JABURU 99 - KITABI HABARI MOPIOHE

Allahu Taa̒ala, Olongia Udaa̒

¹ Eeya yito Olongia; babaa-ngusawalo humuhela. Eeya lotihuloa̒ tokadera li olongia toitaato lo malaikati opolipio̒, dunia lolotau̒lo.

² Eeya okawasa laba-labaalo to Sion; Eeya udaa̒ mongawaasa totoonulalo bangusa.

³ Huiaalo mao̒ timongolio momuji tanggulo Eeya taluuhuru molamahu. Mantalilo mola Eeya!

⁴ Okokawasa duo̒lo Eeya, Olongia tai̒lohilao to butoo̒; Eeya malopolaia̒ u otutu; Eeya helo ponao̒ butoo̒ oa̒adili to Isirai̒lu.

⁵ Polamahelo mola Eeya Allahu Taa̒alanto, posujudulo totalu lokadera huhuloa̒a-Lio. Mantalilo mola Eeya!

⁶ Tei Musa wolei Haruna tuwotuwoto mongo iimamu lo Eeya, tei Semuel tala ngota lo tahelodua̒ mola to Eeya. Timongolio hipongiibode meengahu to Eeya, wau Eeya helo lametai.

⁷ Monto patoo̒ heengo Eeya helo tahuda toli mongolio, timongolio lodungohe to ngoa̒amila butoo̒ wau palenta lo Eeya.

⁸ Yaa Eeya Allahu Taa̒ala lo mongowatotia, Eeya hemo lametai umati lo Eeya; ode limongolio Eeya Allahu Taa̒ala tao̒hilaa mongambungu, eleponu timongolio hukuumanio mai lo Eeya sababu totala limongolio.

⁹ Polameheelo mola Eeya Allahu Taa̒alanto, wau tubowalo Eeya tohulu-Dio u mantali, sababu mantalilo Eeya Allahu Taa̒alanto.