JAKARIA 5 - KITABI HABARI MOPIOHE

Bibilohe pasali lo lilibu kitabi u tilumomboto

¹ Watia luli lopoo̒ tuotao̒, wau pee̒enta botie iloontonga lowatia lilibu kitabi tuwau tilumomboto todulente.

² Malai̒kati boito lopoi̒laalo mai wolo u iloontonga lowatia. Tametao̒ lowatia, “Lilibu kitabi tuwau tombo-tomboto todulente. Hayai̒o tio lomeeteri wau tanggalio wopato wau ngoputu lomeeteri.”

³ Lapatao̒ tio loloi̒ya mai olaatia, “To lilibu kitabi boito tula-tuladee laa̒nati ode ngoilanggubu lipu botie. To baya tuwau tula-tuladee deu̒ timii̒du tamootao̒wa malualoolo monto lipu botie. To baya wewolio tula-tuladee deu̒ timii̒du taa u motadia paaluti malualoolo olo.

⁴ Eeya Taa Laba-Labaalo kawasa lotahuda deu̒ laa̒nati boito mapo dunggaalio ode yitaato bele lotimii̒du tamootao̒wa wau ode bele lotimii̒du taa u motadia paaluti. Bebee-leyaalo boito matulusi otuhata lo laa̒nati boito tunggula mowali tutuu-wodeyaalo.”

Bibilohe pasali lotaabua todelomo kalanji

⁵ Malai̒kati boito luli yilumetai wau loloi̒ya, “Bilohi! Woluo poli tadungga-dungga mai!”

⁶ “Wolo uito?” yilintu mao̒ lowatia. Ualio, “Kalanji tuwau. Ui-uitolo tomaya lodusa monto ngoilanggubu lipu botie.”

⁷ Kalanji boito o tau̒ubu monto timohe. Tou̒ donggo hepoo̒tuoto lowatia, tau̒ubu boito lohuo̒ mola wau loilaalo todelomo kalanji boito hulohuloa̒ taabua ngota.

⁸ Malai̒kati boito loloi̒ya, “Taabua botie mopotomaya mai u moleeto.” Lapatao̒ luli dileheelio mola taabua boito ode delomo kalanji wau tilau̒ubelio kalanji boito.

⁹ Watia lomilohe mola ode yitaato wau loo̒onto taabua duulota tombo-tombotai odelaatia. Timongolio opolipio̒ u motoheeto debo odelo polipio̒ bulungi duwayo. Kalanji engontie hilama limongolio tulusi dilelo limongolio tilumomboto.

¹⁰ Watia lohintu mao̒ ode malai̒kati boito, “Maa potomboti mongolio ode utoonu kalanji boito?”

¹¹ Tametio mai, “Ode Babel, mola teto timongolio mamomongu kuili ode olio. Wonu kuili boito lapato, kalanji boito mapo tambatiilio teto u tuboolo.”