JABURU 98 - KITABI HABARI MOPIOHE

Allahu Taa̒ala tamongawasa dunia

¹ Jaburu. Polahuwalo mola lahu bohu ode Eeya, sababu totoonulalo huhutu lo Eeya u moo̒linggolabe! Wolo kawasa wau olootolo Eeya lohihilao Eeya maloo̒haama.

² Eeya lopo loladei ohohaama lo Eeya; Eeya lopoi̒laalo mai oa̒adili-Lio to babaa-ngusawalo.

³ Eeya loe̒elai ponu wau otatapu wau molotolo hilao lo Eeya to Isirai̒lu, umati lo Eeya. Ngoa̒amila bangusa to ngoilanggubu dunia maloo̒onto ohohaama lo Allahu Taa̒alanto.

⁴ Potingalao̒lo mola ramerame wolo wengahu ode Eeya, wuu ngoilanggubu dunia! Pujiaalo mola Eeya wolo lahu wau tingalao̒ wengahu.

⁵ Polahuwalo mola poloi̒laalo momuji ode Eeya, wolo mokuti kocapi.

⁶ Hiipalo mola torompeti wau sangkakala, potingalao̒lo mola ramerame wolo wengahu ode Eeya, Olongiaanto.

⁷ Poti hulaubulo mola wuu deheto wuu ngoa̒amila tuangio dunia wau ngoa̒amila u hibiluloa̒wa to delomio.

⁸ Huliaalo mao̒ duduu-tulawaalo molaa̒apa uluu̒, huhuu-luduwaalo motinga-tingalaa̒a ramerame wolo wengahu totalu lo Eeya.

⁹ Sababu Eeya dungga-dungga mai momutoo̒ dunia; babaa-ngusawalo mabutoo̒ lo Eeya wolo aadili wau otutu.