JAKARIA 4 - KITABI HABARI MOPIOHE

Bibilohe pasali lo oa̒ato tohe

¹ Malai̒kati tamalo bisala ode laatia boito luli lonao̒ mai wau lopobongu olaatia debo odelo lopobongu mao̒ taa tuutuluhu.

² “Wolo u iloontongamu?” yilintulio. “Oa̒ato tohe tuwau monto hulawa,” tametao̒ lowatia mao̒. “Tohuudu yitaatio woluo tambati lo winulio, wau topalitio woluo tohe mohelu pitu, u tinggai woluo tambati losumbu mohelu pitu.

³ To ambahu oloihi wau olowala lo oa̒ato tohe boito woluo bungo lojaitun dulo bungo.”

⁴ Lapatao̒ wau̒ lohintu mao̒ ode malai̒kati boito, “Wolo u pilopo tomaya mai lo babaa-langiyalo boito, Tuani?”

⁵ “Wolo diila otaawamu?” yilintulio olaatia. “Diila Tuani,” tametao̒ lowatia.

^10b Malai̒kati boito loloi̒ya mai odelaatia, “Opitu tohe boito yito opitu mato lo Eeya u mongimato ngoilanggubu tudu lodunia.”

¹¹ Lapatao̒ watia luli lohintu mao̒ olio, “Wolo boliilo odulo batango lojaitun to olowala wau oloihi oa̒ato tohe boito?

¹² Wolo poli boliilo odulo tango lojaitun totili lo odulo pipa hulawa u mopotolohe winulo jaitun boito?”

¹³ Ualio mao̒ olaatia, “Wolo diila otaawamu?” “Diila Tuani,” tametao̒ lowatia.

¹⁴ Tio luli loloi̒ya, “Uito yito duulota tamaa tilulaoto Eeya lo ngoilanggubu aalamu wau tilunu u momaya o-Lio.”

Danti lo Eeya odelei Jerubabel

⁶ Malai̒kati boito lopoa̒hu olaatia lopo tunggulao̒ odelei Jerubabel tahuli botie, “Diila wolo olootolo suludadu wau diila olo wolo olootolumu lohihilao yio̒ mao̒tilapulo, bo wolo rohu-U̒.

⁷ Totaibuto penu boli debo odelo udaa̒ lo hui̒dee mamohei monto talumu. Yio̒ mamuli momongu Belee-U̒, wau tosaaa̒ti yio̒ mopodutu mao̒ botu tau̒wa lopundasi to tambatilio, tau-tauwalo mamo ngiibode meengahu, ‘Donggo boli gagaalio!’ ”

⁸ Lapatao̒ leidungga mai poli tahuli uwewo lonto Eeya.

⁹ Tahudaa-Lio, “Tei Jerubabel malo podutu mao̒ pundasi lo Belee-U̒, wau tio mamo poo̒lapato ngoa̒amila u bilongu boito. Wonu uito motoduo mai, umati-U̒ mamotota mao̒ deu̒ Wau̒ulo tamalolao mai olemu Jakaria ode limongolio.

^10a Woluo tamo mandungi diila ohuna polou̒tiya botie. Bo timongolio mamoo̒onto mao̒ tei Jerubabel mamopo tolonga mola dudelo lou̒ momongu lo Belee-U̒, wau timongolio mamo tiwengahe.”