JAKARIA 6 - KITABI HABARI MOPIOHE

Bibilohe pasali kaleta lo popaatea mohelu wopato

¹ Watia loo̒toduo mai bibilohe uwewo. Pee̒enta botie iloontonga lowatia mohelu wopato kaleta lo popaatea yilumualai towolota lohui̒dee mohelu duluo lo polunggu.

² Kakaa-letawaalo boito diledeo̒ lowadala u ngopa-ngopanggalo, u bohulio wadala meela, u oluolio wadala moitomo,

³ u otolulio wadala hula wau opaatio wadala tambala.

⁴ Watia lohintu mao̒ ode malai̒kati boito, “Tuani, wolo boliilio kakaa-letawaalo popaatea botie?”

⁵ Tio lolametai, “Timongolio momonggata ode opaato dulungo lapatao̒ motaalua mao̒ wolo Eeya ngoilanggubu aalamu.

⁶ Kaleta lo popaatea u diledeo̒ lowadala moitomo motidulunga ode Babel totilayo. Wadala hula motidulunga ode otolopa wau wadala u tambala motidulunga ode lipu to huliaalio.”

⁷ Tou̒ wadala u tambala boito yilumualai, timongolio oontonga mao̒ diila sabali u umonao̒ momalakisa dunia. Malai̒kati boito loloi̒ya, “Ponao̒lo u momalakisa dunia!”

⁸ Lapatao̒ malonao̒ timongolio. Lapatao̒ malai̒kati boito longiibode olaatia, “Wadala u lonao̒ ode Babel boito malo poo̒ole omuluka lo Eeya.”

Palenta u mopomakuta mao̒ olei Yosua

⁹ Eeya longohi mai tahuli botie ode olaatia.

¹⁰ Tahudaa-Lio, “Hamawaalo dewo ulohi mai lei Heldai, Tobia wolei Yedaya, deu̒yito-yito tau-tauwalo taboheli lohualingai lonto polayahu to Babel. Hua̒a delowalo dewo limongolio boito ode bele lei Yosia walae̒e Jepanya.

¹¹ Monto hulawa wau talaa̒ wowohi limongolio boito, pohutuwalo makuta tuwau pohulia mao̒ to lunggongi Iimamu Daa̒ Yosua walae̒e Yojadak.

¹² Potunggula mao̒ olio deu̒ Wau̒ Eeya Taa Laba-labaalo kawasa lotahuda, ‘Taa u ilunte Sangi Tumbingo, maa ohaasili totambati tio woluo wau tio mamuli momongu Bele lo Eeya.

¹³ Tiolo tamaa momongu Belee-U̒ wau mololimo ohulumati debo odelo ngotaalio li olongia, wau Tio mamo malenta to ulipulio. Ngotaalio li iimamu mawolio wau timongolio mamokalaja pee̒-pee̒enta wolo mopiohe wau dame.’

¹⁴ Makuta boito tilahu to Belee-U̒ u mopoe̒ela olei Heldai, Tobia, Yedaya, wolei Yosia.

¹⁵ Tau-tauwalo mamonao̒ mai monto tambati molamingo wau motuulungi momongu Belee-U̒. Wonu huhutu u momongu boito lapato, timongolio mamotota mao̒ deu̒ Wau̒ Eeya Taa Laba-labaalo kawasa malolao olemu ode limongolio. Ngoa̒amila boito mamotoduo wonu timongolio tio̒otutua modungohe papaa-lentaa-U̒, Eeya Allahu Taa̒ala limongolio.”