JAKARIA 2 - KITABI HABARI MOPIOHE

Bibilohe pasali lotali poluu̒du

¹ To delomo bibilohe wumbutio mola watia loo̒onto talolai̒ ngota tadihu-dihu tali poluu̒du.

² “Mao̒de utoonu?” yilintu lowatia. “Mamoluu̒du Yerusalemu,” tametio mai, “watia ohilaa motota ngoolo mao̒ hayao̒ wau tanggalo kota boito.”

³ Lapatao̒ iloontonga lowatia malai̒kati tamalo bisala wolaatia boito, lodiambanga lomaju, wau ngotaalio lo malai̒kati wewo lodunggaya mao̒ wolio.

⁴ Malai̒kati tabohulio loloi̒ya ode malai̒kati tao̒luolio, “Hua̒a ponao̒lo ode tabohulotau boito, wau polelea mao̒ deu̒ Yerusalemu mao̒dito hutoyoa̒alio wolo manusia wau binatangi tilinggula diila mowali pomongulalo dingingo meeseli topalitio.

⁵ Eeya malodanti mai deu̒ Eeya lohihilao mamowali dingingi tulu u momalita kota boito u moduo̒lao̒ wau Tio mamo tibiluloa̒ mola teto todelomo totoonulalo kawasa wau odudaa̒a-Lio.”

Tau-tauwalo polayahu tiliangio lohualingo

^6-7 Eeya lotahuda ode umati-Lio, “Wau̒ malopo bubuua̒yawa olimongoli ode totoonulalo tutulio. Bo botia wuu tau-tauwalo polayahu, teteo̒olo monto Babel wau pohualingolo ode Yerusalemu.

⁸ Tatoonu tamoluhu olimongoli, yi moluhu polantapo hilaa-U̒.” Yi Eeya Taa Laba-labaalo kawasa lopoa̒hu olaatia lopo tunggulao̒ tahuli botie ode babaa-ngusawalo tamalo lambata umati-Lio,

⁹ “Eeya lohihilao mamo luwali olimongoli! Wau timongoli malambato lobakasi mongo watomu lohihilao. Wonu sua̒li boito motoduo mai, timongoli mamotota deu̒ Eeya Taa Laba-labaalo kawasa malo poa̒hu mai olaatia.”

¹⁰ Eeya lotahuda mai, “Polahualo mola wolo wengahe wuu ulipu lo Yerusalemu! Wau̒ mamo tibiluloa̒ tohuungi mongoli!”

¹¹ To maasa boito dadaata bangusa mamonao̒ mai ode Eeya u mowali umati-Lio. Eeya mamo tibiluloa̒ tohuungi mongoli, wau timongoli mamotota deu̒ Eeya malolao mai olaatia ode limongoli.

¹² Pee̒entapo Yehuda mamowali tolomodu miliki lo Eeya to huta-Lio u mantali, wau Yerusalemu mamowali kota ulaba-labaalo pilonua-Lio.

¹³ Potipoo̒yolo timongoli ngoa̒amila totalu lo Eeya! Sababu Tio malo monggato lonto tambati piloti biluloa̒a-Lio tosologa.