JAKARIA 1 - KITABI HABARI MOPIOHE

Eeya lotianga umati-Lio luli lohualingai ode Olio

¹ To hulala owalulio todelomo taunu oluolio pamalenta li Olongia Darius to Persia, Eeya lopo tunggulai tahuli botie odelaatia, Nabi Jakaria walae̒e Berekhya wau woombu lei Ido.

² Eeya lomalentai olaatia u moloi̒ya mao̒ odie ode umati-Lio, “To jamani u yilalu mao̒ Wau̒, Eeya Taa Laba-labaalo kawasa, lomuluka daa̒ ode linenemoyaamu.

³ Bo botia Wau̒ motahuda mai ode olemu: Pohualingolo mai ode Olau̒, yi Wau̒ olo mamuli mohualingai ode olemu.

⁴ Diila mao̒ potihutu debo odelo tinenemoyaamu. Muloololio mai mongo nabi lopo tunggulai tahulii-U̒ ode limongolio alihu timongolio diilalo mohutu u moleeto wau mohutu dusa. Bo timongolio diila momandungi wau diila mohuto modungohe ola-U̒.

⁵ Tou̒toonu tinenemoyaamu wau mongnabi boito botia? Timongolio madiduu̒.

⁶ Lotimbuludei to mongonabi mongo wato-U̒ boito, pilopo tunggulu-U̒ papaa-lentaalo wau popoo-eelaa-U̒ ode linenemoyaamu. Bo timongolio diila lomandungi tilinggula timongolio musi momanta akiibatilio. Lapatao̒ timongolio lolee̒ wau lotolongaku deu̒ Wau̒, Eeya Taa laba-labaalo kawasa, malo hukuumani olimongolio lotuuu̒de wolo totala limongolio, wau lotuuu̒de wolo u tilantu-U̒.”

Bibilohe linabi pasali lowadala demoheelu ngoolo

⁷ To dulahu odulo pulaa pato hulala Syebat, deu̒yito-yito hulala mopulaa tuwau, todelomo taunu oluolio pamalenta li Olongia Darius, Eeya lopo tunggulai tahulii-Lio odelaatia. To delomo bibilohe tuwau tou̒ hui,

⁸ watia loo̒onto malai̒kati lo Eeya tae̒tae̒ towadala meela tuwau. Tio lohuheli tolumbaya tuwau towolota bubuu-ngowaalo ayu muradi. To dibalakalio tihu-tihula wadala wewo demoheelu ngoolo, woluo u meela, u meela dambu wau hula.

⁹ Watia lohintu mao̒ olio, “Tuani, wolo boliilio ngoa̒amila wadala botie?” Tio lolametai, “Mapobilohuu̒ mai boliilio olemu.

¹⁰ Timongolio yilao mai lo Eeya u momalakisa dunia.”

¹¹ Ngoa̒amila wadala boito lopoduloheo̒ ode malai̒kati, “Ami malo lontale ngoilanggubu tudu lodunia, loilaalo mai dunia botie duo̒duo̒oto wau dame.”

¹² Lapatao̒ malai̒kati boito loloi̒ya, “Eeya Taa Laba-labaalo kawasa, pitu lopulu lotaunu mola hiheolio Eeya lomuluka duo̒lo Yerusalemu wau kokoo-tawaalo Yehuda. Tunggula omolua Eeya maadebo muluka wau diila mongambungu olimongolio?”

¹³ Eeya lolametai to malai̒kati boito wolo tataa-heyaalo u moliyango,

¹⁴ wau malai̒kati boito lopoa̒hu olaatia lopo tunggulo wolo upilo tahuda mai lo Eeya Allahu Taa̒ala Taa Laba-labaalo kawasa, “Wau̒ laba-labaalo momonu wau tilumoodu laasa suukali lohilao kota lo Yerusalemu, kotaa-U̒ u mantali.

¹⁵ Bo Wau̒ muluka daa̒ to babaa-ngusawalo tamolaasa aamani wau dame. Sababu tou̒ Wau̒ longotonga omulukaa-U̒ ode umati-U̒, babaa-ngusawalo boito helo duhenga polodutolo umati-U̒.

¹⁶ Botia Wau̒ muli mohualinga ode Yerusalemu mota mongambungu kota boito. Belee-U̒ mamuli bongulolo wau kota lo Yerusalemu mamuli ponguliyolo.”

¹⁷ Malai̒kati boito lopoa̒hu olaatia lopo tunggula tahuli botie olo, “Eeya Taa Laba-labaalo kawasa lodanti deu̒ kokoo-taalio mamuli mowali maa̒amulu wau deu̒ pee̒entapo Tio mamotulungi Yerusalemu wau motolongaku mao̒ odelo milikii-Lio lohihilao.”

Bibilohe pasali lo tutuu-ngeyaalo

¹⁸ To delomo bibilohe uwewo, watia loo̒onto tunge losapi mohelu wopato.

¹⁹ Watia lohintu mao̒ ode malai̒kati tamalo bisala mai olaatia, “Wolo boliilio lo tutuu-ngeyaalo boito?” Tio lolameto, “Tutuu-ngeyaalo boito yito tomaya lo yiyii-laidiyalo molotolo ulopo bubuua̒yawa ulipu lo Yehuda, Isirai̒lu wau Yerusalemu.”

²⁰ Lapatao̒ Eeya lopo bilohei olaatia wopatota pani lowate tahideloa duuduo̒.

²¹ Watia lohintu mao̒, “Wolo makasudu nonao̒ mai limongolio?” Tio lolameto, “U mopo hulu-huluhelio wau mopowulide babaa-ngusawalo tamalo poa̒ntulu-antulu lomao̒ Yehuda wau helopo bubuua̒yawa ulipulio.”