JAKARIA 7 - KITABI HABARI MOPIOHE

Eeya lohentea̒ puasa udiila ututuulio tutu

¹ To dulahu opulaa pato hulalo Kislewu, deu̒yito-yito hulalo otiolio, todelomo taunu opatio pamalenta li Olongia Darius, Eeya longohi mai poli tahuli olaatia.

² Ulipu lo Betel malolao olei Sarejer wau Regem-Melekh boli tau limongolio ode Bele lo Eeya Taa Laba-labaalo kawasa u momolohone balakati-Lio.

³ Timongolio olo ilahulalio lohintu tomongo iimamu wau mongo nabi odie, “Donggo palalu ami mohilimutao̒ oa̒antulu Bele lo Eeya wolo mopuasa totimii̒du hulalo olimolio debo odelo u mapilohutu lami otaa-taunuwa mola hiheolio?”

⁴ Uti-utieelo tahuli lo Eeya u leidungga mai odelaatia.

⁵ Tahudaa-Lio, “Potunggula mao̒ ode ngoilanggubu tuango lipu botie wau ode mongo iimamu deu̒ puasa wau hilimuta u pilohutu limongolio tohulalo olimolio wau opitulio ngotilonggadu pitu lopulu lotaunu mola botie diila polo hulumati ode Olau̒.

⁶ Wau olo tou̒ timongolio lolamela wau longilu, timongolio helo lolohe u moo̒luli hilaa limongolio lohihilao.”

⁷ Ui-uitolo u tilahuda lo Eeya lotimbulude to mongonabi tojamani u lopaluta mola tou̒ Yerusalemu donggo piloti biluloa̒ wau tuango lipulio maa̒mulu. Tou̒ boito tau diila bo bilu-biluloa̒ to kakaa-mbunguwalo topalito kota bo tumbao̒ towimbihu huliaalio wau to bubuu-ngowaalo huludu to ambahu otolopa.

Polobaaa̒ngi loo̒ akiibati pilolayahu

⁸ Eeya Taa Laba-labaalo kawasa longohi mai tahuli botie odelaatia,

⁹ “Otaa-taunuwa u lopalutaa mola yilohi-U̒ mai papaa-lentaala botie ode umati-U̒, ‘Timongoli musi opii̒li aadili, odehu hilao wau mopiohe hale ode timongotamu.

¹⁰ Diila mao̒ podeehe tomongo janda, taukekeei̒ tadidu otiilo otiyamo, tau-tauwalo deli tahi tatapua tohuungi mongoli, meaalo penu boli tatoonu wambao̒ tawaluo todelomo owowoluwoa usuusa. Wau diila mao̒ olo pomatuju u moleeto ode timongotamu.’

¹¹ Bo umati-U̒ baaa̒ngiolo wau sama-samaata diila mohuto modungohe; timongolio helo lau̒ube bulonga limongolio alihu diila moo̒dungohe.

¹² Timongolio baaa̒ngi lohilaa limongolio tilinggula lowali debo odelo toheeto botu. Wau̒ lomuluka daa̒ sababu timongolio diila lodudua̒ popoo-ngaajali-U̒ u mailohi-U̒ ode limongolio wolo lotimbulude to mongonabi u muloololio mai.

¹³ Wau̒ diila lolametai dua̒ limongolio, sababu timongolio diila lodungohe tou̒ Wau̒ lotahuda.

¹⁴ Debo odelo dutalo, Wau̒ malo poloolopu olimongolio tilinggula timongolio bolo pakusa lotibiluloa̒ to lilii-puwaalo deli. Huta u moloiodu botie malowali loliilo daa̒ diila otualio wau diila mowali pobutua lo pilomulo.”