JAKARIA 13 - KITABI HABARI MOPIOHE

¹ Eeya Taa Laba-labaalo kawasa lotahuda, “To dulahee boito mamo pentelai butu lotaluhu tuwau u mopo mantali walimai lei Dauda wau ulipu lo Yerusalemu monto dusa wau polotubowa balaahala u mapilohutu limongolio.

² To dulahee boito maluluto-U̒ tanggulo babaa-laahalaalo monto huta botie, tilinggula diduu̒ penu boli ngotaa mao̒ tadonggo moe̒elao̒. Ngoa̒amila taa u mongaku batangalio nabi mapolahiyo-U̒ pee̒-pee̒enta woli mongolio tamaa ilotunga lorohu udiila motulidu hale.

³ Wau wonubolo donggo woluo taa u moloi̒ya deu̒ tio mopo tunggula tahuli, tiyamo wau tiilolio lohihilao mamoloi̒ya mao̒ olio deu̒ tio musi hukuu-maniyolo mate, sababu uiloi̒yaalio yito wimbulo. Wonu tio debo mongaku batangalio odelo nabi olo, tio mabituo̒olo tunggula mate liyamo wau liilolio lohihilao.

⁴ To dulahee boito, mongonabi mamolaasa moolito u mohutu debo odelo nabi. Timongolio diila tamomake pakeyangi lonabi u mohimbulo wau mopomangga bibilohe-bibilohelio.

⁵ Bolii̒o mao̒, timongolio mamoloi̒ya, ‘Wau̒ diila nabi. Wau̒ bo ngotaalio lo tamoomengia tahemo kalaja to halabolu ngotupa lo tutumulo.’

⁶ Wau wonu tau mohintu mao̒ olio, ‘Pali wolo uwoluo to duhelumu boito?’ tio mamolametao̒, ‘Wau̒ ilotuhata lopali boito tobele lo sahabatiu̒.’ ”

Palenta u momate diiti mate-mateelo mao̒ tailutolia lo Allahu Taa̒ala

⁷ Eeya Taa Laba-labaalo kawasa lotahuda, “Pobongulo mola, wuu wamilo, wau tuhuwalo diiti tahe mokalaja duo̒lo-U̒! Pateaalo tio mate-mateelo mao̒, yi hihii-mbaawaalo mamo bubuua̒yawa. Wau̒ mamoluhu umati-U̒,

⁸ wau to ngoilanggubu lipu dulo tayadu totolu monto ulipulio maamate.

⁹ Bo ngotayadio totolu mamoa̒ahu. Wau timongolio boito mapo mantaliyo-U̒ debo odelo talaa̒ u pilobelesi lotulu. Timongolio matesiyo-U̒ debo odelo tamotesi hulawa. Lapatao̒ timongolio mamodua̒ mai ode Olau̒, wau Wau̒ mamolametai olimongolio. Wau̒ mamotahuda ode limongolio deu̒ timongolio yito umati-U̒, wau timongolio olo mamongaku deu̒ Wau̒ulo Eeya Allahu Taa̒ala limongolio.”