JABURU 94 - KITABI HABARI MOPIOHE

Eeya momutoa̒i ngoa̒amila tau

¹ Yaa Allahu Taa̒ala, Eeyaalo Allahu Taa̒ala tamolontuli, ambunguolo poi̒laalolo mai polo tontuli lo Eeya, yaa Eeya.

² Tihuloolo, yaa Hakimu lo ngoilanggubu dunia, hukuu-maniyalo mai taa sombongi motuuu̒de wolo huhutu limongolio.

³ Yaa Eeya, tunggula omolua taa moleeto motiwengahu? Tunggula omolua, ya Eeya?

⁴ Timongolio helo pomukao̒ tataa-heyaalo u bangganga, wau hemopo sombongi ololeeti mongolio.

⁵ Timongolio hemodeehe umati lo Eeya, yaa Eeya, wau helo potoyopu tau-tauwalo tahe tilulaoto Eeya.

⁶ Timongolio helomate yila-yilateelo mao̒ janda wau tadidu otiilo otiyamo wau tau deli tahi biluloa̒wa tolipu botie.

⁷ Uali mongolio, “Eeya diila moo̒onto olio, Allahu Taa̒ala lei Yako diila mopoo̒-tuotai olio.”

⁸ Wuu bangusaau̒, diila mao̒ potihulodu debo odelo uito, poo̒laatalo mopohuna lo aakalimu!

⁹ Allahu Taa̒ala talohutu mai bulonga, wolo Eeya diila modungohei? Eeya talohutu mai mato, wolo Eeya diila momilohei?

¹⁰ Eeya talo ngaajali babaa-ngusawalo, wolo Eeya diila mohukuumani mai? Eeya tolowali guru to ngoa̒amila tau, wolo Eeya diila opongotota?

¹¹ Eeya molonea̒ pikiilangi lo manusia, otaawa lo Eeya ngoa̒amilalo diila ohuna ngoa̒amilalo.

¹² Potisanangilo tutu taa u diliidiki lo Eeya, yaa Eeya, taa u ilaajali lo Eeya wolo bubuu-too̒waalo Eeya.

¹³ Poduo̒oto lo Eeya tio to duduu-laheyaalo topotala, tunggula kilakudio huango u loheu̒pa taa moleeto.

¹⁴ Sababu Eeya diila tamololaa umati lo Eeya; Eeya diila tamo lipata miliki pusaka lo Eeya.

¹⁵ Yi butoo̒ mamuli potihulolo to bubutoo̒, ngoa̒amila taa juujulu mamomantu olio.

¹⁶ Tatoonu tamoduulua olaatia monto taa momaahu parenta? Tatoonu tamo tiwambao̒ odelaatia moluwali taa hemohutu u moleeto?

¹⁷ Humayaalio Eeya diila lotulungi mai olaatia, watia ngopee̒ wambai̒o lolimbata ode dunia lotaa yilate.

¹⁸ Tou̒ watia hemo mikiilangi mola deu̒ watia mamodehu, ponu lo Eeya, yaa Eeya, helohutu mai olaatia tilimihula moloheto.

¹⁹ Wonu bolo hilaa lowatotia molawalo wau balisa, Eeya loliyango wau helopo wengahei olaatia.

²⁰ Eeya diila helo panggala wolo mongo butoo̒ hileeta, tahi pomatujua u moleeto dadaasari to butoo̒.

²¹ Timongolio helo woomboa moluwali taa juujulu, wau mohukuumani mate taa u diila ototala.

²² Bo Eeya yito tamooduulua olo watotia, Allahu Taa̒ala lo watotia mowali tamoo-duo̒lawa olo watotia.

²³ Eeya mohukuumani mai taa moleeto motuuu̒de wolo ololeetio, wau moheu̒utao̒ tunggili mongolio alihu diila mobisala sababu dusaalio. Eeya Allahu Taa̒alaanto mamo heu̒utao̒ tunggili mongolio alihu diila mobisala.