JAKARIA 9 - KITABI HABARI MOPIOHE

Polomutoo̒ to lilii-puwaalo tiheedu lo Isirai̒lu

¹ Uti-utieelo tahuli lo Eeya. Eeya malolantu mai u mohukuumani lipu Hadrakh wau kota lo Damusiki. Diila bo wambao̒ susuu-kuwaalo Isirai̒lu, bo olo tiilo lokota Siria yito miliki lo Eeya.

² Hamat u sisiipatia wolo Hadrakh olo miliki lo Eeya, odito olo kokoo-tawaalo Tirus wau Sidon wolo totoonulalo owolaato todelomo ilimi hitua-tuawua lo ulipulio.

³ Tirus malomongu bibii-ntengiyalo duo̒lo batangalio wau lomuntu dadaata daa̒ hulawa wau talaa̒ tilinggula lowali debo odelo balangi biasa debo odelo hungayo wau latao̒ todalalo.

⁴ Bo Eeya mamohutu olio mosikini. Ngoa̒amila okokaya lokota boito matapilo-Lio ode delomo deheto wau kota boito lohihilao mamaahu lotulu.

⁵ Kota lo Askelon wau Gasa mamoo̒onto mao̒ wau mowali moohe. Ekron mamoo̒onto mao̒ olo wau oolia lo totoonulalo halapanilio. Gasa mao̒olia li olongiaalio, wau Askelon mamowali moliilo diila otualio.

⁶ Asdod mapoti biluloa̒ lotau-tauwalo monto bangusa uu̒ulauwa. Eeya lotahuda, “Taulo Pilistin tasombongi boito maloopuwo-U̒.

⁷ Timongolio diilalo molamela tapu udonggo oduhu meaalo ua̒alo u dinidini. Ngoa̒amila taa u meitolaa mamowali umati-U̒ wau ilanggapu odelo bagiaangi suku lo Yehuda. Ekron mamowali wato lo umati-U̒, debo odelo taulo Yebus tojamani muloololio mai.

⁸ Wau̒ mamodaha hutaa-U̒ wau molanggu papaa-sukaniyalo deli tamaa lumaodeo̒. Wau̒ diilalo mopoluasi tahi podeehea motolo kawasa umati-U̒. Sababu polodutoli mongolio maa iloontonga-U̒.”

Olongia tamaa dungga-dungga mai

⁹ Wuu ulipu lo Sion, poti wengahulo! Wuu ulipu lo Yerusalemu, pongiibodulo mola meengahu! Bilohilo! Olongiamu dungga-dungga mai wolo ohaama! Tio olongia aadili talodelo mai oa̒ahu. Bo lealeaatu odupapa lohilao tio meidungga tae̒tae̒ to kolodai, kolodai tuwau u buboto.

¹⁰ Eeya lotahuda, “Kakaa-letawaalo popaatea monto Epraim maloopuwo-U̒, ngoa̒amila wadala to Yerusalemu maloopuwo-U̒ wau ngoa̒amila pana maa antuluwo-U̒. Ti olongiamu mamopo malalumu polodame towolota lo babaa-ngusawalo. Monto deheto ode deheto Tio mao̒kawasa, monto dutulaa Eprat demola huudu dunia.”

Polonguli owowoluwoa umati lo Allahu Taa̒ala

¹¹ Eeya lotahuda ode umati-Lio, “Domi daantia u pilohutu-U̒ wolimongoli, daantia u silaaha wolo duhu bake lodewo, malopato-U̒ ulipumu tahi dutolaa todelomo polayahu debo odelo taa u leiu̒lungo todelomo ali mohengu.

¹² Muli pohualingolo mai wuu tau-tauwala lo polayahu, botia timongoli o halapani. Muli pohualingolo mai ode tambati potiduo̒lamu, Wau̒ maadebo mobalakati mai olimongoli. Dungohiilo: Poo̒oluo piu̒wa timongoli mabalakatiyo-U̒ sababu ngoa̒amila polodutolo u mai̒lo laasawa limongoli.

¹³ Yehuda mapomake-U̒ odelo pana lo pahalaawani, wau Isirai̒lu odelo walao̒ pana u dapadapato polentude. Ulipu lo Sion pomake-U̒ odelo wamilo; wolo wamilo boito tau-tauwalo Yunani matuhuwo-U̒.”

¹⁴ Eeya mamopo bilohei batanga ode umati-Lio, debo odelo ilato mongo walao̒ pana-Lio pilopo lentu-Dio. Eeya Taa Laba-labaalo molanggato mamohiipo torompeti tuotio moluhu lapatao̒ monao̒ momaju todelomo dutalo monto tilayo.

¹⁵ Umati-Lio tantu wohia-Lio poloduo̒lo, tilinggula totoonulalo musu olaahe limongolio. Debo odelo tingalao̒ lotaa u hihuwoa̒ lo minumani, oditolo olo tingalao̒ limongolio todelomo polotuuhua. Odelo duhu lobake u bilangguwato ode yitaato lomesba, odieelo mola duhu lomusu limongolio.

¹⁶ Wonu dulahu boito meidungga, Eeya mamopoa̒ahu mai umati-Lio, debo odelo diiti mopoa̒ahu himbalio monto u topotala. Timongolio mamotinela tohuta lo Eeya, debo odelo polioto makuta heinta-intaawa.

¹⁷ Donggo boli piohio huta lo Eeya halapanilio, donggo boli piohio wau gagaalio! Mota teto angguru wau pale mobutu mola mali-malihuhuo̒, mohutu mongo bohulotau wau mongo dulahu oduhenga lotolo.