JABURU 97 - KITABI HABARI MOPIOHE

Allahu Taa̒ala, tamongawasa wau tau̒daa̒

¹ Eeya yito Olongia! Patutilio dunia motiwengahu, wau pupuu-lauwaalo motiwengahu.

² Eeya pilalita lo heengo wau u modio̒lomo; ua̒adili wau butoo̒ yito wapidu lo pamalentaa-Lio.

³ Tulu umalapo totalu-Lio, momobu musu topali-Tio.

⁴ Ilatolio mopobaango dunia, dunia humuhelo moo̒onto to Eeya.

⁵ Huhuu-ideyaalo modidi debo odelo talu totalu lo Eeya, totalu lo Eeya, takaawasa ngoilanggubu dunia.

⁶ Hulungo mopololadu ua̒adili lo Eeya, wau ngoa̒amila bangusa moo̒onto omumulia-Lio.

⁷ Ngoa̒amila taa u hipolubowa balaahala maa poo̒olitolio, tahemo pomangga babaa-langiyalo udiila ohuna; ngoa̒amila dewa mamo sujudu totalu lo Eeya.

⁸ Ulipu lo Sion wau kokoo-tawaalo Yehuda sanangi tou̒ moo̒dungohe putuusani lo Eeya.

⁹ Sababu Eeya, yaa Eeya, takaawasa ngoilanggubu dunia; Eeya udaa̒ mongilabota lo totoonulalo dewa.

¹⁰ Wuu timongoli tai̒lohilao to Eeya, lonui̒lo u moleeto! Sababu moduo̒lai tutumulo umati-Lio, Eeya molopata olimongolio monto kawasa lotaa momaahu palenta.

¹¹ Mobaango malobutu mai ode taa u ohilao motulidu, wau wengahu ode taa u juujulu.

¹² Poti wengahulo, wuu tau-tauwalo tao̒hilao motulidu sababu wolo u mapilohutu mai lo Eeya, wau posukurulo mola to Allahu Taa̒ala tamantali.