ala.

² Podulunga mao̒ pikiilangi limongoli to susuu-aliyaalo uteto, diila to susuu-aliyaalo u todunia.

³ Sababu timongoli mailate, wau tutumuli mongoli tutuuo̒ pee̒-pee̒enta woli Almasi todelomo Allahu Taa̒ala.

⁴ Naa, pobutua mai lo tutumulo tutu limongoli yito ti Almasi wau de wonu Tio oontonga, timongoli olo mamo tibilohe pee̒-pee̒enta wo-Lio todelomo odudaa̒-Lio!

Tutumulo udeedelo wau tutumulo u bohu

⁵ Sababu uito, pateilo mao̒ totoonulalo otohilaa lodunia u laito mopoo̒suusa batanga limongoli, debo odelo polohuloto, susuu-aliyaalo udiila paatuti, ohilaa moo̒huu̒, ohilaa u moleeto, wau ololanggamu (sababu ololanggamu yito tutuuwauwa wolo molubo balaahala).

⁶ Susuu-aliyaalo debo odelo uitolo u mopotoodei muluka lo Allahu Taa̒ala totau-tauwalo tadiila hipo dungohe o-Lio.

⁷ Muloololio mai timongoli lohihilao olo hipodudua̒ totoonulalo ilohilaa boito, tou̒ timongoli kiluwasalio.

⁸ Bo botia mamusi timongoli molapi mao̒ susuu-aliyaalo u moleeto monto batanga limongoli: diilalo poingo, meaalo molilau meaalo o pongolaasa molonuo̒ ode taa wewo. Diila mao̒ poluwala sama-samaata monto tunggili mongoli loi̒ya u momuayo meaalo loi̒ya u kootolo.

⁹ Diila mao̒ pohimbulo ngota timongota, sababu tutumulo udeedelo wolo ngoa̒amila watadelio mailinggi limongoli.

¹⁰ Timongoli botia mailohia-Lio mai tutumula bohu. Timongoli yito manusia bohu, tadonggo hepo bohua-Lio mololaalaaita lo Talopowali mai olio, deu̒ito-yito Allahu Taa̒ala, lodudua̒ rupa-Lio lohihilao. Makusudulio yito alihu timongoli motota lo Allahu Taa̒ala wolo wimu-wimumuto ngoa̒amilalo.

¹¹ Odelo akibati leeto boito madiduu̒ ngoa̒amila polo hiihede towolota taulo Yahudi wau diila Yahudi, taa tiluuna wau taa diila tiluuna, diduu̒ polo hiihede towolota lotaa deli wau taa diila oa̒dabu, towolota lowato wau taa lolopato, sababu ti Almasi yito ngoa̒amilalo sama-samaata wau Tio lotituwau woli mongolio ngoa̒amilalo!

¹² Wutato yito umati lo Allahu Taa̒ala. Allahu Taa̒ala lomonu olimongoli wau lolulaota olimongoli u tolomodu lowali miliki-Lio. Uitolo sababuulio timongoli musi mopo biloheo̒ modehu hilao, timongoli musi ohilaa mopiohe, motidupapa lohilao, molumboyoto lohilao, wau tahangi modutolo.

¹³ Timongoli musi sabali ngota timongota, wau moa̒aa̒mbungua wonu woluo taa oniyati ode taawewo. Eeya wolo hilaa sanangi longambungu olimongoli, oditolio timongoli olo musi mohuto mongambungu ngota timongota.

¹⁴ Wau ulebe polohuna daa̒, deu̒ito-yito: Timongoli musi mototoolia̒nga sababu tolia̒ngo boitolo u mopotuwau tutu to Mongo wutato ngoa̒amilalo tilinggula mowali wimu-wimumuto ngoa̒amilalo.

¹⁵ Mamusi totoonulalo putusani limongoli tantuo mao̒ lo odudame uilohi mai li Almasi todelomo hilaa limongoli. Sababu Allahu Taa̒ala lotianga olimongoli u lowali pongawaa̒ lou̒ ngobatanga, alihu timongoli tumumulo todelomo odudame monto li Almasi boito. Mamusi timongoli mosukuru mola.

¹⁶ Mamusi totoonulalo pongaajali li Almasi u polupolu lobalakati meitahu ode delomo hilaa limongoli. Mamusi timongoli moa̒aa̒jalia wau tinggai mongohi nasehati wolo molinepo daa̒. Popolahua mola Jaburu wau puji poloi̒laalo momuji wau lalaahuwala lorohu; Popolahua mola ode Allahu Taa̒ala wolo pongo laasa sukuru to delomo hilaa limongoli.

¹⁷ Ngoa̒amila wolo upohutuo meaalo loi̒ya limongoli, mamusi uito pohutuwola wau loi̒yaalo to tangguli Isa Eeya. Posukurulo mola ode Allahu Taa̒ala ti Paapa tou̒ wolo u pilohutu li Isa olimongoli.

Wuwuu-mbutowalo hihilao todelomo tutumulo u bohu

¹⁸ Mongo wutato tamowali dile taabua! Podungohulo to dilemu, sababu odi-odieelo mola patutilio pii̒limu odelo taulo Nasara.

¹⁹ Mongo wutato tamowali dile talolai̒! Tolia̒ngi mao̒ dilemu. Diila mao̒ banggangai timongolio.

²⁰ Mongo walao̒! Deu̒ito-yito uwajibu olimongoli odelo taulo Nasara u laito modungohe tomongo dulaa̒mu, sababu ui-uitolo umoo̒ sanangi hilaa lo Allahu Taa̒ala.

²¹ Mongo wutato tamowali tiyamo! Diila mao̒ pongongoto hilaa lomongo walau̒mu tilinggula timongolio mowali oolia lo halapani.

²² Mongo wutato tamowali wato! Todelomo toonulalo sua̒li, mamusi timongoli modungohe toli tuanimu u todunia botie. Diila mao̒ podungohe to limongolio bo tou̒ timongolio donggo hemongimato olimongoli, sababu timongoli ohilaa pujiolo. Dungohi mao̒ timongolio wolo hilaa u ihilasi, sababu timongoli mohulumati Eeya.

²³ Penu boli kalaja wolo u wohilio olemu, mamusi kalajai mao̒ limongoli wolo hilaa u lealeaatu, debo odelo Eeyaalo tahe bayawa limongoli, wau diila bo manusia.

²⁴ Poo̒toloma mao̒ deu̒ timongoli mamololimo wuupa monto Eeya. Wolo upilopo dapato lo Eeya ode umati-Lio, uitolo u mawohi-Lio mai olemu. Sababu tuani tao̒tutuulio mao̒ donggo hebayawa limongoli yito ti Almasi lohihilao.

²⁵ Wau penu boli tatoonu tamohutu totala, mamomanta totoonulalo totalalio boito; sababu Eeya diila momilohe baya.