JABURU 95 - KITABI HABARI MOPIOHE

Lahu lo poloi̒laalo momuji

¹ Duloolo ito mopolahu mola ode Eeya, potinga-tingalao̒lo wolo wengahu ode tamoo-poa̒ahua olanto!

² Dulo ito monao̒ mai modunggaya wolo Eeya, wolo lahu poloilaalo momuji, potinga-tingalao̒lo mola wolo wengahu ode Eeya wolo lahu poloilaalo momuji.

³ Sababu Eeya yito Allahu Taa̒ala tau̒daa̒, Olongia tamolotolo boli buheli tamo ngawaasa totoonulalo dedeewaalo.

⁴ Eeya mongawaasa wiwii-mbihuwalo u modelomo daa̒ lohuta, totoonulalo bolitutuo̒ hui̒du olo miliki lo Eeya.

⁵ Eeya mongawaasa deheto, sababu Eeya talohutu mai, huta u luasi olo pilowali wolo ulu-I̒o.

⁶ Duloolo ito mosujudu molubo to Eeya, motibonggohuu̒ totalu lo Eeya talo powali mai olanto.

⁷ Sababu Eeyaalo Allahu Taa̒alanto, ito umati tatilaala mai lo Eeya, debo odelo himba hilimbala lo Eeya. To dulahee botie dungohilo suala lo Eeya:

⁸ “Diila mao̒ potibaaa̒ngi debo odelo loluuhurumu to Meriba, debo odelo timongolio tou̒ to Masa, tohuta datahu wau luasi udelita.

⁹ Mola teto timongolio helo himontala ola-U̒, eleponu timongolio maloo̒onto huhutuu-U̒.

¹⁰ Wopato polu lotaunu mola hiheolio Wau̒ molonuo̒ olimongolio; tahudaa-U̒: Otutu, bangusa boito diila tatapu wau molotolo hilao! Timongolio diila lomandungi totoonulalo parentaa-U̒.

¹¹ Yi Wau̒ helotadia todelomo omulukaa-U̒, timongolio diila tatumuwota ode lipu boito u moo̒tapu pohuheliyalo pee̒-pee̒enta wola-U̒.”